នាយករដ្ឋមន្រ្តីជប៉ុន សម្រេចលុបចោលគម្រោងទស្សនកិច្ចចេញក្រៅប្រទេស ក្រោយការព្រមានអំពីលទ្ធភាពនៃគ្រោះរញ្ជួយដីដ៏ធំ

(តូក្យូ)៖ នៅថ្ងៃសុក្រនេះ នាយករដ្ឋមន្រ្តីជប៉ុន លោក Fumio Kishida បានសម្រេចលុបចោល គម្រោងបំពេញទស្សនកិច្ចមួយ ចេញទៅកាន់តំបន់អាស៉ីកណ្តាល បន្ទាប់ពីក្រុមអ្នកវិទ្យាសាស្រ្តបានព្រមានថា ប្រទេសអាស៉ីខាងកើតមួយនេះ គួរតែត្រៀមលក្ខណៈ សម្រាប់លទ្ធភាពដែលកើនឡើង នៃគ្រោះរញ្ជួយដីដ៏ធំមួយ ក្នុងកម្រិតហៅថា «megaquake»។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី៩ ខែសីហា ឆ្នាំ២០២៤។

ទីភ្នាក់ងារឧតុនិយមជប៉ុន JMA បានចេញការព្រមានដូចខាងលើ កាលពីថ្ងៃព្រហស្បតិ៍សប្តាហ៍នេះ ក្រោយមនុស្សចំនួន៨នាក់ បានរងរបួស បន្ទាប់ពីមានការវាយប្រហារ ដោយគ្រោះរញ្ជួយដីធំៗ២ផ្ទួនគ្នា គឺកម្រិត៦.៩រ៉ិចទ័រ និង៧.‌១រ៉ិចទ័រ នៅក្បែរឆ្នេរសមុទ្រ​ភាគខាងត្បូងប្រទេស។

បើតាមផែនការគ្រោងទុក លោក Kishida​ ត្រូវធ្វើទស្សនកិច្ចទៅកាន់ ប្រទេសកាហ្សាក់ស្ថាន អ៊ូសបេគីស្ថាន និងម៉ុលហ្គោលី ហើយ​ក៏បានគ្រោងចូលរួម កិច្ចប្រជុំថ្នាក់តំបន់មួយផងដែរ។ យ៉ាងណាមិញ លោកបានប្រាប់ក្រុមអ្នកសារព័ត៌មានថា «ក្នុងនាម​ជា​នាយករដ្ឋមន្រ្តី ដែលមានការទទួលខុសត្រូវខ្ពស់បំផុត សម្រាប់ការងារគ្រប់គ្រងវិបត្តិ ខ្ញុំបានសម្រេចចិត្តថា ខ្ញុំគួរស្ថិតនៅក្នុងប្រទេស យ៉ាងណាច១សប្តាហ៍សិន»។

ទីភ្នាក់ងារ JMA បាននិយាយថា លទ្ធភាពនៃគ្រោះរញ្ជួយដីកម្រិតដ៏ធ្ងន់បំផុតមួយ នាពេលនេះគឺខ្ពស់ជាងធម្មតា ប៉ុន្តែមិនមែន​ជាសញ្ញាបង្ហាញថា វានឹងកើតមានឡើងប្រាកដតែម្តងឡើយ។ ពីមុនមករដ្ឋាភិបាលជប៉ុន ធ្លាប់បាននិយាយថា គ្រោះរញ្ជួយដីកម្រិត megaquake គឺ៨ទៅ៩រ៉ិចទ័រ មានលទ្ធភាពប្រហែល៧០-៨០ភាគរយ នឹងកើតឡើង ក្នុងចន្លោះពេល៣០ឆ្នាំខាងមុខ។

គួរបញ្ជាក់ថា កាលពីពេលឆ្លងឆ្នាំសកលកន្លងទៅ គ្រោះរញ្ជួយដីមួយកម្រិត៧.៦រ៉ិចទ័រ បានវាយប្រហារចំឧបទ្វីប Noto របស់ជប៉ុន ជាហេតុបណ្តាលឱ្យមានមនុស្សបាត់បង់ជីវិត យ៉ាងហោច៣១៨នាក់ ព្រមជាមួយអគារជាច្រើនត្រូវដួលរលំ។ ដោយឡែក កាលពី​ឆ្នាំ២០១១វិញ មហាគ្រោះរញ្ជួយដីក្រោមបាតុសមុទ្រ ដែលមានកម្រិតរហូតដល់៩.០រ៉ិចទ័រ បានវាយប្រហារក្បែរភាគឦសាននៃ​ប្រទេសជប៉ុន ហើយបង្កជារលកយក្សស៊ូណាមិ ដែលបានធ្វើឱ្យមនុស្សសរុបប្រមាណ ១៨,៥០០នាក់ស្លាប់ ឬបាត់ខ្លួន។ មិនតែប៉ុណ្ណោះ វាក៏បានបំផ្លាញរ៉េអាក់ទ័រចំនួន៣ នៅរោងចក្រថាមពលនុយក្លេអ៊ែរ Fukushima ផងដែរ ដែលជាមហន្តរាយនុយក្លេអ៊ែរធ្ងន់ធ្ងរ​បំផុត គិតចាប់តាំងពីមហន្តរាយនុយក្លេអ៊ែរ Chernobyl នៅអតីតសហភាពសូវៀត៕