(ភ្នំពេញ)៖ លោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការបរទេស បានមើលឃើញថា ឆ្នាំ២០២៤ ប្រជាពលរដ្ឋចិន អាចនឹងវិលត្រឡប់មកកម្ពុជាវិញ ប្រសិនបើមិនមានអ្វីប្រែប្រួលទេនោះ។
លោក ហ្សង់ហ្វ្រង់ស័រ មានសុទិដ្ឋិនិយមបែបនេះ ដោយផ្អែកទៅលើការប្រកាសដាក់ចេញនយោបាយកំណត់យកឆ្នាំ២០២៤ ជាឆ្នាំផ្លាស់ប្តូរទំនាក់ទំនងរវាងប្រជាជនកម្ពុជា-ចិន ដែលប្រកាសដោយរដ្ឋាភិបាលទាំងពីរ ក្នុងជំនួបសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក លី ឈាង នាយករដ្ឋមន្ត្រីចិនកាលពីខែតុលា កន្លងទៅនេះ។
ក្នុងសន្និសីទបង្ហាញសមិទ្ធផល៣ខែរបស់រាជរដ្ឋាភិបាល លោក ហ្សង់ហ្វ្រង់ស័រ បានគូសបញ្ជាក់បែបនេះ «ក្នុងថ្នាលនៃការអនុវត្តន៍កិច្ចសហប្រតិបត្តិការត្បូងពេជ្រ និងក្នុងន័យនៃការបន្តពង្រឹងមិត្តភាពដែកថែប កម្ពុជា និងចិន កំណត់យកឆ្នាំ២០២៤ខាងមុខនេះ ជាឆ្នាំផ្លាស់ប្តូរប្រជាជនគ្នាទៅវិញទៅមក។ បានន័យថា នៅឆ្នាំ២០២៤ខាងមុខនេះ បើមិនមានអ្វីប្រែប្រួលទេ គឺជាការវិលវិញនៃអ្នកទេសចរចិន ជួនចំពេលដែលអាកាសយានដ្ឋានអន្តរជាតិសៀមរាបអង្គរទើបត្រូវបានសម្ពោធដាក់ឱ្យប្រើប្រាស់»។
សម្រាប់លោក ហ្សង់ហ្វ្រង់ស័រ ការវិលត្រឡប់មកវិញនៃអ្នកទេសចរចិន ក៏ជាផ្លែផ្កាមួយនៃនយោបាយការទូតសេដ្ឋកិច្ច ដែលជាស្នូលដ៏សំខាន់មួយរបស់សម្តេចធិបតី ហ៊ុន ម៉ាណែត។
និយាយដល់នយោបាយការទូតសេដ្ឋកិច្ចរបស់សម្តេចធិបតី ហ៊ុន ម៉ាណែត, រដ្ឋមន្ត្រីប្រតិភូអមនាយករដ្ឋមន្ត្រីមានអតីតភាពជាអ្នកសារព័ត៌មានដ៏ល្បាញល្បី លោក ហ្សង់ហ្វ្រង់ស័រ ក៏បានបង្ហាញក្តីរំពឹងខ្ពស់ក្នុងការទទួលបានផ្លែផ្កាពីនយោបាយការទូតសេដ្ឋកិច្ចនេះផងដែរ។
៣ខែនៃការកាន់តំណែងជានាយករដ្ឋមន្ត្រី និងតាមរយៈដំណើរទស្សនកិច្ចនៅក្រៅប្រទេស សម្តេចធិបតី ហ៊ុន ម៉ាណែត បានយកចិត្តទុកដាក់ខ្ពស់ក្នុងការពង្រីកកិច្ចសហប្រតិបត្តិការផ្នែកសេដ្ឋកិច្ចទាំងក្នុងក្របខណ្ឌប្រទេស និងប្រទេស ក៏ដូចជាជាមួយវិស័យឯកជន។
លោក ហ្សង់ហ្វ្រង់ស័រ បានគូសរំលេចថា ក្នុងជំនួបជាមួយមេដឹកនាំបណ្តាប្រទេសនានា សម្តេចធិបតី ហ៊ុន ម៉ាណែត ទទួលបានការគាំទ្រពីសំណាក់ប្រទេសជាច្រើន ដូចជាចិន ហ្វីលីពីន ឥណ្ឌូនេស៊ី ម៉ាឡេស៊ី ឱ្យបង្កើនការនាំទំនិញចូលទៅប្រទេសរបស់គេ ជាពិសេសគឺអង្ករ។ ក្រៅពីនោះ ក៏មានការចុះកិច្ចព្រមព្រៀងអភិវឌ្ឍន៍វិស័យកសិកម្មរវាងសហគ្រាសធុនតូច និងមធ្យមកម្ពុជា និងហ្វីលីពិន។
«គំនិត គម្រោង ផ្លែផ្កា បានបន្តលេចឡើងតាមរយៈការពិភាក្សានានា ជាទ្វេភាគីរវាងប្រទេស និងប្រទេស រវាងថ្នាក់ដឹកនាំកំពូលរបស់កម្ពុជា ជាមួយបណ្តាប្រទេសជិតខាង ក្នុងតំបន់ និងបណ្តាប្រទេសក្នុងលោក»។ នេះជាការលើកបង្ហាញពីផ្លែផ្កានៃនយោបាយការទូតសេដ្ឋកិច្ចរបស់សម្តេចធិបតី ហ៊ុន ម៉ាណែត ដោយលោក ហ្សង់ហ្វ្រង់ស័រ។
លទ្ធផលផ្កែផ្កាមួយទៀតនោះ គឺការចុះអនុស្សារណៈរវាងក្រសួងពាណិជ្ជកម្មកម្ពុជា និងអាលីបាបា អនុញ្ញាតឱ្យលក់ផលិតផលខ្មែរ នៅលើបណ្តាញរបស់អាលីបាបា៕
