(ភ្នំពេញ)៖ ថវិកាសរុបជាង ៧០៥ លានរៀល និងជាង ២១ ម៉ឺនដុល្លារអាមេរិក ត្រូវបានសប្បុរសជនជាង ២ ម៉ឺននាក់ បានចូលរួមបរិច្ចាគជូនមូលនិធិគន្ធបុប្ផាកម្ពុជា ដែលរួមមានសមាជិកកិត្តិយស, សមាជិកគាំទ្រ, សប្បុរសជនផ្សេងៗ ព្រមទាំងថវិកាបរិច្ចាគតាមហិបគោលដៅមួយចំនួន។
យោងតាមមូលនិធិគន្ធបុប្ផាកម្ពុជា បានឱ្យដឹងថា ក្នុងខែកក្កដា ឆ្នាំ ២០២២ នេះ, មូលនិធិគន្ធបុប្ផាកម្ពុជា បានទទួលថវិកាបរិច្ចាគសរុបចំនួន ៧០៥១៤០ ១០០ រៀល និង ២១២ ២៣៣ ដុល្លារអាមេរិក ពីសប្បុរសជនសរុប ១៩ ៨៦៤ រូប។
ជាមួយគ្នានេះ មូលនិធិ គន្ធបុប្ផាកម្ពុជា ក៏ទទួលបានថវិកាចំនួន ៨០ ២៨៦ ដុល្លារអាមេរិក ពីការកាត់កម្រៃសំបុត្រចូលទស្សនាតំបន់រមណីយដ្ឋានអង្គរ របស់គ្រឹះស្ថានអង្គរ សម្រាប់ត្រីមាសទី ២ ឆ្នាំ ២០២២។
មូលនិធិគន្ធបុប្ផាកម្ពុជា បានលើកឡើងដោយថ្លែងអំណរគុណយ៉ាងជ្រាលជ្រៅជូនសប្បុរសជនទាំងអស់ ចំពោះការបន្តគាំទ្រ និងចូលរួមចលនាកៀរគរអំណាយ ឧបត្ថម្ភធន និងវិភាគទាន ដើម្បីធានាចីរភាពនៃប្រភពចំណូលសម្រាប់ទ្រទ្រង់ ផ្នែកហិរញ្ញវត្ថុចំពោះមន្ទីរពេទ្យគន្ធបុប្ផាទាំង ៥ ទីតាំង។
មូលនិធិគន្ធបុប្ផាកម្ពុជា បានបញ្ជាក់ថា ៖ «ការបរិច្ចាគនេះនឹងធ្វើឱ្យមន្ទីរពេទ្យគន្ធបុប្ផាទាំង ៥ ទីតាំង អាចដំណើរការជាប្រក្រតី ប្រកបដោយនិរន្តរភាព ក្នុងការបន្តការផ្តល់សេវាពិនិត្យ និងព្យាបាលជំងឺទារក និងកុមារ ដោយឥតគិតថ្លៃ និងប្រកបដោយគុណភាព ដែលបម្រើដល់គោលនយោបាយលើកកម្ពស់សុខុមាលភាពសង្គម របស់រាជរដ្ឋាភិបាល»។
ជាមួយគ្នានេះដែរ មូលនិធិគន្ធបុប្ផាកម្ពុជា ក៏សូមបន្តលើកទឹកចិត្តដល់សប្បុរសជន ទាំងក្នុង និងក្រៅប្រទេស ចូលរួម បរិច្ចាគចូលជាសមាជិករបស់មូលនិធិគន្ធបុប្ផាកម្ពុជា ដែលមាន ២ ប្រភេទគឺ៖
(១) សមាជិកកិត្តិយស បរិច្ចាគចាប់ ពី ២០ លានរៀលឬ ៥ ០០០ ដុល្លារអាមេរិក ក្នុងមួយឆ្នាំ ឬ (២) សមាជិកគាំទ្រ បរិច្ចាគ ចាប់ពី ៥ ០០០ រៀល ក្នុងមួយខែ ឬ ៦០ ០០០ (ហុកសិបពាន់) រៀល ក្នុងមួយឆ្នាំ ដើម្បីបង្ហាញពីសាមគ្គីភាព ក្នុងស្មារតី «ខ្មែរជួយខ្មែរ» ។
ការបរិច្ចាគនេះ មានតាមរយៈបណ្តាធនាគារដៃគូដែលរួមមាន ORIMI ABA, ACLEDA, Canadia, Chip Mong, Sathapana, Wing, Vattanac, J Trust Royal, ARDB, Cambodian Public និងភ្នាក់ងារ True Money ឬតាមរយៈលេខទូរសព្ទ ០៦១ ៧០ ៩៩ ៩៩៕
