Jeff Bezos ត្រូវបានបាត់បង់ឋានៈជាមហាសេដ្ឋីលំដាប់ទី ២ របស់ពិភពលោក ដោយបានធ្លាក់មកលេខ ២ ខណៈដែលមហាសេដ្ឋីជំនួញឥណ្ឌា Gautam Adani ឡើងចំណាត់ថ្នាក់យ៉ាងឆាប់រហ័សនៃ បញ្ជីឈ្មោះមហាសេដ្ឋីរបស់ Bloomberg ។ ជាមួយគ្នានេះ Elon Musk នៅតែជាមហាសេដ្ឋីលេខ ១ ដោយទ្រព្យសម្បត្តិក្រោមឈ្មោះរបស់គាត់គិតជាទឹកប្រាក់សរុប ២៦០ ពាន់លានដុល្លារ។ គួរបញ្ជាក់ដែរថា លោក Adani បានចំណាយពេលតិចជាង ១០ ខែ ដើម្បីឈានដល់ចំណាត់ថ្នាក់លេខ ២។
វាជាលើកទីមួយហើយដែលបុគ្គលមកពីអាស៊ីបានជាប់ចំណាត់ថ្នាក់ខ្ពស់ក្នុងបញ្ជីរបស់ Bloomberg ដែលក្នុងបញ្ជីមហាសេដ្ឋីនេះត្រូវបានគ្រប់គ្រងដោយសហគ្រិនបច្ចេកវិទ្យាស្បែកសជាយូរមកហើយ។
ទ្រព្យសម្បត្តិ ១៤៦.៩ ពាន់លានដុល្លាររបស់ Adani ដែលភាគច្រើនត្រូវបានស្ថិតក្រោមការកាន់កាប់នៃក្រុមហ៊ុន Adani Group ដ៏ធំរបស់គាត់។ គួរបញ្ជាក់ផងដែរថាក្នុងក្រុមហ៊ុន Adani Group ដ៏ធំនេះមានដំណើរការអាជីវកម្មជាច្រើន រួមទាំងកំពង់ផែ និងធ្យូងថ្ម ដែលបានរីកចម្រើនក្នុងប៉ុន្មានឆ្នាំថ្មីៗនេះ។
ភាគហ៊ុនរបស់ក្រុមហ៊ុន Adani មួយចំនួនបានកើនឡើងច្រើនជាង ១,០០០% ចាប់តាំងពីខែមិថុនា ឆ្នាំ ២០២០ ដោយឆ្លុះបញ្ចាំងពីសុទិដ្ឋិនិយមរបស់វិនិយោគិនអំពីភាពរឹងមាំរបស់ក្រុមហ៊ុននៅក្នុងវិស័យដូចជាហេដ្ឋារចនាសម្ព័ន្ធ និងថាមពលកកើតឡើងវិញ ដែលនាយករដ្ឋមន្ត្រី Narendra Modi បានផ្តល់អាទិភាពសម្រាប់ការអភិវឌ្ឍន៍។ ភាគហ៊ុននៃក្រុមហ៊ុន Adani Enterprises ដ៏ល្បីល្បាញរបស់គាត់បានកើនឡើងច្រើនជាង ១១៥% ក្នុងឆ្នាំ ២០២២។
