ប៉ាគីស្ថាន៖ ក្រុមបាតុកររាប់រយនាក់បានប្រមូលផ្តុំគ្នានៅទីក្រុងអ៊ីស្លាម៉ាបាដ ប្រទេសប៉ាគីស្ថានកាលពីល្ងាចថ្ងៃអាទិត្យដើម្បីតវ៉ាប្រឆាំងតម្លៃទំនិញឡើងខ្ពស់ និងប្រឆាំងរដ្ឋាភិបាលបច្ចុប្បន្ន។ ការតវ៉ានេះត្រូវបានអំពាវនាវដោយអតីតនាយករដ្ឋមន្ត្រីលោក Imran Khan។
អ្នកតវ៉ាម្នាក់និយាយថា គ្មានតម្លៃទំនិញឡើងខ្ពស់នោះទេនៅក្នុងរដ្ឋាភិបាលរបស់លោក Imran Khan តម្លៃនៅធម្មតា។ អ្នកតវ៉ានិយាយថា យើងនឹងនាំយកលោក Imran Khan ត្រឡប់មកវិញម្ដងទៀត។ លោក Khan បានបម្រើការជានាយករដ្ឋមន្ត្រីអស់រយៈពេលជាង 3ឆ្នាំកន្លះរហូតដល់លោកត្រូវបានបណ្តេញចេញពីតំណែង ដោយការបោះឆ្នោតដកសេចក្តីទុកចិត្តពីសភាកាលពីខែមេសា។ ចាប់តាំងពីពេលនោះមកលោក Khan បានធ្វើបាតុកម្មជាមួយមនុស្សរាប់ពាន់នាក់នៅទូទាំងប្រទេស។ លោកបានអះអាងថា ទីក្រុងវ៉ាស៊ីនតោនជំទាស់លោក ដោយសារតែនយោបាយការបរទេសឯករាជ្យរបស់លោកដែលគាំទ្រប្រទេសចិន និងរុស្ស៊ី។
លោកត្រូវបានគេរិះគន់ ចំពោះដំណើរទស្សនកិច្ចដែលលោកបានធ្វើកាលពីថ្ងៃទី24 ខែកុម្ភៈទៅកាន់ទីក្រុងមូស្គូ ជាកន្លែងដែលលោកបានជួបជាមួយលោកប្រធានាធិបតី Vladimir Putin ខណៈរថក្រោះរុស្ស៊ីបានរុលចូលទៅក្នុងប្រទេសអ៊ុយក្រែន។ ក្រសួងការបរទេសសហរដ្ឋអាមេរិកបានបដិសេធ ការជាប់ពាក់ព័ន្ធក្នុងនយោបាយផ្ទៃក្នុងរបស់ប្រទេសប៉ាគីស្ថាន៕
