ឥណ្ឌូណេស៊ីបើកនាវាកងទ័ពជើងទឹកពហុភាគី ចំពេលមានភាពតានតឹងនៅតំបន់អាស៊ីប៉ាស៊ីហ្វិក

ឥណ្ឌូណេស៊ី កាលពីថ្ងៃចន្ទទី៥ ខែមិថុនា បានធ្វើសមយុទ្ធកងទ័ពជើងទឹកពហុភាគីនៅក្នុងដែនទឹករបស់ខ្លួន រួមជាមួយនឹងកងទ័ពជើងទឹកមកពីប្រទេសនានា រួមមាន៖ សហរដ្ឋអាម៉េរិក អង់គ្លេស ចិន ជប៉ុន រុស្ស៊ី និងកូរ៉េខាងត្បូង ចំពេលមានភាពតានតឹងនៅក្នុងតំបន់អាស៊ីប៉ាស៊ីហ្វិក។កងទ័ពជើងទឹកឥណ្ឌូណេស៊ី បាននិយាយនៅក្នុងសេចក្តីថ្លែងការណ៍មួយថា សមយុទ្ធ កូមូដូ Komodo គឺជាសមយុទ្ធមិនមែនសង្គ្រាម ដែលមានគោលបំណងពង្រឹងទំនាក់ទំនងរវាងកងទ័ពជើងទឹកនៃប្រទេសចំនួន៣៦។ សមយុទ្ធនេះ កើតឡើងនៅពេលដែលចិន និងសហរដ្ឋអាម៉េរិក បង្កើនការទូតផ្នែកយោធានៅក្នុងតំបន់ ដោយរៀបចំល្បែងសង្រ្គាមញឹកញាប់ជាងមុនជាមួយសម្ព័ន្ធមិត្ត និងដៃគូជុំវិញតៃវ៉ាន់ និងនៅក្នុងផ្លូវទឹកដ៏មមាញឹកនៃសមុទ្រចិនខាងត្បូង និងប៉ាស៊ីហ្វិកខាងលិច។ សមយុទ្ធនេះក៏ត្រូវបានធ្វើឡើងបន្ទាប់ពីឧប្បត្តិហេតុ កាលពីចុងសប្តាហ៍នៅច្រកសមុទ្រតៃវ៉ាន់ ដែលកងនាវាចរអាម៉េរិកបាននិយាយថា នាវាចម្បាំងចិនបានធ្វើដំណើរកាត់ពីមុខនាវាពិឃាតអាម៉េរិក ក្នុងអន្តរកម្មដ៏គ្រោះថ្នាក់។កងនាវាចរឥណ្ឌូណេស៊ីបានបន្ថែមថា នាវាចំនួន១៥គ្រឿង រួមទាំងពីប្រទេសចិន និងរុស្ស៊ី បានទម្លាក់យុថ្កានៅជិតកោះ ស៊ូឡាវ៉េស៊ី Sulawesi កាលពីថ្ងៃចន្ទ ខណៈដែលសមយុទ្ធ Komodo បានចាប់ផ្តើម។ ប្រព័ន្ធផ្សព្វផ្សាយរដ្ឋរបស់ចិន CCTV បានរាយការណ៍កាលពីថ្ងៃចន្ទថា កងទ័ពជើងទឹកចិន បានបញ្ជូននាវាពិឃាត ហ្សាងជៀង Zhanjiang និងនាវាចម្បាំង ស៊ូឆាង Xuchang ដែលបំពាក់ដោយមីស៊ីលតម្រង់ទិស ក្នុងអំលុងពេលធ្វើសមយុទ្ធនោះ។ គួរបញ្ជាក់ថា សមយុទ្ធ Komodo ឆ្នាំនេះ គឺជាសមយុទ្ធកងទ័ពជើងទឹករួមគ្នាលើកទីបួន ដែលឥណ្ឌូណេស៊ីធ្វើម្ចាស់ផ្ទះ ចាប់តាំងពីការធ្វើសមយុទ្ធលើកដំបូងក្នុងឆ្នាំ២០១៤៕