ក្រុមហ៊ុនអង់គ្លេស PricewaterhouseCoopers International ហៅកាត់ PWC ដែលជាក្រុមហ៊ុនសវនកម្មគណនេយ្យធំបំផុតទី២ របស់ពិភពលោកបានអះអាងថា ប្រភេទអាជីវកម្មដែលប្រើប្រាស់បច្ចេកវិទ្យាបញ្ញាសិប្បនិមិត្ត AI បានជួយឱ្យបុគ្គលិករបស់ខ្លួនបង្កើនផលិតភាពការងារខ្ពស់ជាងធម្មតារហូតដល់ទៅជិត៥ដងឯណោះ ដែលនេះនាំមកនូវក្ដីសង្ឃឹមកាន់តែខ្លាំងឡើងសម្រាប់ការជំរុញកំណើនសេដ្ឋកិច្ចទូទាំងពិភពលោក។ នេះបើយោងតាមការចុះផ្សាយរបស់សារព័ត៌មានធំៗជាច្រើន។
ក្រុមហ៊ុន PwC បានបញ្ជាក់ថា ផលិតភាពការងារក្នុងវិស័យសេវាកម្មវិជ្ជាជីវៈ និងហិរញ្ញវត្ថុ និងក្នុងវិស័យបច្ចេកវិទ្យាព័ត៌មាន(IT)បានកើនឡើង៤,៣%ចន្លោះឆ្នាំ២០១៨ ដល់ឆ្នាំ២០២២ បើធៀបនឹងកំណើនត្រឹមតែ០,៩% នៅទូទាំងវិស័យសំណង់ ផលិតកម្ម និងការលក់រាយ ចំណីអាហារ និងការដឹកជញ្ជូន។
ក្រុមហ៊ុន PwC បានលើកឡើងថា ទិន្នន័យនេះបង្ហាញថា ការប្រើប្រាស់បច្ចេកវិទ្យាបញ្ញាសិប្បនិម្មិត AI អាចជួយប្រទេសនានាបញ្ចប់វិបត្តិកំណើនផលិតភាពការងារទាប ហើយជាលទ្ធផលវានឹងជួយជំរុញកំណើនសេដ្ឋកិច្ច ប្រាក់ឈ្នួល និងស្តង់ដារនៃការរស់នៅកាន់តែល្អប្រសើរ។
លោកស្រី ខារ៉ូល ស្តាប៊ីងស៍ (Carol Stubbings) ប្រធានផ្នែកទីផ្សារ និងសេវាកម្មពន្ធ និងច្បាប់សកលនៃក្រុមហ៊ុន PwC បានលើកឡើងថា នេះឆ្លុះបញ្ចាំងឱ្យឃើញថា បច្ចេកវិទ្យាបញ្ញាសិប្បនិម្មិត AI បានដើរតួនាទីយ៉ាងសំខាន់នៅក្នុងការបង្កើនផលិតភាពការងារ។
អ្នកជំនាញរូបនេះបានបន្ថែមថា ខណៈដែលអាជីវកម្មកាន់តែច្រើនឡើងចាប់ផ្ដើមប្រាស់បច្ចេកវិទ្យាបញ្ញាសិប្បនិម្មិត AI ការប្រើប្រាស់បច្ចេកវិទ្យានេះត្រូវបានរំពឹងថា នឹងកើនឡើងជាលំដាប់យ៉ាងឆាប់រហ័សនៅថ្ងៃអនាគត៕
