ក្នុងរយៈពេលជាងមួយខែ កម្មវិធីទិដ្ឋាការមាស (Golden Visa) របស់ឥណ្ឌូណេស៊ីបានទាក់ទាញទឹកប្រាក់ជាង ២៦០លានដុល្លារ ដែលបើកឱកាសក្នុងការរួមចំណែកលើកកម្ពស់កំណើនសេដ្ឋកិច្ចជាតិ។
កម្មវិធីទិដ្ឋាការមាសរបស់ឥណ្ឌូណេស៊ី បានទាក់ទាញប្រាក់រហូតដល់ ៤ទ្រីលានរូពៀ ស្មើនឹងប្រហែល ២៦០លានដុល្លារ ជាមួយនឹងចំនួនអ្នកដាក់ពាក្យរហូតដល់ ៥០ម៉ឺននាក់ គិតចាប់ពីថ្ងៃដាក់ឲ្យដំណើរការរហូតដល់ថ្ងៃទី២៩ ខែសីហា។ នេះបើតាមសារព័ត៌មាន Tempo។
ភាគច្រើននៃអ្នកដាក់ពាក្យសុំទិដ្ឋាការមាស កំពុងដាក់ប្រាក់វិនិយោគរបស់ពួកគេនៅក្នុងវិស័យធនាគារ។ ការវិនិយោគទាំងនេះមានទម្រង់ជាប្រាក់សន្សំ និងមូលបត្របំណុល ដែលជាឧបករណ៍សម្រាប់វិនិយោគក្នុងទីផ្សារមូលធន ឬសញ្ញាប័ណ្ណរដ្ឋាភិបាល។
បច្ចុប្បន្ននេះ អ្នកវិនិយោគមួយចំនួនពីអាម៉េរិក អឺរ៉ុប និងមជ្ឈិមបូព៌ាកំពុងសិក្សាអំពីគោលនយោបាយនេះក្នុងការវិនិយោគលើវិស័យទេសចរណ៍ និងសេដ្ឋកិច្ចច្នៃប្រឌិត។ ទិដ្ឋាការមាសក៏ត្រូវបានគេរំពឹងថា នឹងជំរុញចំនួនភ្ញៀវទេសចរដែលហ៊ានចំណាយខ្ពស់ ចូលទៅឥណ្ឌូណេស៊ីនាពេលខាងមុខ។
ទិដ្ឋាការមាស អនុញ្ញាតឱ្យអ្នកវិនិយោគបរទេសរស់នៅឥណ្ឌូណេស៊ីក្នុងរយៈពេលពី ៥ ទៅ ១០ឆ្នាំ ប៉ុន្តែពួកគេត្រូវបញ្ជាក់ពីការវិនិយោគប្រហែល ៣៥០-៧០០ ០០០ដុល្លារ។ សម្រាប់សមាជិកក្រុមប្រឹក្សាភិបាល ឬតំណាងក្រុមហ៊ុនធំៗ ត្រូវមានការវិនិយោគពី២៥ ទៅ ៥០លានដុល្លារ។ លើសពីនេះ អ្នកទេសចរបរទេសដែលបំពេញតាមលក្ខណៈវិនិច្ឆ័យ និងទេពកោសល្យជាសកល ក៏អាចដាក់ពាក្យសុំទិដ្ឋាការនេះបានដែរ។
កន្លងមក កាលពីថ្ងៃទី២៥ ខែកក្កដា អតីតប្រធានាធិបតីឥណ្ឌូណេស៊ី លោក ចូកូ វីដូដូ បានប្រកាសដាក់ឱ្យដំណើរការកម្មវិធីទិដ្ឋាការរយៈពេលវែង ដើម្បីទាក់ទាញអ្នកវិនិយោគបរទេស ដោយគាំទ្រពួកគេឱ្យទទួលបានទិដ្ឋាការរយៈពេល១០ឆ្នាំ ដើម្បីចូលទៅកាន់សេដ្ឋកិច្ចដ៏ធំបំផុតនៅក្នុងតំបន់អាស៊ីអាគ្នេយ៍នេះ។
កម្មវិធីនេះ ជាផ្នែកមួយនៃកិច្ចខិតខំប្រឹងប្រែងរបស់ឥណ្ឌូណេស៊ីក្នុងការជំរុញកំណើនសេដ្ឋកិច្ច ការបង្កើតការងារ និងការផ្ទេរបច្ចេកវិទ្យា។ គោលបំណងនៃកម្មវិធី គឺដើម្បីទាក់ទាញភ្ញៀវទេសចរដែលមានគុណភាព និងបង្កើតលក្ខខណ្ឌអំណោយផលសម្រាប់ពលរដ្ឋបរទេសក្នុងការរួមចំណែកបន្ថែមទៀតដល់សេដ្ឋកិច្ចឥណ្ឌូណេស៊ី។
វិនិយោគិនអាចទទួលបានអត្ថប្រយោជន៍ជាច្រើន រួមទាំងការស្នាក់នៅរយៈពេលវែង គ្រួសារដែលមានការឧបត្ថម្ភ និងសក្តានុពលត្រឡប់មកវិញលើការវិនិយោគ។ កម្មវិធីនេះអនុញ្ញាតឱ្យសមាជិកគ្រួសារត្រូវបានរួមបញ្ចូលនៅក្នុងកម្មវិធី ដោយធានាថាប្តីប្រពន្ធ និងកូនក៏អាចទទួលបានបទពិសោធន៍ជីវិតនៅឥណ្ឌូណេស៊ីផងដែរ៕
