គិតមកទល់ពេលនេះ មានរយៈពេលជាង១ខែហើយ ដែលអាជ្ញាធរបានអនុវត្តវិធានការផ្អាកការនាំចូលបំណែកសាច់បង្កកជាប្រភេទគ្រឿងក្នុងពីប្រទេសផ្សេងៗមកកាន់ទីផ្សារកម្ពុជា។ ក្រោយផ្អាកការនាំចូលជាង១ខែកន្លងមកនេះ ថ្នាក់ដឹកនាំសមាគមអ្នកចិញ្ចឹមសត្វកម្ពុជា សង្កេតឃើញថា តម្លៃជ្រូករស់នៅកម្ពុជា ហាក់ងើបឡើងបន្តិចហើយ បន្ទាប់ពីបានធ្លាក់ចុះយ៉ាងគំហុកអស់រយៈពេលជាច្រើនខែកន្លងមក។
ការងើបឡើងវិញនៃតម្លៃជ្រូករស់នេះ វាជាសញ្ញាល្អមួយសម្រាប់វិស័យចិញ្ចឹមនៅសត្វនៅកម្ពុជា ដ្បិតថា កន្លងមកមានប្រជាកសិករចិញ្ចឹមខ្នាតតូចជាច្រើនបានបោះបង់ការចិញ្ចឹម និងកាត់បន្ថយបរិមាណ។
លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា បានគូសបញ្ជាក់ថា តម្លៃជ្រូករស់ដែលបានធ្លាក់ថ្លៃយ៉ាងគំហុកកាលពីពេលកន្លងទៅ បានងើបឡើងវិញហើយ បន្ទាប់ពីអាជ្ញាធរបិទការនាំចូលបំណែកសាច់បង្កកជាប្រភេទគ្រឿងក្នុងបណ្តោះអាសន្នក្នុងរយៈពេលជាង១ខែកន្លងមកនេះ។
បើតាមការអះអាងរបស់ថ្នាក់ដឹកនាំរូបនេះ ជ្រូករស់បច្ចុប្បន្នអាចលក់ចេញក្នុងតម្លៃជាង៩ពាន់រៀលក្នុងមួយគីឡូក្រាម ខណៈកាលពីមុនបានធ្លាក់ចុះមកនៅក្រោម៨ពាន់រៀលក្នុងមួយគីឡូក្រាម។ តាមរយៈលទ្ធផលនេះ ប្រធានក្រុមប្រឹក្សាភិបាលរួបនេះវាយតម្លៃជារួមថា ការអនុវត្តវិធានការបិទការនាំចូលបំណែកសាច់បង្កករបស់អាជ្ញាធរពាក់ព័ន្ធមានប្រសិទ្ធភាពល្អ បើទោះបីមានឈ្មួញឆ្លៀតឱកាសមួយចំនួនតូចនៅតែបន្តលួចនាំចូលតាមច្រករបៀបតូចៗក៏ដោយ។
បើតាមអ្នកជំនាញរូបនេះ ទោះបីតម្លៃជ្រូករស់បច្ចុប្បន្នមានការកើនឡើងមកវិញជាបណ្តើរៗក៏ពិតមែន ប៉ុន្តែលោកនៅមិនទាន់សង្កេតឃើញមានកសិដ្ឋាន ឬកសិករចិញ្ចឹមជ្រូក បង្កើនការចិញ្ចឹមរបស់ពួកគេឡើងវិញនៅឡើយនោះទេ ដោយសារពួកគេមួយចំនួននៅតែមានភាពភ័យខ្លាចក្នុងការខាតបង់នៅឡើយ ដ្បិតថាការផ្អាកការនាំចូលបំណែកសាច់បង្កកជាបណ្តោះអាសន្ននេះមានរយៈពេលខ្លីប៉ុណ្ណោះ។
ទន្ទឹមនឹងនេះ លោក ស្នើឱ្យរាជរដ្ឋាភិបាល និងអ្នកពាក់ព័ន្ធបន្តជួយគិតគូរលើបញ្ហាចលនាការនាំចូលសាច់បង្កកមកកាន់ទីផ្សារកម្ពុជាបន្ថែមទៀត ដើម្បីជួយលើកកម្ពស់វិស័យចិញ្ចឹមនៅកម្ពុជា។ យ៉ាងណាក៏ដោយ លោក ស្នើឱ្យភាគីពាក់ព័ន្ធគិតគូរធ្វើយ៉ាងណារក្សាតម្លារភាពរវាងអ្នកចិញ្ចឹម អ្នកនាំចូល និងអ្នកទទួលទាន ពោលគឺរក្សាតម្លៃយ៉ាងណាឱ្យភាគីទាំងអស់អាចទទួលយកបាន។
សូមបញ្ជាក់ថា ប្រភេទគ្រឿងក្នុង និងបំណែកសាច់បង្កកដែលត្រូវហាមឃាត់ការនាំចូលជាបណ្ដោះអាសន្ន រួមមាន អណ្ដាត ថ្លើមគោ ក្របី ជ្រូកមាន់បង្កក និងគ្រឿងក្នុងបង្កកមួយចំនួនទៀតរបស់សត្វគោ ក្របី ជ្រូក ដែលអាចបរិភោគបានក្រៅពីអណ្ដាត និងថ្លើម។ ការសម្រចផ្អាកមិនឱ្យមានការនាំចូលជាបណ្ដោះអាសន្ននេះមានរយៈពេល៦ខែ គិតចាប់ពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤។ ប៉ុន្ដែវិធានការនេះមិនអនុវត្តចំពោះគម្រោងវិនិយោគមានលក្ខណៈសម្បត្តិគ្រប់គ្រាន់សម្រាប់ជាធាតុចូលផលិតកម្មសម្រាប់ការនាំចេញឡើយ៕
