បាត់ដំបង៖ បុរសវ័យកណ្តាលម្នាក់ ត្រូវប្រជាពលរដ្ឋប្រទះឃើញដេកស្លាប់នៅលើទ្រូងផ្លូវ បង្កការភ្ញាក់ផ្អើលទាំងព្រឹក ពុំទាន់ដឹងមូលហេតុនៅឡើយ។ ការភ្ញាក់ផ្អើលនេះ កើតឡើងនៅថ្ងៃទី ៧ ខែឧសភា ឆ្នាំ ២០២២ វេលាម៉ោងប្រមាណ ៤ ទៀបភ្លឺ នៅត្រង់ចំណុចក្រុមទី ៧ ភូមិអណ្តូងព្រីង សង្កាត់អូរម៉ាល់ ក្រុងបាត់ដំបង។
បើតាមសាក្សីបាននិយាយថា នៅពេលតែខ្លួនចេញពីផ្ទះមក ក៏ស្រាប់តែឃើញមានមនុស្សដេកស្លាប់នៅលើផ្លូវបែបនេះ ទើបមានការឆោឡោឡើង ព្រមទាំងបានរាយការណ៍ទៅសមត្ថកិច្ចជំនាញដើម្បីចុះពិនិត្យ។ ទីបំផុតទើបដឹងថា ជនរងគ្រោះមានឈ្មោះ ជា វ៉ាន់ដា ភេទប្រុស អាយុ ៤៩ ឆ្នាំ មានទីលំនៅផ្ទះលេខ ១២៦ ក្រុមទី ៦ ភូមិសាលាបាឡាត់ សង្កាត់អូរម៉ាល់ ក្រុងបាត់ដំបង មុខរបរយោធា ឈរជើងនៅស្រុកសំពៅលូន)។
បើតាមការសន្និដ្ឋានរបស់សមត្ថកិច្ច គឺបានបញ្ជាក់ថា មូលហេតុគឺបណ្តាលមកពី ស្រវឹងស្រា ដើរដួល ប៉ុន្តែបើតាមមជ្ឈដ្ឋានមួយចំនួននិយាយថា ជនរងគ្រោះអាចពេលស្រវឹង ហើយត្រូវរថយន្តបុកតែម្តង ព្រោះនៅលើថ្ងាស និងក្បាល មានស្លាកស្នាមឈាម ដោយបច្ចុប្បន្នសមត្ថកិច្ចបានប្រគល់សពទៅឲ្យក្រុមគ្រួសារយកទៅធ្វើបុណ្យហើយ៕
