ឯកឧត្តម តុប សុភ័ក្រ អ្នកនាំពាក្យនៃក្រសួងទេសចរណ៍ បានគូសបញ្ជាក់ថា ស្ថានភាពវិស័យទេសចរណ៍កម្ពុជានៅរយៈពេលជិតពាក់កណ្តាលឆ្នាំ២០២៣នេះ ហាក់មានភាពល្អប្រសើរជាធម្មតា បើទោះបីជាបច្ចុប្បន្នកំពុងស្ថិតនៅក្នុងរដូវកាលទេសចរថមថយ ដោយសារតែជារដូវវស្សាក៏ដោយ។ ជាក់ស្តែងនៅរយៈពេល៥ខែដើមឆ្នាំ២០២៣នេះ កម្ពុជាទទួលបានភ្ញៀវទេសចរអន្តរជាតិសរុបប្រមាណ ២លាន១៦ម៉ឺននាក់ កើនឡើង ៥៣៥% ធៀបនឹងរយៈពេលដូចគ្នាឆ្នាំ២០២២ រីឯទេសចរក្នុងស្រុកមានប្រមាណ ១០លាននាក់ផងដែរ។ ក្នុងចំណោមទេសចរអន្តរជាតិ ដែលចូលមកកម្ពុជាទាំងអស់ ទេសចរជនជាតិថៃឈរនៅលំដាប់ទី១ រួមចំណែកជាង ៣៣% បន្ទាប់មកគឺទេសចរវៀតណាម រួមចំណែកជាង១៧% និងទី៣គឺទេសចរជនជាតិចិន ដែលមានចំនួនជាង ២២ម៉ឺននាក់ ដែលបានរួមចំណែក ប្រមាណជាង ១០% នៃទេសចរអន្តរជាតិសរុបរបស់កម្ពុជា។
តាមសម្ទុះនៃកំណើនទេសចរអន្តរជាតិនៅរយៈពេល៥ខែនេះ ឯកឧត្តម តុប សុភ័ក្រ អះអាងថា ហាក់មិនមានអ្វីចោទជាបញ្ហានោះទេសម្រាប់កម្ពុជាក្នុងការទាក់ទាញទេសចរអន្តរជាតិប្រមាណ ៤លាននាក់នៅពេញមួយឆ្នាំ២០២៣នេះ ហើយនៅឆ្នាំ២០២៦ ស្ថានភាពវិស័យទេសចរណ៍កម្ពុជានឹងអាចត្រលប់ដូចទៅមុនពេលកូវីដ១៩វិញ ដែលរំពឹងថា អាចទទួលបានទេសចរអន្តរជាតិប្រមាណ៧លាននាក់។ជុំវិញរឿងនេះដែរ ជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានបញ្ជាក់ឱ្យដឹងថា ស្ថានភាពសេដ្ឋកិច្ចលើពិភពលោកបច្ចុប្បន្នស្ថិតក្នុងភាពមិនទាន់ច្បាស់លាស់បែបនេះ ប្រាកដណាស់វាបានប៉ះពាល់ដល់វិស័យទេសចរណ៍ពិភពលោក រួមទាំងកម្ពុជា ដ្បិតទេសចរណ៍នៅកម្ពុជាទើបតែឈានជើងងើបឡើងវិញជាបណ្តើរៗប៉ុណ្ណោះ។ ទោះយ៉ាងណាក៏ដោយចុះ សម្រាប់ពេញមួយឆ្នាំ២០២៣នេះ អ្នកជំនាញរូបនេះនៅតែបង្ហាញនូវក្តីរំពឹងខ្ពស់ថា កម្ពុជានៅតែអាចទទួលបានទេសចរអន្តរជាតិប្រមាណ៤លាននាក់ផងដែរ។ ជំទាវ ឆាយ ស៊ីវលីន បញ្ជាក់ដែរថា ចំពោះស្ថានភាពទេសចរជនជាតិចិនដែលចូលមកកម្ពុជាបច្ចុប្បន្នវិញ ហាក់មិនមានការប្រែប្រួលគួរឱ្យកត់សម្គាល់នោះទេ ពោលគឺមានក្នុងរង្វង់ប្រមាណ ១០០០នាក់ ទៅ១៧០០នាក់ ក្នុងមួយថ្ងៃៗ។
សូមបញ្ជាក់ថា កាលពីឆ្នាំ២០២២ កម្ពុជាទទួលបានទេសចរអន្តរជាតិសរុបជិត២លាន៣សែននាក់ កើនឡើងជាង១០០០% បើធៀបនឹងឆ្នាំ២០២១។ ក្នុងនោះ ភ្ញៀវទេសចរថៃឈរលើកំពូលតារាង ដែលមានជាង៨៥ម៉ឺននាក់ វៀតណាមមានជាង៤៦ម៉ឺននាក់ និងចិនមានជាង១០ម៉ឺននាក់ រួមទាំងទេសចរមកពីបណ្ដាប្រទេសជាច្រើនទៀត។ នេះតាមទិន្នន័យពីក្រសួងទេសចរណ៍៕
