នៅក្នុងសម័យប្រជុំវិសាមញ្ញមួយនៅវេលាព្រឹកនេះ សមាជិកព្រឹទ្ធសភាទាំងអស់បានបោះឆ្នោតគាំទ្រសេចក្តីព្រាងច្បាប់ស្តីពី «ការដាក់ប្រទេសក្នុងភាពអាសន្ន» ដែលរុញច្បាប់នេះទៅដល់ដំំណាក់កាលចុងក្រោយនៃការអនុម័តនិងមានសុពលភាពជាផ្លូវការ។
សម័យប្រជុំនេះបានធ្វើឡើង បន្ទាប់ពីគណៈកម្មការនីតិកម្ម និងយុត្តិធម៌របស់ព្រឹទ្ធសភា កាលពីថ្ងៃពុធ បានបញ្ចប់ការសិក្សារបស់ខ្លួនស្តីពី ច្បាប់ស្តីពី «ការដាក់ប្រទេសក្នុងភាពអាសន្ន» ហើយបានលើកឡើងថា ច្បាប់នេះមិនបានរំលោភរដ្ឋធម្មនុញ្ញឬច្បាប់ណាមួយនៅក្នុងប្រទេសកម្ពុជាទេ។
មុនពេលការបោះឆ្នោត សមាជិកព្រឹទ្ធសភាទាំង ៥៤ បានជជែកដេញដោលគ្នានិងបង្ហាញទស្សនៈរបស់ខ្លួនលើសេចក្តីព្រាងច្បាប់។ ក្នុងអំឡុងពេលប្រជុំអ្នកតំណាងទាំងអស់នៃក្រុមពិភាក្សាបានសម្តែងការគាំទ្រដល់សេចក្តីព្រាងច្បាប់នេះ ។
ឯកឧត្តម ខៀវ មុត សមាជិកព្រឹទ្ធសភានិងជាអតីតរដ្ឋលេខាធិកាក្រសួងបរិស្ថានបានមានប្រសាសន៍ថា៖« ច្បាប់នេះមានសារៈសំខាន់ខ្លាំងណាស់នៅពេលដែលព្រះរាជាណាចក្រកម្ពុជាកំពុងប្រយុទ្ធប្រឆាំងជាមួយនឹងជំងឺ COVID-19»។
លោកឯកឧត្តមបន្តថា៖ «ច្បាប់ក៏អាចមានប្រយោជន៍ផងដែរនៅពេលអនាគតនៅពេលមានអាសន្នដទៃទៀតដូចជាការរាតត្បាតកើតឡើងម្តងទៀត ឬសង្គ្រាមជាដើម» ។
ជាមួយគ្នានេះដែរ ឯកឧត្តមសុខ ឥសាន ជាសមាជិកព្រឹទ្ធសភាម្នាក់ទៀតនិងជាអ្នកនាំពាក្យគណបក្សកាន់អំណាចនៅក្នុងអង្គប្រជុំបានច្រានចោលការចោទប្រកាន់ដែលថា ច្បាប់នេះនឹងត្រូវបានប្រើដោយរដ្ឋាភិបាលដើម្បីគាបសង្កត់សិទ្ធិនិងសេរីភាពរបស់ប្រជាជន។
លោក បានមានប្រសាសន៍ថា៖« គោលបំណងដែលនៅពីក្រោយច្បាប់នេះគឺដើម្បីការពារជីវិតនិងផលប្រយោជន៍របស់ប្រជាជនក៏ដូចជាការអភិវឌ្ឍន៍របស់ប្រទេសជាតិក្នុងរយៈពេលវែងយូរអង្វែង» ។
ឯកឧត្តម សុខ ឥសាន បានសង្កត់ធ្ងន់ថា រដ្ឋាភិបាលប្រទេសជាច្រើននៅលើសកលលោក រួមទាំងប្រទេសលោកខាងលិចផងដែរបានប្រកាសដាក់ប្រទេសក្នុងស្ថានភាពអាសន្នរួចទៅហើយ។
យោងតាមការឲ្យដឹងរបស់ លោក ម៉ម ប៊ុននាង អ្នកនាំពាក្យព្រឹទ្ធសភា សេចក្តីព្រាងច្បាប់ ដែលទទួលបានអនុមត្តជាឯកច្ឆន្ចពីសភាជាន់ខ្ពស់នឹងត្រូវដាក់ជូនក្រុមប្រឹក្សាធម្មនុញ្ញពិនិត្យឡើងវិញមុនពេលដាក់ជូនព្រះមហាក្សត្រឬប្រមុខរដ្ឋស្តីទីដើម្បីចុះហត្ថលេខា ដើម្បីក្លាយជាច្បាប់ធរមាន៕
