ក្រោយភ្ជាប់ជាមួយឡាវ និងវៀតណាម ចិនគ្រោងបង្កើតគម្រោងផ្លូវរថភ្លើងល្បឿនលឿនទៅកាន់ប្រទេសសិង្ហបុរីបន្ថែមទៀត ដើម្បីពង្រីកសេដ្ឋកិច្ច និងវិស័យទេសចរណ៍ បើទោះបីជាប្រទេសមួយចំនួនបារម្ភអំពីការជំពាក់បំណុលរបស់ចិន ក៏ដោយ។ នេះបើតាមការចេញផ្សាយរបស់សារព័ត៌មាន The Edge។
ប្រទេសចិន បានចំណាយថវិកាចំនួន៦ពាន់លានដុល្លារអាម៉េរិក ដើម្បីបង្កើតគម្រោងផ្លូវរថភ្លើងល្បឿនលឿនមួយខ្សែដោយឆ្លងកាត់វាលស្រែ និងព្រៃភ្នំតភ្ជាប់ពីចិន ទៅប្រទេសឡាវ និងបានចំណាយថវិកាជាង៦ពាន់លានដុល្លារ សាងសង់គម្រោងផ្លូវដែកភ្ជាប់ជាមួយវៀតណាម ដើម្បីជំរុញសេដ្ឋកិច្ច និងទំនាក់ទំនងពាណិជ្ជកម្មក្នុងតំបន់។
ក្រៅពីប្រទេសទាំងពីរនេះ ទីក្រុងប៉េកាំង គ្រោងបន្តពង្រីកផ្លូវរថភ្លើងឆ្ពោះទៅភាគខាងត្បូងជាបន្តទៀតរហូតដល់ព្រំដែននៃប្រទេសសិង្ហបុរី ដោយឆ្លងកាត់ប្រទេសម៉ាឡេស៊ី ដែលកំពុងស្វែងរកទុនវិនិយោគពីចិន ដើម្បីសាងសង់គម្រោងផ្លូវដែកល្បឿនលឿនទៅកាន់ប្រទេសសិង្ហបុរី ដែលមានចម្ងាយផ្លូវជាង៤ពាន់គីឡូម៉ែត្រ។ ទោះបីដឹងថា ការបង្កើតផ្លូវរថភ្លើងនេះនឹងធ្វើឱ្យម៉ាឡេស៊ីប្រឈមនឹងការជាប់បំណុលរបស់ចិនក៏ដោយ ក៏ប្រទេសនេះនៅតែត្រូវការវិនិយោគិនរបស់ចិនដដែល។
រដ្ឋមន្ត្រីក្រសួងដឹកជញ្ជូនម៉ាឡេស៊ី លោក អេនថូនី ឡូកេ ហ្វូក (Anthony Loke Siew Fook) បានប្រាប់ Bloomberg ក្នុងបទសម្ភាសនៅទីក្រុងគូឡាឡាំពួរថា ទីក្រុងប៉េកាំង កំពុងក្លាយជាជើងឯកខាងអភិវឌ្ឍន៍ផ្លូវដែក ហើយផ្លូវដែកទាំងនេះកំពុងផ្សារភ្ជាប់ចិនជាមួយនឹងទ្វីបអាស៊ី។
ក្រុមអ្នករិះគន់បានលើកឡើងថា តាមរយៈគម្រោងនេះ ប្រាកដណាស់ប្រទេសពាក់ព័ន្ធនឹងមិនអាចគេចផុតពីបំណុលរបស់ចិនបានឡើយ ហើយការវិនិយោគបែបនេះ ចង់ ឬមិនចង់វានឹងក្លាយជាផ្នែកមួយក្នុងការជួយបម្រើផលប្រយោជន៍សេដ្ឋកិច្ច និងភូមិសាស្ត្រនយោបាយរបស់ប្រទេសចិន។
ជាក់ស្ដែងប្រទេសឡាវ ដែលមានទំហំសេដ្ឋកិច្ចជាង១៥ពាន់លានដុល្លារអាម៉េរិក បានជំពាក់បំណុលចិនធំជាងទំហំសេដ្ឋកិច្ចរបស់ខ្លួនទៅទៀត បើទោះបីគម្រោងផ្លូវដែកល្បឿនលឿនឡាវ-ចិន បានជួយបង្កើនសេដ្ឋកិច្ចប្រទេសនេះយ៉ាងណាក៏ដោយ៕
