អាមេរិកចាប់ផ្តើមដំណើរការបង្កើតច្បាប់រឹតបន្តឹងសិទ្ធិប៉ូលិស ដើម្បីឆ្លើយតបតាមសំណើពលរដ្ឋដែលផ្ទុះការតវ៉ាទូទាំងប្រទេស ទាមទារឱ្យបញ្ឈប់ការប្រើអំណាចហួសហេតុលើពលរដ្ឋស្បែកខ្មៅ ក្រោយករណីស្លាប់បុរសអាមេរិកាំងស្បែកខ្មៅម្នាក់កាលពីកន្លះខែមុន។
ច្បាប់ថ្មី Justice in Policing Act 2020 (យុត្តិធម៌នៅក្នុងសកម្មភាពប៉ូលិសឆ្នាំ២០២០) តាក់តែងឡើងកាលពីថ្ងៃចន្ទដើមសប្តាហ៍នេះដោយក្រុមសមាជិកសភាមកពីគណបក្សប្រជាធិបតេយ្យ។
គណៈកម្មការនីតិកម្មនៃសភាអាមេរិកបានចេញសេចក្តីប្រកាសព័ត៌មាននៅថ្ងៃទី៨ ខែមិថុនា ថា ច្បាប់នេះគឺជាយន្តការគ្រប់ជ្រុងជ្រោយថ្មីមិនធ្លាប់មាន បង្កើតឡើងដើម្បីផ្លាស់ប្តូរវប្បធម៌នៃការអនុវត្តច្បាប់របស់មន្រ្តីប៉ូលិស និងកសាងទំនុកចិត្តដល់ពលរដ្ឋចំពោះការពង្រឹងច្បាប់។
ច្បាប់ដែលមាន ១១ចំណុចនោះ នឹងចាប់បង្ខំប៉ូលិសក្នុងរដ្ឋនីមួយៗបំពាក់កាមេរ៉ាជាប់ខ្លួន និងតាមរថយន្ត ហាមប្រើវិធីសង្កត់ ឬក្លេរ.ក និងហាមប៉ូលិសមិនឱ្យវាយឆ្មក់ដោយគ្មានការជូនដំណឹង។ ច្បាប់នេះដែរ ក៏ហាមអាជ្ញាធរគ្រប់ជាន់ថ្នាក់ពីការរើសអើងពូជសាសន៍ សាសនា និងរើសអើងបុគ្គល ហើយត្រូវឆ្លងកាត់ការបណ្តុះបណ្តាលពីបញ្ហាទាំងនេះសម្រាប់ពេលចុះបំពេញភារកិច្ច៕
