រដ្ឋាភិបាលចាំផ្ទះថៃកំពុងតែខិតខំធ្វើយ៉ាងណាជំរុញការនាំចេញចេកស្រស់ទៅកាន់ប្រទេសជប៉ុន ខណៈដែលមានសេចក្តីរាយការណ៍ថា ផលិតផលចេកស្រស់និងចេកកែច្នៃចេញពីថៃ កំពុងតែទទួលបានការចាប់អារម្មណ៍ខ្ពស់នៅក្នុងទីផ្សារប្រទេសជប៉ុនដែលមានសេដ្ឋកិច្ចធំទី៣នៅលើពិភពលោក។ តាមការរំពឹងទុក ថៃនឹងបង្កើនប្រាក់ចំណូលពីការនាំចេញចេកទៅទីផ្សារនេះដល់ជិត ៣១ លានដុល្លារ ខណៈដែលជប៉ុននាំចូលចេកនៅក្នុងមួយឆ្នាំប្រមាណជា ១ លានតោន។
អ្នកនាំពាក្យរដ្ឋាភិបាលថៃចាំផ្ទះ លោក អានុចា ប៊ូរ៉ាផាចៃស៊្រី (Anucha Burapachaisri) បាននិយាយកាលពីថ្ងៃព្រហស្បតិ៍ថា ការនាំចេញចេកស្រស់របស់ថៃ និងផលិតផលកែច្នៃរបស់កសិករ ទៅកាន់ទីផ្សារនៅក្នុងប្រទេសជប៉ុន ត្រូវបានគេរំពឹងថានឹងបង្កើតប្រាក់ចំណូលរហូតដល់ជាង ១ ពាន់លានបាត ឬប្រមាណជាជិត ៣១ លានដុល្លារ។
លោកបាននិយាយថា នាយករដ្ឋមន្ត្រីចាំផ្ទះ ឧត្តមសេនីយ៍ ប្រាយុទ្ធ ចាន់អូចា រីករាយដែលចេកស្រស់និងផលិតផលកែច្នៃរបស់ថៃ កំពុងតែមានប្រជាប្រិយភាពនៅក្នុងទីផ្សារនានានៅប្រទេសជប៉ុន។
លោកបានបន្ថែមថា ថៃអាចប្រើសិទ្ធិក្រោមកិច្ចព្រមព្រៀងភាពជាដៃគូសេដ្ឋកិច្ចជប៉ុន-ថៃ ដើម្បីពង្រីកការនាំចេញចេក។ កិច្ចព្រមព្រៀងនេះបានលើកលែងការយកពន្ធពីប្រទេសថៃ លើការនាំចេញចេកទៅកាន់ប្រទេសជប៉ុនចំនួន ៨ ពាន់តោន។
លោក អានុចា បាននិយាយថា ផ្លែឈើដែលពោរពេញដោយសារធាតុចិញ្ចឹមនេះ គឺមានប្រជាប្រិយភាពនៅក្នុងប្រទេសជប៉ុន ដោយសារតែវាមិនត្រឹមតែជាអាហារសម្រន់ដែលមានរសជាតិឆ្ងាញ់ និងផ្តល់សុខភាពល្អប៉ុណ្ណោះទេ ប៉ុន្តែក៏អាចប្រើប្រាស់ជាគ្រឿងផ្សំនៅក្នុងបង្អែមជាច្រើនផងដែរ ។
លោកបានបន្តថា ទោះជាចេកអាចដាំបាននៅប្រទេសជប៉ុនក៏ដោយ ប៉ុន្តែទិន្នផលមានកម្រិតទាប ដោយសារតែកត្តាអាកាសធាតុ។ លោកបានបន្ថែមថា ប្រទេសជប៉ុននាំចូលចេកជាង ១ លានតោនក្នុងមួយឆ្នាំ។
អ្នកនាំពាក្យរដ្ឋាភិបាលថៃដដែលបានបញ្ជាក់ថា ប្រទេសថៃនឹងអាចនាំចេញផ្លែចេកកាន់តែច្រើនទៅប្រទេសជប៉ុន ដោយលោកបានបន្ថែមថា រដ្ឋាភិបាលបានរៀបចំផែនការជំរុញផលិតភាពរបស់កសិករថៃ៕
