ចំនួនអ្នកស្លាប់នៅសហរដ្ឋអាមេរិកកើនឡើងខ្ពស់រហូតដល់ ១,៧៣៧ នាក់ក្នុងរយៈពេលមួយថ្ងៃ

អាមេរិក៖ តាមការចេញផ្សាយសារព័ត៌មាន BBC នាថ្ងៃទី ០៨ ខែ មេសា ឆ្នាំ ២០២០ អាមេរិកបាន ត្រូវបានកត់ត្រាថា មានអ្នកស្លាប់ ដោយសារជំងឺឆ្លង Covid-19 ច្រើនបំផុត ក្នុងរយៈពេលតែ មួយថ្ងៃដោយមានអ្នកស្លាប់ ១.៧៣៦ នាក់កាលពីថ្ងៃអង្គារ។

ចំនួនមនុស្សស្លាប់ដោយសារ Covid-19 ដ៏ច្រើនបែបនេះបាននាំមកនូវចំនួនអ្នកស្លាប់សរុបនៅក្នុងប្រទេសកើនឡើង ដល់ ១២.៧២២ នេះបើយោងតាមទិន្នន័យពីសាកលវិទ្យាល័យ Johns Hopkins ។

ចំណែកចំនួនអ្នកឆ្លងនៅសហរដ្ឋអាមេរិកត្រូវបានបញ្ជាក់ថាមានចំនួនជាង ៣៩៨.០០០ ករណីដែលជាចំនួនខ្ពស់បំផុតក្នុងចំណោមបណ្ដាលប្រទេសនៅលើពិភពលោក ខណៈអ្នកឆ្លងទូទាំងពិភពលោកមានលើសពី ១,៤ លាននាក់។ ទោះយ៉ាងណានៅក្នុងសន្និសីទកាសែតមួយលោកប្រធានាធិបតី ដូណាល់ ត្រាំ បាននិយាយថាសហរដ្ឋអាមេរិកអាចនឹងឈានដល់ចំណុចកំពូល ដែលលោកស្នើអោយពលរដ្ឋអាមេរិកត្រៀមទុកជាមុន។

ចំនួនអ្នកស្លាប់ និងឆ្លងច្រើននៅក្នុងសហរដ្ឋអាមេរិកជាបន្ទុកដ៏ធ្ងន់សំរាប់រដ្ឋាភិបាល នៅពេលដែលទីក្រុងវូហានក្នុងប្រទេសចិនដែលជាកន្លែងដែលមានការឆ្លងដំបូងបានបញ្ចប់ការដាក់បង្ខាំងប្រជាជនរបស់ខ្លួន បន្ទាប់ពីជាប់បំរាមអស់រយៈពេល ១១ សប្តាហ៍៕