គុយបា បញ្ជាក់ថានាវាចម្បាំងរុស្សុី នឹងធ្វើដំណើរទៅដល់ទីក្រុងឡាហាវ៉ាន នៅសប្ដាហ៍ក្រោយ

(ឡាហាវ៉ាន)៖ ប្រទេសគុយបា បាននិយាយថានាវាចម្បាំងរុស្ស៉ីនឹងចូលចតនៅឯទីក្រុងឡាហាវ៉ាន នៅសប្ដាហ៍ក្រោយ ប៉ុន្តែបញ្ជាក់ថានាវាចម្បាំងទាំង៤គ្រឿងមិនមាន បំពាក់អាវុធនុយក្លេអ៊ែរទេ ហើយក៏មិនបង្កការគំរាមកំហែងអ្វីដល់តំបន់ទាំងមូលនោះដែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងសេចក្ដីថ្លែងការណ៍មួយកាលពីថ្ងៃព្រហស្បតិ៍ ទី៦ ខែមិថុនា (ម៉ោងក្នុងតំបន់) ក្រសួងការបរទេសគុយបា បានបញ្ជាក់ថា «ដំណើរទស្សនកិច្ចរបស់នាវាចម្បាំងរុស្ស៉ី គឺផ្សារភ្ជាប់ទៅនឹងទំនាក់ទំនងមិត្តភាពជាប្រវត្តិសាស្ត្ររវាងគុយបា និងសហព័ន្ធរុស្ស៉ី ព្រមទាំងអនុលោមតាមក្រឹត្យក្រមនៃច្បាប់អន្តរជាតិ»។ ក្រសួងបន្ថែមទៀតថាគ្មាន នាវាចម្បាំងណាមួយមានបំពាក់អាវុធនុយក្លេអ៊ែរនោះទេ ដូច្នេះទស្សនកិច្ចឈប់សំចតក្នុងប្រទេសរបស់យើង នឹងមិនបង្កការគំរាមកំហែងអ្វីដល់តំបន់នោះទេ។

គួរបញ្ជាក់ថា ការប្រកាសរបស់គុយបា កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីក្រុមមន្ត្រីអាមេរិកបានប្រាប់ក្រុមអ្នកសារព័ត៌មានថារុស្ស៉ីមានផែនការបញ្ជូន នាវាចម្បាំងទៅកាន់តំបន់ Caribbean ក្នុងនោះរួមមានគុយបា និងវ៉េណេស៊ុយអេឡា ដើម្បីដឹកនាំការធ្វើសមយុទ្ធយោធាជើងទឹក។ តាមសេចក្ដីថ្លែងការណ៍របស់ ក្រសួងការបរទេសគុយបា នាវាចម្បាំងរុស្ស៉ីគ្រោងនឹងធ្វើដំណើរទៅដល់ទីក្រុងឡាហាវ៉ាន នៅចន្លោះពីថ្ងៃទី១២ និងថ្ងៃទី១៧ ខែមិថុនា៕