លោក Blinken បាននិយាយនៅក្នុងពីធីសម្ពោធបើកការដ្ឋានសាងសង់អគារស្ថានទូតថ្មីនេះថា «ឱកាសនេះ គឺមានរយៈពេលច្រើនឆ្នាំមកហើយនៅក្នុងការបង្កើតឡើង ហើយវាគឺជាការលះបង់ក្នុងកម្រិតខ្ពស់បំផុតជាមួយនឹងការយកចិត្តទុកដាក់ និងប្រកបដោយភាពច្នៃប្រឌិត និងការជំរុញទឹកចិត្តដែលមិនអាចគណនាបានរវាងអ្នកកាតទូតអាមេរិក និងវៀតណាម»។
អគារស្ថានទូតថ្មីនៅទីក្រុងហានូយនេះ ត្រូវបានសាងសង់ឡើងនៅលើផ្ទៃដី៣,២ហិកតា នឹងមានកុងត្រាជួលរយៈពេល៩៩ឆ្នាំ។
រដ្ឋមន្ត្រីការបរទេសអាមេរិកបានលើកឡើងថា អគារស្ថានទូតថ្មី គឺតំណាងឲ្យជំហានដ៏សំខាន់មួយទៀត ឆ្ពោះទៅរកការពង្រឹងភាពជាដៃគូដ៏សំខាន់រវាងប្រជាជាតិ និងប្រជាជនអាមេរិក និងវៀតណាម។
សំណង់អគារស្ថានទូតនេះ ត្រូវបានរំពឹងថា នឹងប្រើពេល៦ឆ្នាំដើម្បីសាងសង់រួចរាល់ ដោយមានបង្កើតការងារប្រមាណ ១៨០០កន្លែង។
គួរបញ្ជាក់ថា ប្រទេសវៀតណាម និងអាមេរិកមានការពង្រីកទំនាក់ទំនងទ្វេភាគីកាន់តែទូលំទូលាយគិតតាំងពីឆ្នាំ២០១៣មក ហើយថ្មីៗនេះ ប្រមុខដឹកនាំប្រទេសទាំងពីរ គឺលោក ង្វៀន ភូជុង អគ្គលេខាបក្សកុម្មុយនិស្ដវៀតណាម និងលោកចូ បៃឌិន ប្រធានាធិបតីវៀតណាមក៏បានជួបពិភាក្សាការងារតាមរទូរសព្ទ អំពីការពង្រឹងទំនាក់ទំនងកាន់តែជិតស្និទ្ធរវាងប្រទេសទាំងពីរ។
កាលពីឆ្នាំ២០២២ វៀតណាម និងអាមេរិក មានទំហំពាណិជ្ជកម្មសរុបជាង ១២៣ ពាន់លានដុល្លារ កើនឡើង១១% ធៀបនឹងឆ្នាំ២០២១។ អាមេរិក គឺជាទីផ្សារនាំចេញធំបំផុត និងជាដៃគូពាណិជ្ជកម្មធំបំផុតទី២របស់វៀតណាម។ ការវិនិយោគផ្ទាល់ពីសហរដ្ឋអាមេរិកទៅកាន់វៀតណាម មានប្រមាណ ១១ពាន់លានដុល្លារ ជាមួយគម្រោងវិនិយោគ ១២០០គម្រោង នាំឲ្យអាមេរិកឈរលំដាប់លេខរៀងទី១១ ក្នុងចំណោមប្រទេស និងដែនដីដែលមានការវិនិយោគផ្ទាល់ច្រើនបំផុតនៅវៀតណាម។ នេះបើតាមសេចក្ដីរាយការណ៍ពីសារព័ត៌មាន VN Express។
ប្រភពព័ត៌មានដដែលបន្ថែមថា វៀតណាមក៏មាននិស្សិត៣ម៉ឺននាក់ កំពុងសិក្សានៅអាមេរិក ដែលមានមានរួចំណែកប្រមាណ១ពាន់លានដុល្លារទៅក្នុងសេដ្ឋកិច្ចរបស់អាមេរិកផងដែរ៕
