ភ្នំពេញ៖ ថ្ងៃទី ៣ មិថុនា ២០២០ ប្រទេសកម្ពុជាយើងពុំមានរកឃើញករណីជំងឺកូវីដ-១៩ ថ្មីទេនោះទេ។ ដូច្នេះចំនួនសរុបកូវីដ-១៩ គឺនៅសរុប ១២៥ នាក់ដដែល ខណៈចំនួនសំរាកពេទ្យនៅមាន២នាក់ និងចំនួនជាសះស្បើយសរុបចំនួន១២៣នាក់ (ស្លាប់គ្មាន) ។ នេះបើយោងតាមសេចក្ដីប្រកាសព័ត៌មានរបស់នាយកដ្ឋានប្រយុទ្ធនឹងជំងឺឆ្លង នៅមុននេះបន្ដិច។
នាយដ្ឋានប្រយុទ្ធនឹងជំងឺឆ្លងបន្ដថា ជំងឺកូវីដ-១៩ នៅតែបន្តគម្រាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ ។
យើងត្រូវបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំ ។ ល។ ដោយក្នុងនោះក៏ត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ។ ល។
សូមបញ្ជាក់ផងដែរថា ប្រទេសកម្ពុជាយើងបានរកឃើញករណីជំងឺកូវីដ១៩ ដំបូងបំផុតនៅថ្ងៃទី ២៧ មករា ២០២០។ ហើយគិតមកដល់ពេលនេះ កម្ពុជាយើងបានធ្វើតេស្តរកមេរោគកូវីដ១៩នេះមនុស្សសរុបចំនួន ២១,៥១៧ ដែលស្មើនឹងចំនួន ១,២៩៦ ក្នុងចំណោមមនុស្ស ១ លាននាក់។
គួរជម្រាបផងដែរថា សម្រាប់អ្នកជំងឺកូវីដ១៩ នៅសល់ ០២ នាក់នេះ គឺកំពុងទទួលការតាមដានយ៉ាងយកចិត្ដទុកដាក់ពីសំណាក់ក្រុមគ្រូពេទ្យជំនាញ។ ដោយក្នុងនោះអ្នកជំងឺម្នាក់ម្នាក់កំពុងសម្រាកព្យាបាលនៅមន្ទីរពេទ្យមិត្ដភាពខ្មែរសូវៀត និងម្នាក់ទៀតកំពុងសម្រាកព្យាបាលនៅមន្ទីរពេទ្យមិត្ដភាពកម្ពុជាជប៉ុន មង្គលបុរីនៃខេត្ដបន្ទាយមានជ័យ នេះបើតាមការឲ្យដឹងរបស់ក្រសួងសុខាភិបាលកម្ពុជាកាលពីពេលកន្លងទៅ៕
