នៅព្រឹកថ្ងៃអង្គារ៧រាច ខែចេត្រ ឆ្នាំជូត ទោស័កព.ស.២៥៦៤ ត្រូវនឹងថ្ងៃទី១៤ ខែមេសា ឆ្នាំ២០២០ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងមេដឹកនាំអាស៊ានដទៃទៀត នឹងបើកកិច្ចប្រជុំពិសេសស្តីពីបញ្ហាបង្កឡើងដោយជំងឺកូវីដ-១៩ ដែលកិច្ចប្រជុំនេះធ្វើឡើងតាមរយៈប្រព័ន្ធវីដេអូពីចម្ងាយ (Video Conference)។
ភ្នំពេញៈ នៅក្នុងកិច្ចប្រជុំកំពូលអាស៊ាននៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន នឹងថ្លែងពីផលប៉ះពាល់នៃជំងឺកូវីដ១៩ ទៅលើការអភិវឌ្ឍសេដ្ឋកិច្ច សង្គម និងកំណើនសេដ្ឋកិច្ចពិភពលោក និងផលប៉ះពាល់យ៉ាងធ្ងន់ធ្ងរនៃជំងឺកូវីដ ១៩ ទៅលើសន្តិសុខ សេដ្ឋកិច្ច ពាណិជ្ជកម្ម និងកិច្ចការសង្គម។ នេះបើតាមសេចក្តីប្រកាសព័ត៌មានក្រសួងការបរទេសកាលពីថ្ងៃទី ១២ ខែមេសា។
កិច្ចប្រជុំកំពូលអាស៊ានពិសេស និងកិច្ចប្រជុំកំពូលអាស៊ានបូក ៣ ពិសេសដែលធ្វើឡើងតាមរយៈប្រព័ន្ធវីដេអូនេះគឺមានការចូលរួមពីមេដឹកនាំរបស់អាស៊ាន និងអាស៊ានបូក៣ រួមមានចិន ជប៉ុននិងកូរ៉េ ដើម្បីឆ្លើយតបទៅនឹងការរាតត្បាតនៃជំងឺកូវីដ១៩ ខណៈដែលជំងឺនេះកំពុងរីករាលដាលនៅជុំវិញពិភពលោក។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងសន្និសីទសារព័ត៌មានស្តីពីបច្ចុប្បន្នភាពនៃជំងឺកូវីដ១៩ កាលពីថ្ងៃចន្ទថា ការប្រជុំអាស៊ាននេះគឺជាការផ្លាស់ប្តូរបទពិសោធគ្នាទៅវិញទៅមកចំពោះការសម្រេចខាងនយោបាយថ្នាក់ដឹកនាំជាន់ខ្ពស់គឺកម្រិតប្រមុខរដ្ឋាភិបាល។ នេះគឺជាការផ្តល់ផលប្រយោជន៍ឱ្យគ្នាទៅវិញទៅមក សម្រាប់ការផ្លាស់ប្តូរបទពិសោធខាងការសម្រេចនៃនយោបាយរបស់កម្ពុជាជាមួយប្រទេសក្នុងតំបន់ក៏ដូចជាដៃគូ ៣ ទៀត។
លោកថ្លែងថា៖ «ខ្ញុំយល់ថា ប្រមុខរដ្ឋាភិបាលនៃប្រទេសនៅក្នុងតំបន់របស់យើងនឹងផ្លាស់ប្តូរបទពិសោធអំពីបញ្ហានេះអំពីការទប់ស្កាត់នូវជំងឺឆ្លងកូវីដ ១៩ ក៏ដូចជាប្រមុខនៃរដ្ឋាភិបាលអាស៊ាន និងអាស៊ានបូក ៣ កូរ៉េ ជប៉ុន ចិន ទៀត»។
បើតាមសេចក្តីប្រកាសព័ត៌មាន ក្រសួងការបរទេសផលប៉ះពាល់ពីជំងឺកូវីដ ទាមទារនូវកិច្ចខិតខំប្រឹងប្រែងរួមគ្នាជាអន្តរជាតិប្រកបដោយប្រសិទ្ធភាព និងទាន់ពេលវេលា ដើម្បីឆ្លើយតបទៅនឹងការគំរាមកំហែងនៃជំងឺកូវីដ ១៩។
សេចក្តីប្រកាសព័ត៌មានបញ្ជាក់ថា៖ «កិច្ចប្រជុំកំពូលពិសេសទាំង ២ នេះគឺជាព្រឹត្តិការណ៍ដ៏សំខាន់បន្ថែមទៀតដែលឆ្លុះបញ្ចាំងអំពីការរួបរួមរបស់អាស៊ាន តាមរយៈសកម្មភាពរួមនៃការជួយគ្នាទៅវិញទៅមកការលើកកម្ពស់ការឆ្លើយតបដោយធ្វើសកម្មភាពយ៉ាងឆាប់រហ័ស និងប្រកបដោយប្រសិទ្ធភាពនៅក្នុងការគ្រប់គ្រងជំងឺ និងពង្រឹងភាពរឹងមាំរបស់តំបន់»។
លោក ង្វៀន សួនហ្វុក នាយករដ្ឋមន្ត្រីវៀតណាមដែលជាប្រធានអាស៊ានប្តូរវេននៅឆ្នាំនេះនឹងបើកកិច្ចប្រជុំទាំង ២ នេះដោយត្រូវធ្វើឡើងតាមរយៈប្រព័ន្ធវីដេអូ (Video Conference)៕
