ភ្នំពេញ៖ ទំហំទឹកប្រាក់នៃពាណិជ្ជកម្មទ្វេរភាគី រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន បានឡើងដល់ចំនួន ៦,៩៧១ លានដុល្លារអាមេរិកក្នុងរយៈពេល៧ខែដំបូងនៃឆ្នាំ២០២២នេះ បើប្រៀបធៀបនឹងអំឡុងពេលដូចគ្នាកាលពីឆ្នាំមុនគឺកើនបាន ១៥.៦ភាគរយ។
យោងតាមរបាយការណ៍របស់ អគ្គនាយកដ្ឋានគយ និងរដ្ឋករនៃក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា នៅអំឡុងពេលខែមករា ដល់ខែកក្កដា កម្ពុជាបានធ្វើការនាំចេញទំនិញដែលស្មើនឹងទឹកប្រាក់ប្រមាណ ៧០១ លានដុល្លារអាមេរិកទៅកាន់ប្រទេសចិន បើធៀបទៅនឹងស្ថិតិប្រចាំឆ្នាំមានការធ្លាក់ចុះប្រហែល១៥ភាគរយ។ ខណៈពេលដែល ការនាំចូលទំនិញពីប្រទេសចិនចូលមកក្នុងព្រះរាជាណាចក្រកម្ពុជាមានការកើនឡើង ២០ភាគរយ ដោយគិតជាទឹកប្រាក់មានចំនួន ៦,២៧០ លានដុល្លារអាមេរិក។
ភាគច្រើនទំនិញដែលនាំចេញពីកម្ពុជាទៅប្រទេសចិន គឺជា ផលិតផលកសិកម្មដែលរួមមាន អង្ករ, ស្វាយ, ចេក, ដំឡូងមី ដោយនាំចូលមកវិញនូវ ផលិតផលឧស្សាហកម្ម, វត្ថុធាតុដើម និងគ្រឿងសំណង់ពីប្រទេសចិន។
ប្រភព៖ ក្រសួងព័ត៌មាន
ប្រែសម្រួល៖ សូរីយ៉ាភ័ណ្ឌ
