ក្រសួងសេដ្ឋកិច្ច និងហិរញ្ញវត្ថុកូរ៉េខាងត្បូងបាននិយាយនៅក្នុងរបាយការណ៍មួយថា នាពេលថ្មីៗនេះសេដ្ឋកិច្ចកូរ៉េខាងត្បូងបានមើលឃើញថា ថ្លៃទំនិញនៅប្រទេសនេះបានបន្តធ្លាក់ចុះជាបណ្ដើរៗហើយ ប៉ុន្តែការធ្លាក់ចុះសេដ្ឋកិច្ចនៅតែបន្តមាន ដោយសារតែការនាំចេញ និងវិស័យឧស្សាហកម្មបានថយចុះ។
កំណើនតម្លៃទំនិញប្រើប្រាស់របស់កូរ៉េខាងត្បូងបានធ្លាក់ចុះក្នុងរយៈពេល៤ខែជាប់ៗគ្នា បើគិតមកដល់ខែឧសភា បើធៀបនឹងពេលដូចគ្នាកាលពីឆ្នាំមុន ដោយអត្រាអតិផរណាមានកម្រិត ៣,៣%។ ប៉ុន្តែអត្រានេះនៅតែបង្ហាញថាអតិផរណារបស់ប្រទេសកូរ៉េខាងត្បូងខ្ពស់ជាងកម្រិតគោលដៅ។
ការនាំចេញបានធ្លាក់ចុះកាលពីខែឧសភាក្នុងអត្រាជាង ១៥% បើធៀបនឹងពេលដូចគ្នាកាលពីឆ្នាំមុន។ នេះជាការធ្លាក់ចុះរយៈពេល៨ខែជាប់ៗគ្នា ដោយសារការនាំចេញគ្រឿងអេឡិចត្រូនិកដែលជាទំនិញនាំចេញដ៏សំខាន់របស់ប្រទេសនេះ បានធ្លាក់ចុះជាង ៣៦% ខណៈតម្រូវការធ្លាក់ចុះ។
ក្រសួងសេដ្ឋកិច្ចកូរ៉េខាងត្បូងបានលើកឡើងពីការធ្លាក់ចុះសេដ្ឋកិច្ចនេះនៅក្នុងរបាយការណ៍វាយតម្លៃប្រចាំខែ គឺ«សៀវភៅបៃតង»សម្រាប់ខែទី៥នៃការធ្លាក់ចុះសេដ្ឋកិច្ចជាប់ៗគ្នា។
ក្រសួងនេះបានបន្ថែមថា ទោះជាយ៉ាងណាក៏ដោយចុះ ការស្ទុះងើបឡើងវិញបន្តិចម្តងៗនូវការប្រើប្រាស់ក្នុងស្រុក បានធ្វើឱ្យមានកំណើនសេដ្ឋកិច្ចល្អប្រសើរជាងមុន ហើយទីផ្សារការងារកាន់តែរឹងមាំ ដែលអាចកាត់បន្ថយហានិភ័យបានមួយកម្រិតផងដែរ។
ចំនួនការងារថ្មីនៅកូរ៉េខាងត្បូងបានធ្លាក់ចុះរយៈពេល ២ ខែជាប់ៗគ្នា បើគិតត្រឹមខែឧសភា បន្ទាប់ពីការស្ទុះងើបឡើងវិញបានមួយរយៈពេលខ្លីកាលពីខែមីនា ពេលមានភាពតានតឹងផ្នែកសេដ្ឋកិច្ច។ ទោះបីជាយ៉ាងនេះក្ដី អត្រាមានការងារធ្វើបានឈានដល់កម្រិតខ្ពស់។
សេដ្ឋកិច្ចកូរ៉េខាងត្បូងកំពុងប្រឈមមុខនឹងភាពមិនច្បាស់លាស់ ដោយសារកត្តាខាងក្រៅមួយចំនួន ជាពិសេសការរឹតបន្តឹងគោលនយោបាយរូបិយវត្ថុសកល និងជម្លោះអូសបន្លាយរវាងរុស្ស៊ី និងអ៊ុយក្រែន។
កាលពីសប្តាហ៍មុន អង្គការសម្រាប់កិច្ចសហប្រតិបត្តិការសេដ្ឋកិច្ចនិងការអភិវឌ្ឍ បានទម្លាក់កំណើនសេដ្ឋកិច្ចកូរ៉េខាងត្បូងឆ្នាំ២០២៣ នៅក្នុងការព្យាកររបស់ខ្លួន ឱ្យមកនៅត្រឹម ១,៥% វិញ ដោយលើកឡើងពីហេតុផលថាការនាំចេញទន់ខ្សោយ ហើយការវិនិយោគឯកជនក៏ធ្លាក់ចុះដែរ៕
