សៀមរាប៖ ក្រុមបុរាណវិទ្យានៃអាជ្ញាធរជាតិអប្សរា បានប្រទះឃើញវត្ថុបុរាណបីប្រភេទ នៅប្រាសាទកណ្តាលស្រះស្រង់នៃរមណីយដ្ឋានអង្គរ ខេត្តសៀមរាប ខណៈរូបបដិមាមួយអង្គដែលប្រជាពលរដ្ឋប្រទះឃើញនៅក្នុងតំបន់ឧទ្យានជាតិឬស្សីត្រឹប ខេត្តព្រះវិហារ ត្រូវបានប្រគល់ជូនមន្ទីរវប្បធម៌ខេត្ត។
អ្នកនាំពាក្យអាជ្ញាធរជាតិអប្សរា លោក ឡុង កុសល បានមានប្រសាសន៍កាលពីថ្ងៃអង្គារថា ក្រុមការងារ និងអ្នកបុរាណវិទ្យា ដែលធ្វើកំណាយស្រាវជ្រាវនៅប្រាសាទកណ្តាលស្រះស្រង់ បានរកឃើញវត្ថុបុរាណចំនួន ៣ប្រភេទ កាលពីថ្ងៃចន្ទ រួមមាន ត្រីសូល៍ ធ្វើពីលោហៈចំនួន២ ក្នុងនោះត្រីសូល៍មួយនៅមានរូបរាងពេញលេញ និងមួយទៀតនៅសល់តែបំណែកចុងស្រួចមួយចំហៀង, ខ្វាតពណ៌ស(គ្រីស្តាល់) ជាច្រើនគ្រាប់ រួមនិងបំណែកចម្លាក់ក្បាលនាគធំមួយ ដែលមួយផ្នែកធំកប់នៅក្នុងដីនៅឡើយ។
លោកថា៖ «ការរកឃើញសំណល់បុរាណវិទ្យាទាំងនេះ ក្រុមបុរាណវិទូ នៅមិនទាន់អាចសន្និដ្ឋានបានថាស្ថិតនៅក្នុងសម័យកាលណា ហើយគេដាក់ក្នុងគោលបំណងអ្វីនៅឡើយ ដោយសារទើបតែជាដំណាក់កាលដំបូងនៃការធ្វើកំណាយស្រាវជ្រាវ»។
បើតាម លោក ឡុង កុសល ការដ្ឋានធ្វើកំណាយស្រាវជ្រាវផ្នែកបុរាណវិទ្យានៅប្រាសាទកណ្តាលស្រះស្រង់ ត្រូវបានចាប់ផ្តើមធ្វើកាលចុងខែមីនា ដោយគ្រោងនឹងបញ្ចប់នៅក្នុងរយៈពេល៦សប្តាហ៍ ក្នុងនោះក្រុមការងារ បានរកឃើញវត្ថុបុរាណជាច្រើនដែលស្ថិតនៅរាយប៉ាយលើដីជុំវិញទួលប្រាសាទ។
កាលពីថ្ងៃចន្ទនេះដែរ អាជ្ញាធរខេត្តព្រះវិហារ ក៏បានប្រគល់ដងខ្លួនរូបបដិមាមួយអង្គ ដល់មន្ទីរវប្បធម៌ និងវិចិត្រសិល្បៈខេត្ត ក្រោយពីរូបបដិមានេះ ត្រូវបានប្រជាពលដ្ឋរកឃើញនៅក្នុងតំបន់ឧទ្យានជាតិឬស្សីត្រឹប ក្នុងភូមិសាស្ត្រស្រុកឆែប កាលពីចុងខែមេសា។
លោក នៅ ចាន់គង់ ប្រធានមន្ទីរវប្បធម៌ និងវិចិត្រសិល្បៈខេត្តព្រះវិហារ បានមានប្រសាសន៍កាលពីថ្ងៃអង្គារថា ដងខ្លួនបដិមាជាស្ត្រីនោះ ធ្វើពីថ្មភក់ មានកម្ពស់ ៧តឹក កម្រាស់ ១តឹក និងមានរូបរាងមិនពេញលេញដោយសាររូបនេះបានបាត់ព្រះកេស ជើង និងដៃ ដែលធ្វើឲ្យមានការពិបាកក្នុងការមើលដឹងពីសម័យកាល និងរចនាបថ។ លោកថា៖ «តាមការសន្និដ្ឋានជាបឋម រូបបដិមានេះ ជាទេពរូប ដែលអាចជាព្រះមួយអង្គក្នុងព្រហ្មញ្ញសាសនា និងត្រូវបានកសាងឡើងក្នុងសតវត្សទី១២»។
លោកបន្តថា បន្ទាប់ពីបានទទួលរូបបដិមានេះ មន្ត្រីជំនាញនៃមន្ទីរវប្បធម៌ខេត្ត នឹងបន្តសិក្សាស្រាវជ្រាវ និងចងក្រងជាឯកសារសម្រាប់់ទុកជូនអ្នកសិក្សាជំនាន់ក្រោយទៀត៕
