មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បន្តអនុវត្តគម្រោងសមាហរណកម្មកណ្តុរហិតរកមីន និងសុនខស្រាវជ្រាវបច្ចេកទេស ក្រោមកញ្ចប់ជំនួយជិត៤០ម៉ឺនដុល្លារពីរដ្ឋាភិបាលប្រទេសបែលហ្ស៊ិក តាមរយៈអង្គការដៃគូAPOPO។ ការអនុវត្តគម្រោងនេះ ត្រូវបានចុះហត្ថលេខាដោយលោក ហេង រតនា អគ្គនាយកស៊ីម៉ាក់ និងលោក Michael Raine ប្រធានអង្គការ APOPO ប្រចាំកម្ពុជា នាថ្ងៃទី១៣ធ្នូ។
គម្រោងនេះ នឹងចាប់ផ្តើមអនុវត្តពីខែមករា ដល់ខែធ្នូ ឆ្នាំ២០២៤ នៅក្នុងខេត្តសៀមរាប ព្រះវិហារ និងមណ្ឌលគីរី។ នេះជាការលើកឡើងរបស់លោក ហេង រតនា ដោយបានបញ្ជាក់នៅលើទំព័រហ្វេសប៊ុករបស់ស៊ីម៉ាក់យ៉ាងដូច្នេះ៖ «យើងមានផែនការបោសសម្អាតផ្ទៃដីចំនួន ៩៨លានម៉ែត្រក្រឡានៅក្នុងខេត្តទាំង៣នេះ»។
បើតាមលោក ហេង រតនា ស៊ីម៉ាក់ បានស្នើសុំកិច្ចសហការ ពីរដ្ឋាភិបាលបែលហ្ស៊ិកផ្ទាល់ ដើម្បីគាំទ្រដល់សកម្មភាពបោសសម្អាតមីននៅកម្ពុជាតាំងពីឆ្នាំ ២០២១ ដល់ ២០២៦ ដោយសន្យាផ្តល់ឱ្យកម្ពុជា ប្រមាណ៥០ម៉ឺនដុល្លារក្នុងមួយឆ្នាំ។ ការចូលរួមកិច្ចសហប្រតិបត្តិការ និងជំនួយនេះ ត្រូវបានផ្តល់ឱ្យកម្ពុជាតាមរយៈអង្គការ APOPO។
លោក ហេង រតនា បានបន្ថែមថា គិតមកទល់បច្ចុប្បន្ន ភាពជាដៃគូរវាងស៊ីម៉ាក់និងអង្គការ APOPO បានរយៈពេលជិត១០ ឆ្នាំមកហើយ លើគម្រោងកណ្តុរហិតមីននេះ។ ក្នុងរយៈពេលនៃកិច្ចសហប្រតិបត្តិការនេះ ស៊ីម៉ាក់បានបោសសម្អាតផ្ទៃដីមានមីនបានជាង ៣ ០០០ ហិកតា និងកម្ទេចចោលគ្រាប់យុទ្ធភណ្ឌមិនទាន់ផ្ទុះគ្រប់ប្រភេទបានប្រមាណ ៥១ ០០០គ្រាប់។
អគ្គនាយកស៊ីម៉ាក់រូបនេះបន្តរៀបរាប់ថា៖ «កិច្ចសហប្រតិបត្តិការជាមួយAPOPO នេះ យើងមិនមែនធ្វើតែលើការបោសសម្អាតមីននៅកម្ពុជាមួយមុខទេ តែយើងមានកិច្ចសហប្រតិបត្តិការជាមួយបណ្តាដៃគូដទៃទៀត ដូចជាការបញ្ជូនសុនខរបស់យើងទៅប្រទេសតួកគី ទៅបណ្តាប្រទេសនៅអាហ្រ្វិកណ្តាល ដោយយើងបានសហការគ្នាក្នុងកិច្ចសហប្រតិបត្តិការជាមួយបណ្តាប្រទេសទាំងអស់នោះបញ្ជូនជំនាញដើម្បីជួយគាំទ្រដល់បណ្តាប្រទេសទាំងអស់នោះ ផងដែរ»។ លើសពីនេះ ក៏មានអ្នកដោះមីនមួយចំនួន បានហ្វឹកហ្វឺននៅកម្ពុជាតាមរយៈអង្គការ APOPO នេះដែរ។ ក្នុងនោះ មានអ្នកដោះមីនមកពីប្រទេសអ៊ុយក្រែន ប្រទេសហ្សកដង់ និងប្រទេសសេណេហ្គាល់ ដែលបាននិងកំពុងហ្វឹកហ្វឺននៅវិទ្យាស្ថានបច្ចេកទេសកំចាត់មីនខេត្តកំពង់ឆ្នាំង។ នេះបើតាមលោក ហេង រតនា៕
