2020-07-02
យោងតាមការចេញផ្សាយរបស់ស្ថានទូតកម្ពុជាប្រចាំប្រទេសថៃបានអោយដឹង ពេលរដ្ឋាភិបាលថៃប្រកាសអនុញ្ញាតអោយអ្នកដំណើរមួយចំនួនចូលទៅក្នុងប្រទេសថៃវិញហើយ ដែលអ្នកដំណើរទាំង ១១ ប្រភេទនេះអាចចេញចូលចាប់ពីថ្ងៃទី១ ខែកក្កដា ឆ្នាំ២០២០ នេះតទៅ។ ក្នុងអ្នកដំណើរទាំងអស់នោះមានតែអ្នកដំណើរទាំង ១១ ប្រភេទប៉ុណ្ណោះដែលអាចចេញចូលធម្មតាក្នុងប្រទេសថៃបាន អ្នកដំណើរទាំងអស់នោះរួមមាន
១. អ្នកមានសញ្ជាតិថៃ
២. អ្នកដែលទទួលបានការលើកលែង ឬជាករណីដែលនាយករដ្ឋមន្ត្រីអនុញ្ញាត ឬអញ្ជើញចូលមកប្រទេសថៃ
៣. អង្គទូត មន្ត្រីកុងស៊ុល តំណាងអង្គការអន្តរជាតិ ឬតំណាងរដ្ឋាភិបាល និងស្ថាប័នបរទេស ដែលមកបំពេញបេសកកម្មនៅក្នុងប្រទេសថៃ ឬមន្ត្រីស្ថាប័នដែលក្រសួងការបរទេសអនុញ្ញាតតាមភាពចាំបាច់ ព្រមទាំងស្វាមី/ភរិយា ឱពុកម្ដាយ ឬកូនរបស់មន្ត្រីទាំងនោះ។
៤. អ្នកដឹកជញ្ជូនទំនិញចាំបាច់ ប៉ុន្ដែ ពេលបញ្ចប់ភារកិច្ច ត្រូវចេញពីប្រទេសថៃវិញភ្លាម
៥. អ្នកបញ្ជាយានយន្ដ ដែលមានភាពចាំបាច់ត្រូវចូលមកតាមភារកិច្ច ដោយមានការកំណត់ពេលវេលាចាកចេញច្បាស់លាស់
៦. ជនបរទេសដែលជាភរិយា/ស្វាមីជាជនជាតិថៃ ព្រមទាំងឪពុកម្ដាយ ឬកូនរបស់គាត់
៧. ជនបរទេសដែលមានបណ្ណស្នាក់នៅ ឬមានផ្ទះនៅក្នុងប្រទេសថៃ
៨. ជនបរទេសដែលមានបណ្ណអនុញ្ញាតការងារ ឬទទួលបានការអនុញ្ញាតឲ្យចូលមកបំពេញការងារ នៅក្នុងប្រទេសថៃ ព្រមទាំងស្វាមី/ភរិយា និងកូនរបស់គាត់
៩. សិស្ស និងនិស្សិតបរទេស ដែលសិក្សានៅក្នុងប្រទេសថៃ ព្រមទាំងអាណាព្យាបាលរបស់ពួកគេ
១០. ជនបរទេស ដែលមានភាពចាំបាច់ត្រូវចូលមកព្យាបាលជំងឺ និងអ្នកអមដំណើរ ប៉ុន្ដែ មិនមែនករណីនាំចូលមកព្យាបាលកូវីដ-១៩ទេ
១១. ជនបរទេស ដែលទទួលបានការអនុញ្ញាតឲ្យចូលមកកាន់ប្រទេសថៃ តាមការព្រមព្រៀងពិសេសរវាងប្រទេសថៃ និងប្រទេសនោះ។
ប្រភពដដែលបានបញ្ជាក់ទៀតថា ជនដែលចូលមកប្រទេសថៃ ត្រូវអនុវត្តន៍តាមលក្ខខណ្ឌកាលបរិច្ឆេទនិងគោលការណ៍ច្បាប់របស់ប្រទេសថៃច្បាប់ការទប់ស្កាត់ជំងឺឆ្លង និងច្បាប់ដាក់តាមប្រទេសក្នុងគ្រាអាសន្ននិងត្រូវអនុវត្តន៍តាមវិធានការសុខាភិបាលតឹងរឹងព្រមទាំងដាក់ខ្លួនអោយស្ថិតនៅដោយឡែកតាមទីតាំងដែលកំណត់ដោយរដ្ឋ៕
