លោកឧបនាយករដ្ឋមន្ដ្រីលោក ស ខេង រដ្ឋមន្ត្រីក្រសួងមហាផ្ទៃបានលើកឡើងថា កិច្ចសហប្រតិបត្តិការរវាងក្រសួងមហាផ្ទៃ ជាមួយនឹងបារាំង ក៏ដូចជាសហព័ន្ធអាល្លឺម៉ង់មានលទ្ធផលល្អប្រសើរ ពិសេសការគាំទ្រកំណែទម្រង់រដ្ឋបាលមូលដ្ឋាន ឬហៅថាវិមជ្ឈការ និងវិសហមជ្ឈការ។
លោក ស ខេង បានលើកឡើងដូចនេះ ក្នុងឱកាសលោកអនុញ្ញាតឱ្យលោកJacques PETTET ឯកអគ្គរដ្ឋទូត បារាំង និងលោកStefan Messererឯកអគ្គរដ្ឋទូត អាល្លឺម៉ង់ ប្រចាំកម្ពុជា ចូលជួបពិភាក្សាការងារនៅវិមានសន្តិភាព នៅព្រឹកថ្ងៃទី៥ ខែមិថុនា ឆ្នាំ២០២៣។
លោកបានលើកឡើងតាមរយៈហ្វេសប៊ុកលោកដោយបានស្វាគមន៍ចំពោះអគ្គរដ្ឋទូតសាធារណរដ្ឋបារាំងនិងអគ្គរដ្ឋទូតសាធារណរដ្ឋសហព័ន្ធអាល្លឺម៉ង់ព្រមទាំងសម្ដែងក្ដីរីករាយដែលបានជួបពិភាក្សាការងារជាមួយមន្ត្រីទូតទាំង២ជាបន្តបន្ទាប់នៅក្នុងអាណត្ដិបេសកកម្មការទូតនៅកម្ពុជា។
លោកបានថ្លែងអំណរគុណផងដែរចំពោះសាធារណរដ្ឋបារាំង និងសាធារណរដ្ឋសហព័ន្ធអាល្លឺម៉ង់ ដែលតែងជួយគាំទ្រក៏ដូចជាការលើកកម្ពស់កិច្ចសហប្រតិបត្តិការរវាងកម្ពុជា និងបារាំង កម្ពុជា និងអាល្លឺម៉ង់ បានយ៉ាងល្អប្រសើរក្នុងរយៈពេលជាច្រើនទសវត្សរ៍កន្លងមក។
លោកមានប្រសាសន៍ទៀតថា ៖ «សម្រាប់កិច្ចសហប្រតិបត្តិការរវាងក្រសួងមហាផ្ទៃ ជាមួយនឹងផ្នែកពាក់ព័ន្ធរបស់បារាំង ក៏ដូចជាសហព័ន្ធអាល្លឺម៉ង់វិញ ក៏មានលទ្ធផលល្អប្រសើរផងដែរ ពិសេសការគាំទ្រកំណែទម្រង់រដ្ឋបាលមូលដ្ឋាន ឬហៅថាវិមជ្ឈការ និងវិសហមជ្ឈការ»។
តាមរយៈក្រសួងមហាផ្ទៃ អគ្គរដ្ឋទូតបារាំងលោក Jacques PETTET ក៏បានលើកឡើងដែរថាជាការពិត បារាំង និងអាល្លឺម៉ង់ គឺជាដៃគូសហការមួយដ៏ល្អជាមួយរាជរដ្ឋាភិបាលកម្ពុជា ក្នុងនោះប្រទេសទាំង២បានគាំទ្រលើវិស័យពាក់ព័ន្ធនានាដល់កម្ពុជារយៈពេលប្រមាណជាង៣០ឆ្នាំមកហើយ។
នាឱកាសនោះដែរអគ្គរដ្ឋទូតប្រទេសទាំង២ក៏បានលើកឡើងពីកិច្ចការសំខាន់ៗចំនួន៣ ដើម្បីជជែកពិភាក្សាជាមួយលោក ស ខេង ផងដែរ ក្នុងនោះមានការពាក់ព័ន្ធទៅនឹងដំណើរការ និងការត្រៀមការបោះឆ្នោតជាតិ, ពាក់ព័ន្ធនឹងការចូលរួមចំណែករបស់អង្គការសង្គមស៊ីវិល ក្នុងនោះក៏មានអង្គការសង្គមស៊ីវិលរបស់បារាំងនិងអាល្លឺម៉ង់ ក្នុងដំណើរការអភិវឌ្ឍន៍សង្គមកម្ពុជា។
ចំណែកឯកិច្ចការសំខាន់ទី៣ ដែលភាគីទាំង៣លើកឡើងសម្រាប់ការជជែកពិភាក្សាគ្នាដែរនោះ គឺពាក់ព័ន្ធទៅនឹងដំណើរការកសាងក្របខ័ណ្ឌគតិយុត្ត ស្ដីពី កិច្ចសហប្រតិបត្តិការ លើវិស័យអនុវត្តច្បាប់។
ពាក់ព័ន្ធនឹងដំណើរការនៃការត្រៀមលក្ខណៈឆ្ពោះទៅកាន់ការបោះឆ្នោត លោក ស ខេង បានថ្លែងថាប្រាប់ឯកអគ្គរដ្ឋទូតទាំង២ ថាមកដល់ពេលនេះមានគណបក្សនយោបាយចំនួន១៨ បានត្រៀមចូលរួមប្រកួតប្រជែងនៅក្នុងការបោះឆ្នោតនាពេលខាងមុខ។
លោកមានប្រសាសន៍ថា៖ «ឆ្លងតាមបទពិសោធន៍ការបោះឆ្នោតបន្តបន្ទាប់ដែលកម្ពុជាបានអនុវត្ត ឃើញថាការងារថែរក្សា សន្តិសុខ សណ្ដាប់ធ្នាប់សាធារណៈមានភាពល្អប្រសើរពីការបោះឆ្នោតមួយទៅការបោះឆ្នោតមួយ ទាំងការថែរក្សាបានបរិយាកាស សន្តិសុខ និងគ្មានអំពើហិង្សា»។
លោករដ្ឋមន្ត្រី ស ខេង ក៏បានបង្ហាញសុទិដ្ឋិនិយមចំពោះ បរិយាកាសសន្តិសុខ បម្រើដល់ការបោះឆ្នោតនាពេលខាងមុខក៏ដូចជាការបោះឆ្នោតបន្តបន្ទាប់នាពេលអនាគតផងដែរ៕
