ការវាយប្រហារធ្វើឡើងដោយយន្តហោះចម្បាំង F-16 របស់សហរដ្ឋអាមេរិក ចំនួនពីរគ្រឿង ទៅលើទីតាំងស្តុកគ្រឿងសព្វាវុធ និងគ្រាប់រំសេវក្នុងប្រទេសស៊ីរីកាលពីថ្ងៃសុក្រ កំពុងជំរុញឱ្យមានការព្រួយបារម្ភថា ជម្លោះរវាង អ៊ីស្រាអែល និងក្រុមហាម៉ាស់ អាចនឹងរាលដាលនៅមជ្ឈិមបូព៌ា។ ប្រធានាធិបតី លោក Joe Biden បានបញ្ជាឱ្យមានបេសកកម្មនៅក្នុងការសងសឹកសម្រាប់ការវាយប្រហារមកលើកងកម្លាំងសហរដ្ឋអាមេរិកធ្វើឡើងដោយកងជីវពលគាំទ្រដោយប្រទេសអ៊ីរ៉ង់។
មន្ទីរបញ្ចកោណ បាននិយាយថា ទីតាំងពីរកន្លែង ដែលបានដាក់គោលដៅនៅជិតទីក្រុង Abu Kamal ជាទីក្រុងរបស់ស៊ីរី ជាប់ព្រំដែនជាមួយប្រទេសអ៊ីរ៉ាក់ ត្រូវបានប្រើប្រាស់ដោយកងឆ្មាំបដិវត្តន៍អ៊ីរ៉ង់ និងក្រុមជីវពល។ កងទ័ពសហរដ្ឋអាមេរិក និងក្រុមចម្រុះ ត្រូវបានវាយប្រហារយ៉ាងហោចណាស់ ១៩លើកនៅក្នុងប្រទេសអ៊ីរ៉ាក់ និងនៅក្នុងប្រទេសស៊ីរី ដោយកងកម្លាំងគាំទ្រដោយអ៊ីរ៉ង់កាលពីសប្តាហ៍មុន។ រដ្ឋមន្ត្រីការបរទេសសហរដ្ឋអាមេរិក លោក Antony Blinken បានថ្លែងទៅកាន់អង្គការសហប្រជាជាតិកាលពីថ្ងៃអង្គារថា ទីក្រុងវ៉ាស៊ីនតោន នឹងមានចំណាត់ការយ៉ាងឆាប់រហ័ស ប្រសិនបើការវាយប្រហារដោយអ្នកតំណាងរបស់អ៊ីរ៉ង់នៅតែបន្ត។
លោក Blinken និយាយថា សហរដ្ឋអាមេរិក មិនស្វែងរកជម្លោះជាមួយអ៊ីរ៉ង់នោះទេ។ យើងមិនចង់ឱ្យសង្រ្គាមនេះរីកធំឡើយ។ ប៉ុន្តែប្រសិនបើអ៊ីរ៉ង់ ឬអ្នកតំណាងរបស់ប្រទេសនេះ វាយប្រហារមកលើបុគ្គលិកសហរដ្ឋអាមេរិកនៅទីកន្លែងណាក៏ដោយ កុំធ្វើឲ្យមានកំហុសឲ្យសោះ នោះយើងនឹងការពារប្រជាជនរបស់យើង យើងនឹងការពារសន្តិសុខរបស់យើងយ៉ាងឆាប់រហ័សនិងដាច់ខាត។ ក្រុមហាម៉ាស់ ក្រុមជីហាតអ៊ីស្លាមនិយម និងក្រុមហេសបូឡារបស់ប្រទេសលីបង់ សុទ្ធតែត្រូវបានគាំទ្រដោយទីក្រុងតេអេរ៉ង់។
សេតវិមានបាននិយាយកាលពីថ្ងៃព្រហស្បតិ៍ថា លោក Biden បានផ្ញើសារដ៏កម្រមួយទៅកាន់មេដឹកនាំកំពូលរបស់អ៊ីរ៉ង់ លោក Ayatollah Ali Khamenei ដោយព្រមានប្រឆាំងការដាក់គោលដៅលើបុគ្គលិកសហរដ្ឋអាមេរិកនៅមជ្ឈិមបូព៌ា។ សហរដ្ឋអាមេរិក បានបញ្ជូននាវាចម្បាំងនិងយន្តហោះចម្បាំងទៅកាន់តំបន់នេះរួចហើយក្នុងរយៈពេលបីសប្តាហ៍កន្លងទៅនេះ ហើយកាលពីថ្ងៃព្រហស្បត្តិ៍ មន្ទីរបញ្ចកោណ ឧត្តមសេនីយត្រី Patrick Ryder បានបញ្ជាក់ថា ទាហានអាមេរិកប្រហែល ៩០០នាក់ នឹងទៅដល់ទីនោះ។
