ប្រទេសចិននឹងពង្រីកការគាំទ្រផ្នែកហិរញ្ញវត្ថុសម្រាប់វិស័យអចលនទ្រព្យ

អន្តរជាតិ៖ បើយោងតាមសេចក្តីជូនដំណឹងដែលចេញផ្សាយដោយធនាគារ និងបទប្បញ្ញត្តិគ្រប់គ្រង ហិរញ្ញវត្ថុជាតិចិនបានឱ្យដឹងថា ប្រទេសចិននឹងពង្រីកគោលនយោបាយហិរញ្ញវត្ថុចំនួនពីរ ដែលគាំទ្រ ដល់ការអភិវឌ្ឍន៍ប្រកបដោយស្ថិរភាពនៃទីផ្សារអចលនទ្រព្យរហូតដល់ដំណាច់ឆ្នាំ ២០២៤។ នេះបើយោងតាមការចេញផ្សាយដោយសារព័ត៌មាន Xinhua។ អាជ្ញាធរហិរញ្ញវត្ថុរបស់ប្រទេសចិនបានដាក់ចេញនូវគោលការណ៍ណែនាំ ១៦ ជំហាន កាលពីខែវិច្ឆិកា ឆ្នាំមុន ដើម្បីពង្រឹងការគាំទ្រគោលនយោបាយសម្រាប់វិស័យលំនៅឋាន។ សេចក្តីជូនដំណឹងបាននិយាយថា ឥឡូវនេះប្រទេសចិននឹងពង្រីកគោលនយោបាយពាក់ព័ន្ធដល់ថ្ងៃទី ៣១ ខែធ្នូ ឆ្នាំ ២០២៤។ គោលបំណងនៃការផ្លាស់ប្តូរនេះ គឺដើម្បីណែនាំដល់ស្ថាប័នហិរញ្ញវត្ថុ ឱ្យបន្តពន្យារ ការទូទាត់ប្រាក់កម្ចី សម្រាប់សហគ្រាសអចលនទ្រព្យ ខណៈពេលដែលមានការជំរុញការគាំទ្រ ផ្នែកហិរញ្ញវត្ថុ សម្រាប់សហគ្រាសអចលនទ្រព្យដើម្បីធានាការចែកចាយគម្រោងលំនៅឋាន។ សេចក្តីជូនដំណឹងបាននិយាយថា គោលនយោបាយហិរញ្ញវត្ថុដែលបានពង្រីកផ្តោតលើវិស័យពីរគឺ ការគាំទ្រការពន្យារពេលដោយសមហេតុផលនៃកម្ចីអភិវឌ្ឍន៍អចលនទ្រព្យ និងកម្ចីឥណទាន និងការ លើកទឹកចិត្តឱ្យស្ថាប័នហិរញ្ញវត្ថុផ្តល់ការគាំទ្រគោលនយោបាយសម្រាប់កម្ចីពិសេសដែលធានាដល់ការផ្តល់គម្រោងលំនៅឋាន៕