អ្នកជំនាញថាទីផ្សារអចលនទ្រព្យវៀតណាមនឹងមានសង្ឃឹមវិញចាប់ពីត្រីមាសទី៣

ដោយសារគោលនយោបាយកាត់បន្ថយអត្រាការប្រាក់បញ្ញើដោយធនាគាររដ្ឋវៀតណាម វិស័យអចលនៈទ្រព្យរបស់ប្រជាជាតិដែលមានពលរដ្ឋប្រហែល ១០០ លាននាក់នេះ ត្រូវបានគេរំពឹងថា កំពុងតែទទួលពន្លឺវិជ្ជមានឡើងវិញ។ សមាគមឈ្មួញកណ្តាលអចលនទ្រព្យវៀតណាម បានអះអាងថា វិធានការណ៍នេះជំរុញឱ្យពលរដ្ឋដកប្រាក់សន្សំដែលមានការប្រាក់ទាបទៅវិនិយោគនៅក្នុងទីផ្សារអចលនទ្រព្យដែលជាធម្មតាផ្ដល់ប្រាក់ចំណេញច្រើនជាងការវិនិយោគផ្សេងៗ។ នេះបើតាមសារព័ត៌មាន Vietnam News ។សមាគមឈ្មួញកណ្តាលអចលនទ្រព្យវៀតណាម បានឱ្យដឹងថា ការចេញសេចក្តីសម្រេចបន្ទាបអត្រាការប្រាក់បញ្ញើនាពេលថ្មីៗនេះដោយធនាគាររដ្ឋវៀតណាម អាចធ្វើឲ្យប្រាក់បញ្ញើសន្សំដែលមានតម្លៃរាប់សិបលានដុល្លារហូរចូលទៅក្នុងទីផ្សារអចលនទ្រព្យវិញ។ ក្រុមអ្នកវិភាគបានអះអាងថា គោលនយោបាយហិរញ្ញវត្ថុដែលកំណត់ដោយធនាគាររដ្ឋវៀតណាម នឹងអាចបណ្តាលឲ្យវិនិយោគិននៅក្នុងស្រុកស្វែងរកច្រកជ្រៀតចូលទៅក្នុងទីផ្សារអចលនទ្រព្យ ។ ពួកគេអះអាងថា រំហូរចេញនៃប្រាក់សន្សំពីធនាគារនានា អាចផ្តល់ជីវិតឱ្យទីផ្សារអចលនទ្រព្យ ព្រមទាំងឧស្សាហកម្មពាក់ព័ន្ធរាប់សិប ដែលរួមមានក្រុមហ៊ុនលក់សម្ភារសំណង់ គ្រឿងចក្រ គ្រឿងសង្ហារិម និងកម្លាំងពលកម្មដែលពឹងផ្អែកជាប្រពៃណីលើការរីកចម្រើននៃសេវាកម្មអចលនទ្រព្យ។

តាមការរំពឹងទុក នៅត្រីមាសទី២ នៃឆ្នាំ២០២៣ នេះ រដ្ឋាភិបាលវៀតណាម នឹងដាក់ចេញនូវ គោលនយោបាយមួយចំនួនបន្ថែមទៀត ដើម្បីផ្តល់ដង្ហើមដល់ទីផ្សារអចលនទ្រព្យ ។
សារព័ត៌មានដដែលបានរាយការណ៍ទៀតថា ដើម្បីជំរុញទីផ្សារអចលនទ្រព្យ អាជ្ញាធរមូលដ្ឋានត្រូវបានណែនាំឱ្យបង្កើនកិច្ចខិតខំប្រឹងប្រែងក្នុងការដោះស្រាយការកកស្ទះផ្លូវច្បាប់ ដើម្បីអនុញ្ញាតឱ្យគម្រោងអចលនទ្រព្យនានាដំណើរការ ហើយអ្នកអភិវឌ្ឈអាចនឹងបោះជំហានឆ្លើយតបនឹងតម្រូវការរបស់ទីផ្សារ។លោក ឃ្វៀន វ៉ាន់ឌិញ ( Nguyễn Văn Đính) ប្រធានសមាគមឈ្មួញកណ្តាលអចលនទ្រព្យវៀតណាម បាននិយាយថា កញ្ចប់ឥណទានដែលគេបិទខ្ទប់ចាប់ផ្តើមបើក ហើយបើបូកផ្សំនឹងប្រភពដើមទុនបន្ថែមនានាដែលហូរចូលទៅក្នុងទីផ្សារអចលនទ្រព្យ នាំឱ្យគេអាចមើលឃើញនូវដំណើរការងើបឡើងវិញនាពេលខាងមុខ។