ទិន្នន័យរបស់ក្រសួងពាណិជ្ជកម្មអាមេរិកបង្ហាញថា អាមេរិកបាននាំចូលទំនិញពីប្រទេសចិននៅចន្លោះខែមករាដល់ខែឧសភាឆ្នាំនេះ បានធ្លាក់ចុះប្រហែល២៥% ពោលគឺមានមកនៅត្រឹមតម្លៃ ១៦៩ពាន់លានដុល្លារ។ ទិន្នន័យដដែលបន្ថែមថា ការនាំចូលរបស់អាមេរិកពីប្រទេសចិន គឺមានជាង ១៣% នៃការនាំចូលសរុបក្នុងរយៈពេល៥ខែដំបូងឆ្នាំនេះ ដែលជាកម្រិតទាបមួយក្នុងរយៈពេល១៩ឆ្នាំមកនេះ ដោយចំនួននេះ គឺបានធ្លាក់ចុះ ៣,៣% បើធៀបនឹងពេលដូចគ្នាកាលពីឆ្នាំមុន។ ការនាំចូលនេះបានធ្លាក់ចុះនៅគ្រប់ប្រភេទផលិតផលមួយចំនួន ជាពិសេសគ្រឿងបន្ទះឈីបតែម្ដង ដែលវាបានធ្លាក់ចុះពាក់កណ្តាល។
ប៉ុន្តែ នៅក្នុងរយៈពេលដូចគ្នានេះ ការនាំចូលមកពីប្រទេសម៉ិកស៊ិកវិញ បានកើនឡើងដល់ទំហំទឹកប្រាក់ជិត ២០០ ពាន់លានដុល្លារដែលជាកម្រិតខ្ពស់បំផុតមួយ ខណៈប្រទេសកាណាដាបានរត់តាមពីក្រោយម៉ិកស៊ិកដែលមានទំហំទឹកប្រាក់ ១៧៦ពាន់លានដុល្លារ។ ប្រទេសទាំង២នេះ ត្រូវបានគេរំពឹងថា នឹងនៅតែនាំមុខប្រទេសចិនសម្រាប់ទិន្នន័យនាំចូលទំនិញទៅអាមេរិក នៅក្នុងឆមាសទី១ក្នុងឆ្នាំ២០២៣។បណ្តាប្រទេសតំបន់អាស៊ីអាគ្នេយ៍ក៏កំពុងបញ្ជូនទំនិញកាន់តែច្រើនទៅកាន់សហរដ្ឋអាមេរិកផងដែរ នៅពេលវត្តមានរបស់ចិនបានធ្លាក់ចុះ។ ការនាំចូលរបស់អាមេរិកមកពីបណ្ដាប្រទេសតំបន់អាស៊ីអាគ្នេយ៍ បានកើនឡើងដល់ ១២៤ពាន់លានដុល្លារក្នុងរយៈពេល៥ខែដំបូងនៃឆ្នាំនេះ ជាតួលេខខ្ពស់បំផុតទី២ សម្រាប់ប្រទេសក្នុងតំបន់នេះ ខណៈដែលចំណែកនៃការនាំចូលរបស់អាមេរិក មកពីតំបន់នេះបានកើនឡើងទ្វេដង ក្នុងពេល១ទសវត្សរ៍កន្លងមកនេះ។
ការនាំចេញរបស់អាមេរិកទៅកាន់ប្រទេសចិនវិញ នៅក្នុងខែមករា ដល់ខែឧសភា បានថយចុះដូចគ្នា ពោលគឺមានក្នុងទឹកប្រាក់ចំនួន ៦២ពាន់លានដុល្លារ។ ទោះបីជាតួលេខនេះ គ្រប់គ្រាន់ដើម្បីធ្វើឱ្យប្រទេសចិនក្លាយជាទីផ្សារនាំចេញធំជាងគេទី៣របស់អាមេរិកក៏ពិតមែន ប៉ុន្តែចំណែកនៃការនាំចេញរបស់អាមេរិកទៅចិនក្នុងអត្រា ៧,៥% នេះ គឺស្មើនឹងពាក់កណ្តាលនៃការនាំចេញរបស់អាមរិកទៅកាន់ម៉ិកស៊ិក ឬក៏កាណាដាតែប៉ុណ្ណោះ។
ប្រទេសចិនបានក្លាយជាអ្នកនាំចេញទំនិញដ៏ធំបំផុតទៅកាន់សហរដ្ឋអាមេរិក តាំងពីឆ្នាំ២០០៩មកម្ល៉េះ ដោយបាននាំមុខប្រទេសកាណាដា។ ប៉ុន្ដែ ដោយសារតែមាន ការប្រែប្រួលនៃបរិយាកាសពាណិជ្ជកម្ម ដោយសារតែជម្លោះរវាងប្រទេសទាំងពីរ នៅប៉ុន្មានឆ្នាំមកនេះ វាបានបង្កបញ្ហាជាច្រើន ដល់ការដោះដូរពាណិជ្ជកម្មរវាងប្រទេសយក្សសេដ្ឋកិច្ចទាំងពីរនេះ។
យ៉ាងណាមិញ ខណៈការនាំចេញទៅអាមេរិកធ្លាក់ចុះ ប្រទេសចិន ក៏បានពង្រីកការនាំចេញរបស់ខ្លួនទៅកាន់ទីផ្សារអាស៊ានផងដែរ ដោយនៅឆមាសទី១ឆ្នាំ២០២៣នេះ ការនាំចេញរបស់ចិនទៅអាស៊ានបានកើនឡើង២%។
ក្រុមអ្នកសង្កេតការណ៍មួយចំនួន ជឿជាក់ថា ក្រុមហ៊ុននាំចេញរបស់ចិនកំពុងបង្កើនការផលិតផលផលិតផលដោយប្រើប្រាស់តំបន់អាស៊ាន សម្រាប់កែច្នៃ ហើយលក់ផលិតផលសម្រេចទាំងនោះទៅកាន់ទីផ្សារអាមេរិក និងកន្លែងផ្សេងទៀត៕
