(ព្រះសីហនុ)៖ ចរាចរទូកុងតឺន័រចេញ ចូល នៅកំពង់ផែស្វយ័តក្រុងព្រះសីហនុ ក្នុងត្រីមាសទី១ ឆ្នាំ២០២៤ មានកំណើនជាង២៣% បើធៀបនឹងរយៈពេលដូចគ្នាកាលពីឆ្នាំ២០២៣។ មន្រ្តីជាន់ខ្ពស់នៃកំពង់ផែស្វយ័តក្រុងព្រះសីហនុ និងអ្នកជំនាញក្នុងវិស័យដឹកជញ្ជូន បានចាត់ទុកកំណើននេះ គឺបានបង្ហាញពីស្ថានភាពល្អប្រសើររបស់វិស័យសេដ្ឋកិច្ចកម្ពុជា។
លោក អ៊ុក សុមេធី នាយករងផែនការលទ្ធកម្ម និងស្ថិតិ នៃកំពង់ផែស្វយ័តក្រុងព្រះសីហនុ បានប្រាប់ថា នៅក្នុងត្រីមាសទី១ ឆ្នាំ២០២៤នេះ បរិមាណទូកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនជាង២១ម៉ឺន៧ពាន់កុងតឺន័រ មានការកើនឡើងជាង២៣% បើធៀបនឹងរយៈពេលដូចគ្នាក្នុងឆ្នាំ២០២៣។
បើតាមមន្រ្តីរូបនេះ ក្នុងចំណោមកុងតឺន័រទាំងនេះ មានការនាំចូលជាង១១ម៉ឺន៣ពាន់ទូ កើនឡើងជាង២៦% និងការនាំចេញមានជាង១០ម៉ឺន៣ពាន់ទូ មានការកើនឡើងជាង២១%។ តាមរយៈកំណើននេះ កំពង់ផែស្វយ័តក្រុងព្រះសីហនុ រំពឹងថា នឹងសម្រេចបាននូវផែនការអាជីវកម្មរបស់ខ្លួនដែលបានគ្រោងទុក ជាពិសេសសេដ្ឋកិច្ចកម្ពុជា នៅតែមានការីកចម្រើន និងអាចសម្រេចបាននូវកំណើន GDP ដែលបានរំពឹងទុកផងដែរ។
ជុំវិញបញ្ហានេះដែរឧកញ៉ា ស៊ិន ចន្ធី ប្រធានសមាគមភស្ដុភារកម្មកម្ពុជា កត់សម្គាល់ឃើញថា ទូកុងតឺន័រឆ្លងកាត់កំពង់ផែស្វយ័តក្រុងព្រះសីហនុ ចាប់ផ្ដើមមានកំណើនតាំងពីកម្ពុជា បានបិទបញ្ចប់បញ្ហាជំងឺកូវីដ-១៩ កាលពីឆ្នាំ២០២២មកម៉្លេះ។
អ្នកជំនាញរូបនេះចាត់ទុកកំណើននេះ គឺបានបង្ហាញពីភាពល្អប្រសើរនៃការធ្វើពាណិជ្ជកម្មរបស់កម្ពុជា ជាមួយដៃគូអន្តរជាតិ និងរំពឹងថា ភាពវិជ្ជមាននេះនឹងកើតមានឡើងជាបន្តទៀតនៅក្នុងត្រីមាសទី២ ក្រោយកម្ពុជា គ្រោងនាំចេញទំនិញជាច្រើនទៀតនៅកាន់ទីផ្សារអន្តរជាតិ ស្របពេលដែលរាជរដ្ឋាភិបាល បានបង្កភាពងាយស្រួលដល់ការធ្វើពាណិជ្ជកម្មជាមួយបណ្ដាប្រទេសនានាលើពិភពលោក តាមរយៈកិច្ចព្រមព្រៀងពាណិជ្ជកម្មសេរីជាដើម។
សម្រាប់ឧកញ៉ា ស៊ិន ចន្ធី ទោះបីស្ថានភាពសេដ្ឋកិច្ចនៅលើពិភពលោកនៅមិនទាន់ច្បាស់លាស់ ហើយមានផ្នែកខ្លះនៃការធ្វើពាណិជ្ជកម្មរបស់កម្ពុជា ជាមួយអន្តរជាតិ បានធ្លាក់ចុះក៏ដោយ ប៉ុន្តែការនាំចេញក្នុងវិស័យមួយចំនួនរបស់កម្ពុជានៅតែមានការកើនឡើង។ តួយ៉ាងការធ្វើពាណិជ្ជកម្មលើផ្នែកកសិកម្ម គឺកំពុងមានការរីកលូតលាស់ជាបន្តបន្ទាប់ ខណៈផលិតផលកសិកម្មជាច្រើនគ្រោងនាំចេញទៅកាន់ទីផ្សារអន្តរជាតិនាពេលខាងមុខ។
យ៉ាងណាមិញកំពង់ផែស្វយ័តក្រុងព្រះសីហនុ រំពឹងថា នៅក្នុងឆ្នាំ២០២៤ នេះ នឹងអាចទទួលបានបរិមាណទូកុងតឺន័រឆ្លងកាត់ប្រមាណ១លាន TEU ដែលតម្រូវឱ្យកំពង់ផែពន្លឿននូវផែនការអភិឌ្ឍន៍ផែកុងតឺន័រថ្មីជំហានទី១ ទី២ និងទី៣ ព្រមទាំងសិក្សាផែនការបន្តទៀត។
បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅត្រីមាសទី១ ឆ្នាំ២០២៤ នេះ ការដោះដូរពាណិជ្ជកម្មរបស់កម្ពុជា ជាមួយទីផ្សារអន្តរជាតិ សម្រេចបានទំហំទឹកប្រាក់ជាង១២ពាន់លានដុល្លារ កើនឡើងជិត១២% បើធៀបនឹងរយៈពេលដូចគ្នាកាលពីឆ្នាំ២០២៣។ ក្នុងនោះកម្ពុជានាំចេញទៅកាន់ទីផ្សារអន្តរជាតិ សម្រេចបានជាង៦ពាន់លានដុល្លារ កើនឡើង១៨% ខណៈការនាំចូលទំនិញពីទីផ្សារអន្តរជាតិ មកកម្ពុជាវិញ មានទំហំទឹកប្រាក់ជាង៦ពាន់លានដុល្លារ កើនឡើងជាង៦%៕
