ការបង្កើនសមយុទ្ធយោធារបស់ចិននៅជិតកោះតៃវ៉ាន់ និងជប៉ុនកំពុងបង្កឱ្យមានការផ្លាស់ប្តូរឥរិយាបថរបស់រដ្ឋាភិបាលជប៉ុន។
ជប៉ុនបានតែងតាំងមន្ត្រីការពារជាតិសំខាន់ៗចំនួនពីររូបកាលពីសប្តាហ៍មុន។ ក្រុមអ្នកវិភាគយល់ថា ការផ្លាស់ប្តូរនេះឆ្លុះបញ្ចាំងពីការកើនឡើងនៃសារៈសំខាន់ ដែលទីក្រុងតូក្យូភ្ជាប់ជាមួយស្ថានភាពនៅទូទាំងច្រកសមុទ្រតៃវ៉ាន់។
លោក Stephen Nagy អ្នកជំនាញសន្តិសុខក្នុងតំបន់នៃសាកលវិទ្យាល័យ International Christian University (ICU) ក្នុងប្រទេសជប៉ុនបានប្រាប់ VOA ក្នុងបទសម្ភាសន៍តាមទូរស័ព្ទថា៖«ប្រទេសចិនបានចូលរួមក្នុងសកម្មភាពបង្កហេតុជាច្រើននៅជិតកោះតៃវ៉ាន់ ហើយប្រជាជនជប៉ុនមានការព្រួយបារម្ភយ៉ាងខ្លាំងអំពីបញ្ហាទាំងនេះ»។
លោកបានបន្ថែមថា៖ «ប្រទេសជប៉ុនកំពុងបញ្ជូនសញ្ញាមួយទៅកាន់ទីក្រុងប៉េកាំងថា ពួកគេស្វែងរកអាទិភាពសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ដោយតែងតាំងមន្ត្រីដែលគាំទ្រតៃវ៉ាន់ឱ្យកាន់តំណែងពាក់ព័ន្ធនឹងវិស័យការពារជាតិ»។
ប្រព័ន្ធផ្សព្វផ្សាយជាច្រើនបានរាយការណ៍កាលពីសប្តាហ៍មុនថាជប៉ុនបានតែងតាំងមន្ត្រីក្រសួងការពារជាតិដែលកំពុងបម្រើការឲ្យកាន់តំណែងជាអនុព័ន្ធការពារជាតិរបស់ខ្លួននៅក្នុងកោះតៃវ៉ាន់ដោយផ្លាស់ប្តូរគោលនយោបាយពីមុនដែលតែងតាំងតែមន្ត្រីកងកម្លាំងស្វ័យការពារជប៉ុនដែលចូលនិវត្តន៍ទៅកាន់តួនាទីនៅសមាគមផ្លាស់ប្តូរជប៉ុន-តៃវ៉ាន់ ដែលជាអង្គការ ដែលតំណាងឱ្យផលប្រយោជន៍របស់ជប៉ុននៅក្រុងតៃប៉ិ។
អ្នកជំនាញនិយាយថាការវិវឌ្ឍនេះបង្ហាញពីបំណងប្រាថ្នារបស់ទីក្រុងតូក្យូក្នុងការធ្វើឱ្យប្រសើរឡើងនូវគុណភាពនៃការសន្ទនាទាក់ទងនឹងស្ថានភាពសន្តិសុខនៅទូទាំងច្រកសមុទ្រតៃវ៉ាន់។ ពួកគេសង្ឃឹមថានឹងសម្រេចបានគោលដៅដោយតែងតាំងមនុស្សត្រឹមត្រូវឱ្យធ្វើជាអនុព័ន្ធយោធា។
លោក Alessio Patalano សាស្ត្រាចារ្យផ្នែកសង្គ្រាម និងយុទ្ធសាស្ត្រនៅអាស៊ីបូព៌ានៅមហាវិទ្យាល័យ King's College London បានប្រាប់ VOA ក្នុងបទសម្ភាសតាមទូរស័ព្ទថា៖ «[ការផ្លាស់ប្តូរនេះ] បញ្ជាក់ពីសមត្ថភាពក្នុងការអភិវឌ្ឍទំនាក់ទំនងឱ្យកាន់តែរឹងមាំនៅកម្រិតមន្ត្រី»។
លោកបានបន្ថែមថា៖«ស្ថិរភាពនៅទូទាំងច្រកសមុទ្រតៃវ៉ាន់មានផលប៉ះពាល់ដែលមិនអាចជៀសបានសម្រាប់សន្តិសុខរបស់ជប៉ុនហើយមានការយល់ឃើញកាន់តែច្រើនឡើងនៅក្នុងទីក្រុងតូក្យូដែលថាមានមន្ត្រីម្នាក់នៅក្នុងទីក្រុងតៃប៉ិធ្វើឱ្យមានភាពងាយស្រួលក្នុងការសន្ទនាប្រកបដោយគុណភាពកាន់តែប្រសើរឡើង»។
បន្ថែមពីលើការតែងតាំងថ្មីនៃអនុព័ន្ធការពារជាតិនៅតៃវ៉ាន់ នាយករដ្ឋមន្ត្រីជប៉ុន លោក Fumio Kishida ក៏បានតែងតាំង លោកMinoru Kiharaដែលជាអ្នកនយោបាយដែលមានប្រវត្តិក្នុងការលើកកម្ពស់ទំនាក់ទំនងកាន់តែរឹងមាំរវាងទីក្រុងតូក្យូ និងក្រុងតៃប៉ិ ជារដ្ឋមន្ត្រីការពារជាតិថ្មីរបស់ប្រទេសជប៉ុន។ ការតែងតាំងលោក Kihara គឺជាផ្នែកមួយនៃការរុះរើគណៈរដ្ឋមន្ត្រីដែលប្រកាសដោយរដ្ឋាភិបាលជប៉ុនកាលពីថ្ងៃទី១៣ ខែកញ្ញា។
ជាការឆ្លើយតបទៅនឹងការតែងតាំងមន្ត្រីការពារជាតិដែលប្រកាសដោយប្រទេសជប៉ុន ទីក្រុងប៉េកាំងបាននិយាយថាខ្លួនប្រឆាំងយ៉ាងម៉ឺងម៉ាត់ចំពោះប្រទេសណាមួយដែលមានទំនាក់ទំនងការទូតជាផ្លូវការជាមួយប្រទេសចិនហើយធ្វើការផ្លាស់ប្តូរទំនាក់ទំនងជាផ្លូវការជាមួយកោះតៃវ៉ាន់។
លោក Chen Binhua អ្នកនាំពាក្យការិយាល័យកិច្ចការតៃវ៉ាន់នៃក្រុមប្រឹក្សារដ្ឋរបស់ប្រទេសចិនបានថ្លែងក្នុងសន្និសីទសារព័ត៌មានប្រចាំថ្ងៃនៅថ្ងៃទី ១៣ ខែកញ្ញាថា៖«ចិនជំរុញឱ្យភាគីជប៉ុនរៀនពីមេរៀនប្រវត្តិសាស្ត្រ គោរពតាមគោលការណ៍ចិនតែមួយ និងស្មារតីនៃឯកសារនយោបាយចិន-ជប៉ុនទាំងបួន ហើយត្រូវប្រុងប្រយ័ត្នចំពោះពាក្យសម្ដី និងសកម្មភាពរបស់ខ្លួនលើបញ្ហាតៃវ៉ាន់»៕
