លទ្ធផលនៃការធ្វើតេស្តពិនិត្យសុខភាពហិរញ្ញវត្ថុក្នុងវិស័យធនាគារដោយធនាគារកណ្ដាលអាម៉េរិក បានបង្ហាញថា ធនាគារធំៗបំផុតរបស់សហរដ្ឋអាម៉េរិក បានឆ្លងផុតដំណាក់កាលវិបត្តិសេដ្ឋកិច្ចធ្ងន់ធ្ងរហើយ និងបន្តផ្តល់ឥណទានជាធម្មតា។ ទោះជាយ៉ាងណា ធនាគារធំៗទាំងនេះ នៅក្នុងឆ្នាំ២០២៤ នេះ អាចប្រឈមនឹងការខាតបង់ធ្ងន់ធ្ងរជាងឆ្នាំមុនទៅទៀត ប្រសិនបើសេដ្ឋកិច្ចធ្លាក់ចុះខ្លាំង។ នេះបើយោងតាមការចុះផ្សាយរបស់សារព័ត៌មាន CNN។
ដោយសារតែវិបត្តិក្នុងវិស័យធនាគារនឹងនាំទៅរកវិបត្តិសេដ្ឋកិច្ច ធនាគារកណ្តាលអាម៉េរិក បានធ្វើតេស្តពិនិត្យសុខភាពហិរញ្ញវត្ថុនៅក្នុងប្រព័ន្ធធនាគាររបស់សហរដ្ឋអាម៉េរិក ទាំងមូល។ ការធ្វើតេស្តពិនិត្យសុខភាពហិរញ្ញវត្ថុនៅពេលនេះកាន់តែមានសារៈសំខាន់ខ្លាំងឡើង បន្ទាប់ពីការដួលរលំនៃធនាគារអាម៉េរិកចំនួន៣ បានបង្កចលាចលនៅក្នុងប្រព័ន្ធធនាគារកាលពីឆ្នាំមុន។
លទ្ធផលនៃការធ្វើតេស្តនេះបានបង្ហាញថា ធនាគារធំៗចំនួន៣១ ដែលត្រូវបានតម្រូវឱ្យចូលរួមនៅក្នុងការធ្វើតេស្តពិនិត្យសុខភាពហិរញ្ញវត្ថុនេះ អាចនឹងខាតបង់រហូតដល់ទៅ៦៨៥ពាន់លានដុល្លារ ក្នុងឆ្នាំ២០២៤ នេះ ដោយកើនឡើង១៤៤ពាន់លានដុល្លារ បើធៀបនឹងលទ្ធផលនៃការធ្វើតេស្តកាលពីឆ្នាំមុន។
លោក ម៉ៃឃើល បា (Michael Barr) អនុប្រធានធនាគារកណ្ដាលអាម៉េរិក ទទួលលបន្ទុកផ្នែកត្រួតពិនិត្យបានលើកឡើងថា ការខាតបង់ជារួមកាន់តែខ្ពស់នេះ គឺដោយសារតែធនាគារនានា បានវិនិយោគលើទ្រព្យសកម្មដែលមានហានិភ័យខ្ពស់ និងបានបង្កើនការចំណាយកាន់តែខ្ពស់។ ហើយទន្ទឹមនេះ អត្រាការប្រាក់ខ្ពស់នាពេលបច្ចុប្បន្នបានធ្វើឱ្យការផ្ដល់ឥណទាននានារបស់ធនាគារកាន់តែមានហានិភ័យ ចំណាយកាន់តែខ្ពស់ និងកាត់បន្ថយប្រាក់ចំណេញរបស់ធនាគារ។
លោក ម៉ៃឃើល បា (Michael Barr) បានគូសបញ្ជាក់ថា គោលដៅនៃការធ្វើតេស្តពិនិត្យសុខភាពហិរញ្ញវត្ថុក្នុងវិស័យធនាគារដោយធនាគារកណ្ដាលអាម៉េរិកនេះ គឺដើម្បីជួយធានាថា ធនាគារនានាមានដើមទុនគ្រប់គ្រាន់សម្រាប់ទប់ការខាតបង់ក្នុងករណីជួបបញ្ហាធ្ងន់ធ្ងរ៕
