(ភ្នំពេញ)៖ មន្រ្តីជាន់ខ្ពស់រាជរដ្ឋាភិបាលកម្ពុជាបានគូសបញ្ជាក់ថា គម្រោងព្រែកជីកហ្វូណន តេជោ គឺជាគម្រោងសម្រាប់បម្រើផលប្រយោជន៍ដល់ប្រជាពលរដ្ឋខ្មែរ ហើយមិនមែនជាគម្រោងខណ្ឌបែងចែកទឹកដីដូចការសង្ស័យ និងការចោទប្រកាន់ណាមួយនោះដែរ។ បើតាមមន្រ្តីជាន់ខ្ពស់រូបនេះ រាជរដ្ឋាភិបាលកម្ពុជាប្តេជ្ញានឹងធ្វើឱ្យគម្រោងនេះលេចចេញជារូបរាងឱ្យបានជាដាច់ខាត បើទោះបីជាមានប្រទេសខ្លះសម្ដែងការព្រួយបារម្ភក៏ដោយ ព្រោះការសិក្សាបានបង្ហាញយ៉ាងលម្អិតថា គម្រោងនេះពុំបានបង្កផលប៉ះពាល់ណាមួយដល់បរិស្ថាននោះទេ។
ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់នៅក្នុងវេទិកាសារព័ត៌មានថា ការចោទប្រកាន់អំពីការខណ្ឌបែងចែកទឹកដីក្នុងគម្រោងព្រែកជីកហ្វូណន តេជោ ជាមួយប្រទេសជិតខាង គឺជារឿងពុំត្រឹមត្រូវឡើយ។ ពុំត្រឹមត្រូវ ក៏ដោយសារតែកម្ពុជា គ្មានមហិច្ឆតាយកទឹកដីរបស់ប្រទេសណាមួយសូម្បីតែមួយចង្អាម ហើយកម្ពុជា ក៏មិនអនុញ្ញាតឱ្យប្រទេសណាមួយយកទឹកដីរបស់ខ្លួន សូម្បីតែមួយចង្អាមដូចគ្នាដែរ។
គម្រោងជាប្រវត្តិសាស្រ្តរបស់កម្ពុជាមួយនេះ ត្រូវបានឯកឧត្តមឧបនាយករដ្ឋមន្ត្រី អះអាងដែរថា ការអភិវឌ្ឍគម្រោងនេះ មិនមានបច្ច័យប៉ះពាល់ដល់បរិស្ថាននៅកម្ពុជា ឬបរិស្ថានឆ្លងកាត់ព្រំដែនវៀតណាមួយឡើយ ហើយវាក៏មិនបានធ្វើឱ្យប៉ះពាល់ដល់លំហូរទឹករបស់ទន្លេមេគង្គនោះដែរ ដ្បិតថា ការសាងសង់ព្រែកជីកនេះ ពុំបានពុះជ្រៀកអាងទន្លេមេគង្គ នឹងធ្វើឱ្យបាត់បង់ទឹកសាបនោះទេ។
បើតាមឯកឧត្តមឧបនាយករដ្ឋមន្ត្រី ស៊ុន ចាន់ថុល កម្ពុជាមិនត្រូវការការសម្របសម្រួលណាមួយជាមួយប្រទេសវៀតណាម ពាក់ព័ន្ធនឹងគម្រោងព្រែកជីកនេះឡើយ ហើយកម្ពុជា ក៏គ្មានរបាយការណ៍ណាដែលត្រូវបង្ហាញជូនដែរ ប៉ុន្តែប្រសិនបើ វៀតណាមចង់ដឹងពីគម្រោងនេះ ត្រូវសួរទៅគណៈកម្មការទន្លេមេគង្គ។
បើយោងតាមការសិក្សា តាមរយៈគម្រោងព្រែកជីកហ្វូណន តេជោ វានឹងជួយកាត់បន្ថយការបំភាយឧស្ម័នផ្ទះកញ្ចក់ទៅក្នុងបរិស្ថាន និងកាត់បន្ថយថ្លៃដើមភស្តុភារកម្ម និងធ្វើឱ្យការវិនិយោគនៅកម្ពុជាកាន់តែមានភាពប្រសើរឡើង ដែលនឹងផ្ដល់ផលចំណេញដល់សេដ្ឋកិច្ចចន្លោះពី២០% ទៅ៣០% ហើយជីវភាពរបស់ពលរដ្ឋជាង១លាន៦សែននាក់ ដែលរស់នៅតាមបណ្ដោយព្រែកជីកនេះ ក៏នឹងមានភាពប្រសើរឡើងផងដែរ៕
