ប្រទេសចិនបានចោទប្រកាន់សហរដ្ឋអាម៉េរិកថា បានលួចចូលក្នុងម៉ាស៊ីនមេរបស់ក្រុមហ៊ុន Huawei Technologies ដែលចាប់ផ្តើមនៅក្នុងឆ្នាំ២០០៩ ដែលជាផ្នែកនៃកិច្ចខិតខំប្រឹងប្រែងរបស់សហរដ្ឋអាម៉េរិកដែលមានបំណងក្នុងការលួចទិន្នន័យដែលឈានដល់ការវាយប្រហារតាមអ៊ីនធឺណិតរាប់ម៉ឺនប្រឆាំងនឹងចិនកាលពីឆ្នាំមុន ។
ក្រសួងសន្តិសុខរដ្ឋរបស់ប្រទេសចិនបាននិយាយនៅក្នុងការបង្ហោះនៅលើគណនី WeChat ផ្លូវការរបស់ខ្លួនកាលពីថ្ងៃពុធថា អង្គភាពប្រតិបត្តិការនៃទីភ្នាក់ងារសន្តិសុខជាតិអាម៉េរិក NSA បានធ្វើការវាយប្រហារលួចចូលទៅក្នុងម៉ាស៊ីន Sever របស់ក្រុមហ៊ុន Huawei ក្នុងឆ្នាំ ២០០៩ ។ ចិនមិនបានផ្តល់ព័ត៌មានលម្អិតនៃការវាយប្រហារចាប់តាំងពីឆ្នាំ ២០០៩នោះទេ ។
ការវាយប្រហារតាមអ៊ីនធឺណិត គឺជាចំណុចធំបំផុតនៃភាពតានតឹងរវាងទីក្រុងវ៉ាស៊ីនតោន និងទីក្រុងប៉េកាំង ដែលភាគីទាំង២បានចោទប្រកាន់គ្នាទៅវិញទៅមកពីការរៀបចំការវាយប្រហារប្រឆាំងនឹងគ្នាទៅវិញទៅមក ។
ការចោទប្រកាន់របស់ក្រសួងសន្តិសុខរដ្ឋរបស់ប្រទេសចិនបានកើតឡើង ខណៈប្រទេសទាំងពីរប្រយុទ្ធគ្នាលើសង្រ្គាមបច្ចេកវិទ្យា ។ ជាពិសេស Huawei បានជំរុញឱ្យមានការភ្ញាក់ផ្អើលនៅក្នុងទីក្រុងវ៉ាស៊ីនតោន ចាប់តាំងពីក្រុមហ៊ុននេះបានបង្ហាញស្មាតហ្វូនដែលដំណើរការដោយបន្ទះឈីបកម្រិតខ្ពស់ដែលផលិតដោយក្រុមហ៊ុនចិន Semiconductor Manufacturing International Corp ទោះបីជាមានការដាក់ទណ្ឌកម្មពីសហរដ្ឋអាម៉េរិកអស់រយៈពេលជាច្រើនឆ្នាំដែលមានបំណងកម្ទេចក្រុមហ៊ុន Huawei ក៏ដោយ ។
អ្នកនាំពាក្យក្រសួងការបរទេសចិនលោកស្រី ម៉ៅ នីង បានប្រាប់អ្នកយកព័ត៌មាននៅក្នុងសន្និសីទសារព័ត៌មានជាទៀងទាត់នៅទីក្រុងប៉េកាំងកាលពីថ្ងៃពុធថា សហរដ្ឋអាម៉េរិកបាននឹងកំពុង “ពង្រីក” គំនិតនៃសន្តិសុខជាតិជាមួយនឹងការគៀបសង្កត់លើសហគ្រាសចិន ។ «អ្វីដែលយើងចង់ប្រាប់អាម៉េរិកគឺការគាបសង្កត់ និងការទប់ស្កាត់ចិននឹងមិនបញ្ឈប់ការអភិវឌ្ឍរបស់ចិនទេ ។ វានឹងធ្វើឲ្យយើងមានការដោះស្រាយកាន់តែច្រើនក្នុងការអភិវឌ្ឍរបស់យើង» ។
កាលពីថ្ងៃអង្គារ រដ្ឋមន្ត្រីក្រសួងពាណិជ្ជកម្មអាម៉េរិកលោកស្រី Gina Raimondo បាននិយាយថា លោកស្រីមានការខកចិត្តខ្លាំងណាស់នៅពេលដែលក្រុមហ៊ុន Huawei បានបញ្ចេញ Mate 60 Pro ក្នុងអំឡុងពេលដំណើរទស្សនកិច្ចរបស់នាងទៅកាន់ប្រទេសចិនកាលពីខែមុន ប៉ុន្តែបានកត់សម្គាល់ថាសហរដ្ឋអាម៉េរិកមិនមានភស្តុតាងណាមួយដែលថា ចិនអាចផលិតឧបករណ៍ semiconductors ទំនើបដែលផ្តល់ថាមពលដល់ទូរស័ព្ទនេះក្នុងកម្រិតខ្លាំងនោះទេ ។
