ភ្នំពេញៈ កម្ពុជារកប្រាក់បានជិត ៣៧០ លានដុល្លារនៅក្នុងឆមាសទី១ ឆ្នាំ ២០២៣ ពីការនាំចេញគ្រឿងសង្ហារិម សម្ភារគ្រែ ពូក និងផលិតផលប្រហាក់ប្រហែល ធ្លាក់ជិត ៣០ ភាគរយ ធៀបរយៈពេលដូចគ្នាឆ្នាំមុន។ នេះបើតាមអគ្គនាយកដ្ឋានគយ និងរដ្ឋាករ។
តារាងស្ថិតិនាំចេញទំនិញឆមាសទី១ ឆ្នាំ ២០២៣ បានឱ្យដឹងថា ពីខែមករា-ខែមិថុនា កម្ពុជាបាននាំចេញជំពូកទំនិញ (HS ២ ខ្ទង់) លេខកូដ ៩៤ រួមមានគ្រឿងសង្ហារិម, សម្ភារគ្រែ ពូក ខ្នើយកល់ និងវត្ថុប្រហាក់ប្រហែលសរុប ៣៦៩,៦៤ លានដុល្លារ ធ្លាក់ចុះ ២៩,៧ ភាគរយធៀបរយៈពេលដូចគ្នាឆ្នាំ ២០២២។ ប្រាក់ពីការនាំចេញទំនិញជំពូកលេខកូដ ៩៤ គឺស្មើ ៣,២ ភាគរយនៃចំនួនទឹកប្រាក់នាំចេញសរុបក្នុងឆមាសទី ១ ឆ្នាំ ២០២៣ ដែលមាន ១១ ៤៦៤,៤៨ លានដុល្លារ។
សម្រាប់ខែមិថុនា ការនាំចេញទំនិញក្នុងជំពូកលេខកូដ ៩៤ មានទឹកប្រាក់ ១៣៤,៩៥ លានដុល្លារ ថយចុះ ២៣,៩ ភាគរយធៀបខែមិថុនា ឆ្នាំ ២០២២។ ទឹកប្រាក់នាំចេញក្នុងខែមិថុនាធៀបនឹងខែឧសភា ឆ្នាំ ២០២៣ គឺកើន ៩១,២ ភាគរយ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ កក្កដាថា វិបត្តិនយោបាយ និងសេដ្ឋកិច្ចពិភពលោករយៈពេលប៉ុន្មានឆ្នាំចុងក្រោយនេះបានធ្វើឱ្យការនាំចេញ-ចូលទំនិញរបស់កម្ពុជាធ្លាក់ចុះគួរឱ្យកត់សម្គាល់ លើកលែងតែផលិតផលជាតម្រូវការចាំបាច់ (ម្ហូបអាហារ) ប៉ុណ្ណោះ។ ការនាំចេញធ្លាក់ចុះនេះ មិនមែនមានន័យថា ផលិតផលកម្ពុជាមិនមានគុណភាព ឬអ្នកបញ្ជាទិញបង្វែរទិសដៅទៅប្រទេសផ្សេងទេ ប៉ុន្តែគឺដោយសារតម្រូវការនៅទីផ្សារធ្លាក់ចុះជាងមុន។
លោកអះអាងថា៖ «នេះជាបរិបទនៃទីផ្សារពិភពលោក។ ទីផ្សារនាំចេញផលិតផលខាងលើ នឹងមានទីផ្សារល្អឡើងវិញនៅពេលកំណើនសេដ្ឋកិច្ច ពិភពលោករឹងមាំ ពិសេសទីផ្សារប្រទេសបញ្ជាទិញពីកម្ពុជា»។
លោកលើកឡើងទៀតថា ផ្អែកតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) គឺចំនួននៃក្រុមហ៊ុនដែលចូលមកវិនិយោគនៅកម្ពុជាកំពុងកើនឡើង ដូច្នេះនៅពេលសេដ្ឋកិច្ចពិភពលោកមានសម្ទុះឡើងវិញការនាំចេញរបស់កម្ពុជានឹងហក់ឡើងវិញដែរ។
លោកបន្តថា នៅពេលវិស័យទេសចរណ៍ដំណើរការល្អឡើងវិញតម្រូវការសម្ភារលេខកូដ ៩៤ ក៏កើនឡើងដែរ។អគ្គនាយកសភាពាណិជ្ជកម្មកម្ពុជា លោក ងួន ម៉េងតិច បានលើកឡើងថា លក្ខណៈអំណោយផលនៃទីតាំងភូមិសាស្ត្រ និងច្បាប់វិនិយោគ ព្រមទាំងមានទីផ្សារទទួលទិញច្រើន បានជួយឱ្យកម្ពុជាអាចទាក់ទាញអ្នកវិនិយោគឱ្យចូលមកបណ្តាក់ទុនលើគ្រប់វិស័យជាបន្តបន្ទាប់។ ស្ថានភាពនេះនឹងកាន់តែប្រសើរនៅពេលកំណើនសេដ្ឋកិច្ចពិភពលោកងើបឡើងវិញ។ លោកបន្តថា ការវិនិយោគថ្មីៗនៅកម្ពុជាគឺមានលក្ខណៈចម្រុះកាន់តែច្រើន ហើយការផលិតក៏ប្រើប្រាស់បច្ចេកវិទ្យា និងពលកម្មជំនាញកាន់តែច្រើនដែរ។
លោកអះអាងថា៖ «នៅពេលសេដ្ឋកិច្ចពិភពលោកដំណើរការល្អ តម្រូវការផលិតផលទាំងអស់នឹងហក់ឡើងវិញ ដូច្នេះការបញ្ជាទិញនឹងកើនឡើង»។
ក្នុងឆ្នាំ ២០២២ កម្ពុជាបាននាំចេញទំនិញក្នុងជំពូក (HS ២ ខ្ទង់) លេខកូដ ៩៤ ក្នុងតម្លៃសរុប ៩៤៨,២៦ លានដុល្លារ កើន ៨,៧ ភាគរយបើធៀបឆ្នាំ២០២១ ដែលមាន ៨៧២,៥៦ លានដុល្លារ។ ទឹកប្រាក់នៃការនាំចេញទំនិញជំពូកលេខកូដ ៩៤ ស្មើនឹង ៤,២ ភាគរយនៃចំនួនទឹកប្រាក់នាំចេញសរុប ដែលមានចំនួន ២២ ៤៨២,៩៤ លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
