ប្រទេសម៉ាឡេស៊ីនឹងដំឡើងពន្ធលើភេសជ្ជៈផ្អែមបន្ថែមទៀត ដើម្បីកាត់បន្ថយការប្រើប្រាស់របស់ប្រជាពលរដ្ឋលើភេសជ្ជៈប្រភេទនេះ។ ការដាក់ចេញវិធានការបែបនេះរបស់រដ្ឋាភិបាលម៉ាឡេស៊ី ធ្វើឡើងដើម្បីទប់ស្កាត់ការកើតជំងឺទឹកនោមផ្អែម និងជំងឺមិនឆ្លងផ្សេងទៀត ដែលបានបង្ហាញនិន្នាការកើនឡើងជាបន្តបន្ទាប់។ នេះបើតាមការចេញផ្សាយរបស់សារព័ត៌មាននីកេ។
រដ្ឋមន្ត្រីក្រសួងសុខាភិបាលម៉ាឡេស៊ី លោកវេជ្ជបណ្ឌិត ចូកហ្វ្លាយ អាម៉េត (Dzulkefly Ahmad) បានប្រកាសកាលពីដើមសប្ដាហ៍មុនថា រដ្ឋាភិបាលម៉ាឡេស៊ីនឹងដំឡើងពន្ធលើភេសជ្ជៈផ្អែមបន្ថែមទៀត ខណៈសំណើសុំដំឡើងពន្ធនេះត្រូវបានដាក់បញ្ចូលក្នុងសេចក្តីព្រាងច្បាប់ថវិកាសម្រាប់ឆ្នាំ២០២៥ ដែលគ្រោងនឹងបញ្ជូនទៅពិភាក្សានៅក្នុងសភានៅថ្ងៃទី១៨ ខែតុលា ខាងមុខនេះ។
ប្រទេសម៉ាឡេស៊ី បានបង្កើនពន្ធលើភេសជ្ជៈផ្អែមម្តងរួចមកហើយកាលពីឆ្នាំ២០១៩ ដោយកំណត់យកពន្ធ៩សេនដុល្លារក្នុងមួយលីត្រសម្រាប់ភេសជ្ជៈដែលមានជាតិស្ករលើសពី៥ក្រាមក្នុង១០០មីលីលីត្រ និងភេសជ្ជៈផ្លែឈើ ឬបន្លែដែលមានជាតិស្ករលើសពី១២ក្រាមក្នុង១០០មីលីលីត្រ ប៉ុន្តែពន្ធនេះត្រូវបានលើកលែងចំពោះភេសជ្ជៈដែលធ្វើភ្លាមៗនៅតាមហាងអាហារ។
រដ្ឋាភិបាលម៉ាឡេស៊ី គ្រោងនឹងដំឡើងពន្ធលើភេសជ្ជៈប្រភេទនេះឱ្យឡើងដល់១១សេនដុល្លារក្នុងមួយលីត្រ ហើយតាមរយៈវិធានការពន្ធនេះ រដ្ឋមន្ត្រីក្រសួងសុខាភិបាលរំពឹងថា វានឹងជួយកាត់បន្ថយការប្រើប្រាស់ភេសជ្ជៈផ្អែមបានប្រមាណ៩,២៥% នៅទូទាំងប្រទេស។
ការដាក់ចេញវិធានការដំឡើងពន្ធលើភេសជ្ជៈផ្អែមរបស់រដ្ឋាភិបាលម៉ាឡេស៊ីនេះ ធ្វើឡើងក្រោយប្រទេសនេះកំពុងប្រឈមនឹងបញ្ហាសុខភាពសាធារណៈ ពោលគឺចំនួនអ្នកកើតជំងឺទឹកនោមផ្អែម ជំងឺធាត់ហួស និងជំងឺមិនឆ្លងផ្សេងទៀតមាននិន្នាការកើនឡើង។
ការស្ទង់មតិសុខភាពជាតិ និងជំងឺប្រចាំឆ្នាំ២០២៣ របស់ក្រសួងសុខាភិបាលម៉ាឡេស៊ី បានបង្ហាញថា ពលរដ្ឋម៉ាឡេស៊ីប្រហែល៣,៦លាននាក់ ស្មើនឹង១៥,៦%នៃមនុស្សពេញវ័យមានជំងឺទឹកនោមផ្អែម ហើយពលរដ្ឋជាងកន្លះលាននាក់ទៀតបានកើតជំងឺមិនឆ្លងសំខាន់ៗរួមទាំងជំងឺទឹកនោមផ្អែម ជំងឺលើសឈាម និងជំងឺធាត់ ដែលបានកើនឡើងពី៤៤,៥% ក្នុងឆ្នាំ២០១១ ដល់៥៤,៤% ក្នុងឆ្នាំ២០២៣៕
