ជប៉ុន៖គណបក្សកាន់អំណាចក្នុងប្រទេសជប៉ុននៅថ្ងៃចន្ទនេះបានបោះឆ្នោតជ្រេីសរេីស លោក យ៉ូស៊ីហ៊ីដេ សូហ្គា (Yoshihide Suga) ឲ្យធ្វេីជាមេដឹកនាំថ្មីរបស់ខ្លួនដេីម្បីស្នងតំណែង លោក ស៊ីនហ្សូ អាបេ ដែលនេះមានន័យថា លោក សូហ្គា ប្រាកដជានឹងក្លាយជានាយករដ្ឋមន្ត្រីថ្មីរបស់ជប៉ុន។
កាលពីខែមុន លោក អាបេ បានប្រកាសលាលែងពីតំណែងដោយសារហេតុផលសុខភាព។
លោក សូហ្គា អាយុ៧១ឆ្នាំ មានតួនាទីជារដ្ឋមន្ត្រីទីស្ដីការគណៈរដ្ឋមន្ត្រីនៅក្នុងរដ្ឋបាលបច្ចុប្បន្ន ហេីយរូបលោកត្រូវបានគេរំពឹងខ្ពស់រួចទៅហេីយថានឹងឈ្នះក្នុងការបោះឆ្នោតរបស់បក្សកាន់អំណាច។
លោក សូហ្គា ត្រូវបានគេចាត់ទុកថាជាសម្ព័ន្ធមិត្តដ៏ជិតស្និទ្ធរបស់ លោក អាបេ ហើយទំនងជានឹងបន្តគោលនយោបាយរបស់ លោក អាបេ។
លោក សូហ្គា បានជាប់ឆ្នោតជាប្រធានគណបក្សសេរីប្រជាធិបតេយ្យដោយសំឡេងឆ្នោតគាំទ្រចំនួន៣៧៧ លើសំលេងឆ្នោតសរុប៥៣៤របស់សមាជិកសភា និងតំណាងថ្នាក់តំបន់។
បន្ទាប់ពីគណបក្សកាន់អំណាចក្នុងប្រទេសជប៉ុនបានជ្រើសរើសមេដឹកនាំថ្មីរបស់ខ្លួនរួចហេីយ សភាជប៉ុននឹងរៀបចំការបោះឆ្នោតមួយទៀតនៅថ្ងៃពុធដេីម្បីជ្រេីសរេីសនាយករដ្ឋមន្ត្រី ដែលនៅពេលនោះ លោក សូហ្គា ប្រាកដជានឹងត្រូវបានតែងតាំងជានាយករដ្ឋមន្ត្រីដោយសារតែសម្លេងភាគច្រេីននៃគណបក្សកាន់អំណាចក្នុងសភា៕
