មីយ៉ាន់ម៉ា ដែលជាប្រជាជាតិក្រីក្រមួយនៅក្នុងតំបន់ និងកំពុងហ៊ុំព័ទ្ធដោយសង្គ្រាមស៊ីវិលតែមានពលរដ្ឋដែលមានទ្រព្យ និងធនធានរាប់សិបនាក់បាននាំគ្នាសម្រុកមកទិញខុនដូនៅក្នុងប្រទេសថៃ រហូតអាជ្ញាធរចាត់វិធានការរឹតបន្តឹងលើលំហូរសាច់ប្រាក់ចេញក្រៅប្រទេស។ នៅក្នុងត្រីមាសទី១ដើមឆ្នាំ២០២៤នេះ ពលរដ្ឋមីយ៉ាន់ម៉ា បានក្លាយជាអតិថិជនលំដាប់ទី២ ដែលបានទិញខុនដូនៅថៃច្រើនជាងគេរហូតដល់ទៅ៣៩២យូនីតជាមួយតម្លៃជិត៦០លានដុល្លារ។
អាជ្ញាធរមីយ៉ាន់ម៉ា កំពុងចាត់វិធានការរឹបបន្តឹងការផ្ទេរប្រាក់ចេញក្រៅប្រទេស បន្ទាប់ពីពលរដ្ឋមីយ៉ាន់ម៉ា ដែលមានធនធានបានសម្រុកនាំគ្នាបញ្ចេញលុយទិញខុនដូនៅប្រទេសថៃ។ ជាក់ស្តែងនៅត្រីមាសទី១ឆ្នាំ២០២៤ ពលរដ្ឋមីយ៉ាន់ម៉ា បានក្លាយជាអ្នកទិញខុនដូនៅថៃច្រើនជាងគេលំដាប់ទីពីរ រហូតដល់៣៩២យូនីត ដែលមានតម្លៃសរុបជិត៦០លានដុល្លារអាម៉េរិក។ តាមរយៈចំណាត់ការរបស់អាជ្ញាធរមីយ៉ាន់ម៉ាលើការទិញខុនដូនៅប្រទេសថៃនេះ វានឹងទាញទម្លាក់បរិមាណលក់ខុនដូនៅក្នុងប្រទេសថៃឱ្យធ្លាក់ចុះនៅត្រីមាសទី២ និងទី៣នៃឆ្នាំ២០២៤។
លោក ប្រាសឺត ថេដូឡាយ៉ាសាធិត ( Prasert Taedullayasatit) ប្រធានសមាគមអ្នកអភិវឌ្ឈន៍ខុនដូថៃបាននិយាយថា ចាប់តាំងពីខែមេសា មកដល់ពេលនេះ អាជ្ញាធរមីយ៉ាន់ម៉ាបានចេញបទបញ្ជារឹតត្បិតរាល់ការផ្ទេប្រាក់ចេញក្រៅប្រទេសដែលមានទំហំសរុបដល់ទៅជាង២៧ លានដុល្លារ ដែលនាំឲ្យទីផ្សារខុនដូនៅថៃសុ្រតចុះ។
មជ្ឈមណ្ឌលព័ត៌មានអចលនទ្រព្យថៃបានអះអាងថា កាលពីឆ្នាំ២០២២ អ្នកទិញខុនដូមកពីប្រទេសមីយ៉ាន់ម៉ា ជាប់ចំណាត់ថ្នាក់ទី៦ បើនិយាយអំពីចំនួនយូនីតនៃខុនដូ ដែលបានលក់ចេញ តែឈរនៅលំដាប់ទី៣បើនិយាយអំពីតម្លៃ។
កាលពីឆ្នាំ២០២២ ពលរដ្ឋមីយ៉ាន់ម៉ាបានទិញខុនដូនៅថៃសរុបចំនួន៣៤៩យូនីត ដែលមានតម្លៃជាង៦៩លានដុល្លារ ហើយនៅឆ្នាំ២០២៣ បរិមាណនៃការទិញបានកើនឡើងដល់៥៦៤យូនីត ដែលមានតម្លៃជាង១០០លានដុល្លារ។ កំណើនពលរដ្ឋមីយ៉ាន់ម៉ាទិញខុនដូនៅថៃបានកើនឡើងតាំងពីផ្ទុះភាពចលាចលនយោបាយនៅក្នុងប្រទេសនេះតាំងពីនៅឆ្នាំ២០២១៕
