ទាក់ទិននឹងប្រភពផ្ទុះចេញនៃកូរ៉ូណាវីរុសប្រភេទថ្មី នៅទីក្រុងវូហានប្រទេសចិន លោករដ្ឋមន្ត្រីការបរទេសអាមេរិក បាននិយាយកាលពីថ្ងៃអាទិត្យ ទី៣ឧសភា ដោយបានអះអាងថា គេមានភស្តុតាងជាក់ច្បាស់ជាច្រើន ដែលបញ្ជាក់ថា មេរោគនេះ បានធ្លាយចេញពីមន្ទីរពិសោធន៍សិក្សាមេរោគរបស់ចិន នៅទីក្រុងវូហាន។
តើមេរោគកូរ៉ូណាវីរុសប្រភេទថ្មី ដែលបង្កជម្ងឺកូវីដ១៩ ពិតជាបានបែកធ្លាយចេញពីមន្ទីរពិសោធន៍មួយកន្លែង នៅទីក្រុងវូហានមែនឬ? រហូតមកទល់ពេលនេះ គឺគ្មានអ្វីមកបញ្ជាក់នោះទេ។ គឺមានតែពាក្យចចាមអារ៉ាម។
តែយ៉ាងណា លោកMike Pompeo ប្រមុខការទូតអាមេរិក បានថ្លែងនៅថ្ងៃអាទិត្យ ទី៣ឧសភា នៅតាមបណ្តាញទូរទស្សន៍ ABC ដោយអះអាងចំៗថា គេមានភស្តុតាងយ៉ាងច្បាស់ និងដ៏ច្រើន ដែលបញ្ជាក់ថា មេរោគកូរ៉ូណាវីរុសប្រភេទថ្មី ពិតជាបានឆ្លងចេញពីមន្ទីរពិសោធន៍នៅក្រុងវូហាន។ តែយ៉ាងណា រដ្ឋមន្ត្រីអាមេរិករូបនេះ បានបដិសេធ មិនឆ្លើយទេ ថាភស្តុតាងទាំងនោះ បញ្ជាក់ថា វាជាការទំលាយមេរោគចេញដោយចេតនា ឬដោយអចេទនា។
លោក Mike Pompeo បានបន្ថែមថា៖ កន្លងមកនរណាក៏ដឹងដែរ ថាចិនគឺជាអ្នកដើរចម្លងមេរោគ នៅទូទាំងពិភពលោក ហើយមន្ទីរពិសោធមន៍ស្រាវជ្រាវមេរោគនៅចិន ពុំមានគោរពលក្ខខណ្ឌសុវត្ថិភាព ឲ្យបានត្រឹមត្រូវម៉ដ្ឋចត់ឡើយ។ ហើយវាក៏មិនមែនជាលើកទីមួយដែរ ដែលពិភពលោកយើង ត្រូវបានចិនបង្កគ្រោះថ្នាក់ ដោយសារតែមេរោគបែកធ្លាយចេញពីមន្ទីរពិសោធន៍ចិន។
បន្ទាប់មកទៀត លោកប្រមុខការទូតអាមេរិករូបនេះ បានលើកឡើងថា រដ្ឋាភិបាលចិនគ្មានការសហការជាមួយអ្នកដ៏ទៃ ក្នុងការស្រាវជ្រាវវែកញែក រកការពិតជាក់ច្បាស់ ស្តីពីប្រភពនៃមេរោគនេះឡើយ។ លោកបន្ថែមថា អាជ្ញាធរចិន នៅតែរឹងទទឹង បន្តរារាំងក្រុមអ្នកជំនាញអន្តរជាតិ និងក្រុមស្រាវជ្រាវវិជ្ជសាស្ត្រ មិនឲ្យចូលទៅដល់តំបន់ដែលផ្ទុះការឆ្លងជំងឺកូវីដ១៩នេះទេ។ លោកអះអាងថារហូតមកទល់ពេលនេះ អ្នកជំនាញអន្តរជាតិ នៅតែមិនទាន់ទទួលបាន គំរូមេរោគកូរ៉ូណាប្រភេទថ្មី ដែលចិនស្រង់បានពេលដំបូងៗនោះទេ។
គួរបញ្ជាក់ថា ទាក់ទិនទៅនឹងប្រភពនៃការចម្លងជំងឺកូវីដ១៩នេះនៅវូហាន បើផ្អែកតាមដំណឹងនិងទិន្នន័យផ្តល់ឲ្យដោយអាជ្ញាធរចិនអ្នកជំនាញបរទេសជាច្រើនអះអាងថា មេរោគនេះ បានឆ្លងចេញពីសត្វ តែមិនដឹងថាសត្វអ្វីឲ្យពិតប្រាដក ហើយបានឆ្លងមកមនុស្ស ដោយរៀបណានោះទេ។ កាលពីប៉ុន្មានថ្ងៃមុននេះ អង្គការសុខភាពពិភពលោក បានសំដែងការខកចិត្ត ដោយឃើញអាជ្ញាធរចិនបើកការស្រាវជ្រាស្តីពីប្រភពនៃការឆ្លងមេរោគកូរ៉ូណាប្រភេទថ្មីនេះ តែដោយមិនបានអញ្ជើញអង្គការសុខភាពពិភពលោក ឲ្យចូលរួមជាមួយទេ៕
