ប្រធានាធិបតីប្រទេសអេក្វាឌ័រ លោក ហ្គីយើម៉ូ ឡាស្សូ បាននិយាយបន្ទាប់ពីពិធីចុះហត្ថលេខាលើកិច្ចព្រមព្រៀងពាណិជ្ជកម្មសេរីកាលពីល្ងាចថ្ងៃពុធសប្ដាហ៍មុនថា លោកត្រូវតែបង្ហាញពីសេចក្តីរីករាយដ៏ធំធេងចំពោះការសម្រេចបានកិច្ចព្រមព្រៀងពាណិជ្ជកម្មសេរីរវាងប្រទេសអេក្វាឌ័រនិងប្រទេសចិន។ នេះបើយោងតាមទីភ្នាក់ងារសារព័ត៌មានចិនស៊ីនហួ។
ដោយផ្អែកតាមក្រសួងពាណិជ្ជកម្មចិន ស៊ីនហួបានឱ្យដឹងថា កិច្ចព្រមព្រៀងនេះត្រូវបានចុះហត្ថលេខាដោយរដ្ឋមន្ត្រីពាណិជ្ជកម្មចិនលោក វ៉ាង វិនតៅ និងសមភាគីអេក្វាឌ័រ លោក ហ្ស៊ូលីយ៉ូ ប្រាដូ តាមរយៈវីដេអូ បន្ទាប់ពីបានចរចាគ្នាអស់រយៈពេលមួយឆ្នាំ។
ទីភ្នាក់ងារសារព័ត៌មានចិនបានស្រង់សម្ដីរបស់លោក ឡាសូ ដែលបាននិយាយថា៖ «កិច្ចព្រមព្រៀងពាណិជ្ជកម្មសេរីនេះនឹងប្រែក្លាយទៅជាសុខុមាលភាពសម្រាប់ប្រជាពលរដ្ឋ ការអភិវឌ្ឍ និងប្រាក់ចំណូលបន្ថែមសម្រាប់ពលរដ្ឋរាប់ពាន់គ្រួសារ»។ លោកបានបន្ថែមក្នុងសម្ដីផ្ទាល់ថា៖ «ប្រទេសទាំងទទួលបានផលប្រយោជន៍ទៅវិញទៅមកតាមរយៈកិច្ចព្រមព្រៀងនេះ»។
នៅក្នុងសន្និសីទសារព័ត៌មាន ប្រធានាធិបតីអេក្វាឌ័រ បានហៅកិច្ចព្រមព្រៀងនេះថា«ជាប្រវត្តិសាស្ត្រ»។ នេះបើតាមស៊ីនហួ ដែលបានស្រង់សម្ដីរបស់លោក ឡាសូ មកផ្សាយថា៖ «កិច្ចព្រមព្រៀងនេះគិតគូរពីផលប្រយោជន៍នៃប្រទេសទាំង២ និងពង្រីកឱកាសសម្រាប់កិច្ចសហប្រតិបត្តិការរួមគ្នាដើម្បីសម្រេចបាននូវការអភិវឌ្ឍប្រកបដោយចីរភាពបន្ថែមទៀតសម្រាប់ប្រទេសរបស់ពួកយើងនាពេលបច្ចុប្បន្ននិងអនាគត»។
ទន្ទឹមនឹងនេះ យោងតាមប្រភពដដែល រដ្ឋមន្ត្រីពាណិជ្ជកម្មក្រៅប្រទេសអេក្វាឌ័រ លោក ហ្ស៊ូលីយ៉ូ ប្រាដូ បាននិយាយថា កិច្ចព្រមព្រៀងពាណិជ្ជកម្មសេរីជាមួយចិនបានដាក់ប្រទេសអេក្វាឌ័រនៅលើផែនទីអាស៊ី ហើយធ្វើឱ្យប្រទេសចិនក្លាយជាអ្នកផ្គត់ផ្គង់ធំបំផុតរបស់អេក្វាឌ័រនូវទំនិញប្រើប្រាស់ វត្ថុធាតុដើម និងទំនិញមូលធន ដែលនឹងរួមចំណែកដល់ការលើកកម្ពស់ការប្រកួតប្រជែងនៃឧស្សាហកម្មរបស់អេក្វាឌ័រ។
ស៊ីនហួបានបន្តតាមសម្ដីរបស់លោក ប្រាដូ ទៀតថា ប្រទេសចិនគឺជាទីផ្សារឈានមុខគេរបស់ពិភពលោកដែលមានអ្នកប្រើប្រាស់ច្រើនជាង ១,៤ ប៊ីលាននាក់។ អាស្រ័យហេតុនេះ កិច្ចព្រមព្រៀងខាងលើមានការចាប់អារម្មណ៍យ៉ាងខ្លាំងសម្រាប់វិស័យនាំចេញ ផលិតភាព និងអ្នកប្រើប្រាស់ ព្រមទាំងជាអាជីវកម្មដ៏ល្អសម្រាប់មនុស្សគ្រប់គ្នាផងដែរ។
លោក ប្រាដូ បាននិយាយទៀតថា តាមទស្សនៈនៃការនាំចេញ សក្តានុពលជាក់លាក់នៃកិច្ចព្រមព្រៀងពាណិជ្ជកម្មសេរីជាមួយចិន នឹងបន្ថែមទំហំប្រាក់ពាណិជ្ជកម្មពី ៣ ប៊ីលាន ទៅ ៤ ប៊ីលានដុល្លារអាមេរិកក្នុងពេល ១០ ឆ្នាំខាងមុខ ហើយថា ទស្សនវិស័យការងាររបស់ប្រទេសអេក្វាឌ័រក៏ត្រៀមនឹងទទួលបានអត្ថប្រយោជន៍ផងដែរ។ នេះបើតាមសេចក្ដីរាយការណ៍របស់ទីភ្នាក់ងារសារព័ត៌មានចិន៕
