កម្ពុជាបានបង្ហាញពីគម្រោងជួយប្រទេសទីម័រខាងកើតវិនិយោគ លើវិស័យស្រូវអង្ករ ខណៈអ្នកជំនាញរំពឹងស្រូវមានតម្លៃល្អ

កម្ពុជាបានបង្ហាញពីគម្រោងជួយប្រទេសទីម័រខាងកើតលើសន្តិសុខស្បៀងអាហារ តាមរយៈការអនុញ្ញាតឲ្យប្រទេសមួយនេះវិនិយោគ១០០% លើការបង្កើតរោងម៉ាស៊ីនកិនស្រូវ កន្លែងស្តុកស្រូវ និងបង្កើតបណ្តាញប្រមូលទិញស្រូវនៅកម្ពុជា ដើម្បីផលិតអង្ករសម្រាប់នាំចេញទៅផ្គត់ផ្គង់នៅទីម័រខាងកើត។ លើសពីនេះ កម្ពុជាក៏គ្រោងបញ្ជូនមន្ត្រីជំនាញផ្នែកកសិកម្មទៅជួយផ្តល់បច្ចេកទេស និងសិក្សាពីសក្តានុពលក្នុងការធ្វើកសិកម្មនៅប្រទេសនេះផងដែរ។

នាយករដ្ឋមន្ត្រីនៃកម្ពុជាបានសន្យានៅចំពោះមុខថ្នាក់ដឹកនាំប្រទេសទីម័រខាងកើតកាលពីពេលថ្មីៗថា កម្ពុជានឹងជួយទីម័រខាងកើតពាក់ព័ន្ធនឹងបញ្ហាសន្តិសុខស្បៀងអាហារ ក្រោយសម្តេចមើលឃើញថា ប្រទេសនេះមានការពឹងផ្អែកខ្លាំងលើការនាំចូលស្បៀងអាហារពីក្រៅប្រទេស។ ក្នុងនោះសម្តេចតេជោ មានគម្រោងអនុញ្ញាតឲ្យប្រទេសទីម័រខាងកើត ដែលមានផ្ទៃដីភាគច្រើនគ្របដណ្តប់ដោយភ្នំ វិនិយោគ១០០%លើការបង្កើតរោងម៉ាស៊ីនកិនស្រូវ កន្លែងស្តុកស្រូវ និងបង្កើតបណ្តាញប្រមូលទិញស្រូវនៅកម្ពុជា ដើម្បីផលិតអង្ករសម្រាប់នាំចេញទៅផ្គត់ផ្គង់នៅទីម័រខាងកើតដោយខ្លួនឯង។ ត្រង់ចំណុចនេះ សម្តេចតេជោ អះអាងនៅចំពោះមុខថ្នាក់ដឹកនាំទីម័រខាងកើតថា ពុំទាន់មានប្រទេសណាមួយធ្វើបែបដូចកម្ពុជានោះទេ។

មួយវិញទៀត សម្តេចតេជោ ហ៊ុន សែន គ្រោងជួយទីម័រខាងកើតតាមរយៈជួយផ្តល់ជាបច្ចេកទេសក្នុងការធ្វើកសិកម្មតាមរយៈការបញ្ជូនមន្ត្រីជំនាញផ្នែកកសិកម្មរបស់កម្ពុជាទៅកាន់ប្រទេសនេះ និងជួយសិក្សាពីសក្តានុពលផ្ទៃដីកសិកម្មរបស់ប្រទេសនេះ ថាតើវាអាចសមស្របនឹងដំណាំប្រភេទអ្វី។ បើតាមការគូសបញ្ជាក់របស់សម្តេចតេជោ គម្រោងជួយទាំងនេះនឹងអាចដឹងបន្ទាប់ពីការបោះឆ្នោតនៅទីម័រខាងកើតនៅប៉ុន្មានថ្ងៃខាងមុខនេះត្រូវបានបញ្ចប់។