ឯកឧត្តមទេសរដ្ឋមន្ត្រី ស៊ុន ចាន់ថុល តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំយកម៉ាស៊ីនផលិតទឹកបរិសុទ្ធដោយបរិយាកាស-WATERGEN (ប្រភេទ GEN-M) ១គ្រឿងជូនដល់មន្ទីរពេទ្យគន្ទបុប្ផា
ថ្ងៃសុក្រ ១០កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែសីហា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញ ជាអធិបតីក្នុងពិធីប្រគល់-ទទួលម៉ាស៊ីនផលិតទឹកបរិសុទ្ធដោយបរិយាកាស-WATERGEN (ប្រភេទ GEN-M) ដែលជាអំណោយដ៏ថ្លៃថ្លារបស់សម្តេច ជូនមន្ទីរពេទ្យគន្ធបុប្ផា ដោយមានការអញ្ជើញចូលរួមពី មន្ត្រីជាន់ខ្ពស់ក្រសួង លោក Denis Laurent ប្រធាននាយកប្រតិបត្តិនៃមន្ទីរពេទ្យគន្ធបុប្ផា និងបុគ្គលិក ក្រោមឱវាទមន្ទីរពេទ្យផងដែរ។
ថ្លែងក្នុងពិធីប្រគល់-ទទួលនាឱកាសនោះ ឯកឧត្តមទេសរដ្ឋមន្ត្រីបានគូសបញ្ជាក់អំពីលក្ខណៈពិសេស ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ-WATERGEN (ប្រភេទ GEN-M) ជាបច្ចេកវិទ្យា មកពីប្រទេសអ៊ីស្រាអែល មានសមត្ថភាពអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស បានប្រមាណ៨០០លីត្រក្នុងមួយថ្ងៃ ដោយមិនចាំបាច់តភ្ជាប់ជាមួយប្រភពទឹកទុយោ និងអាចផ្គត់ផ្គង់ទឹក ប្រកបដោយគុណភាព សុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។
លើសពីនេះទៀត ឯកឧត្តមទេសរដ្ឋមន្ត្រី បានលើកឡើងថា៖ ម៉ាស៊ីននេះអាចផ្តល់អត្ថប្រយោជន៍សម្រាប់ បងប្អូនប្រជាពលរដ្ឋដែលនាំយកកូនៗមកសម្រាកព្យាបាលជំងឺនៅមន្ទីពេទ្យនេះ ពោលគឺ៖ ពួកគាត់អាចប្រើប្រាស់ទឹកដែលផលិតដោយម៉ាស៊ីននេះ ចូលរួមកាត់បន្ថយការប្រើប្រាស់ថង់ផ្លាស្ទីកបង្កផលប៉ះពាល់បរិស្ថាន ជួយសន្សំសំចៃថវិកាពួកគាត់បានមួយចំណែក ជាពិសេស ម៉ាស៊ីននេះអាចយកទៅប្រើប្រាស់នៅតាមសាលារៀន មន្ទីរពេទ្យ មណ្ឌលសុខភាពរបស់បណ្ដាភូមិ ឃុំ ស្រុកទាំងឡាយណាដែលខ្វះខាតទឹកប្រើប្រាស់បានផងដែរ។
គួរកត់សម្គាល់ថា៖ អំណោយដ៏ថ្លៃថ្លារបស់សម្តេចតេជោនាយករដ្ឋមន្រ្តីនាឱកាសនេះ គឺជាការបង្ហាញនូវ កាយវិការប្រកបដោយមនុស្សធម៌ ដែលសម្តេចតែងតែគិតគូរយកចិត្តទុកដាក់ខ្ពស់ចំពោះសុខទុក្ខរបស់បង ប្អូនប្រជាពលរដ្ឋ ធ្វើយ៉ាងណាឱ្យសុខមាលភាព និងជីវភាពរស់នៅរបស់បងប្អូនកាន់តែមានភាពប្រសើរឡើងពីមួយថ្ងៃទៅមួយថ្ងៃ។
ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅ និងវាយតម្លៃ ខ្ពស់ចំពោះគុណបំណាច់ដ៏ធំធេងរបស់អតីតស្ថានិកមន្ទីរពេទ្យគន្ធបុប្ផា Beat Richner ដែលបានខិត ខំប្រឹងប្រែងលះបង់កម្លាំងកាយចិត្តដើម្បីកុមារកម្ពុជា ពិសេសលោកគ្រូពេទ្យ អ្នកគ្រូពេទ្យ ព្រមទាំង បុគ្គលិកមន្ទីរពេទ្យគន្ធបុប្ផាទាំងអស់ ដែលបានខិតខំប្រឹងប្រែងបំពេញការងារមិនខ្លាចនឿយហត់ក្នុងបុព្វ ហេតុជួយសង្គ្រោះកុមារកម្ពុជាឱ្យអស់ពីសមត្ថភាព ដោយឥតគិតថ្លៃ ដែលកិច្ចខិតខំប្រឹងប្រែងនេះ គឺជាការ ចូលរួមចំណែកដ៏ប្រពៃក្នុងការលើកកម្ពស់សុខុមាលភាពកុមារកម្ពុជា។
ជាទីបញ្ចប់ ឯកឧត្តមទេសរដ្ឋមន្ត្រី បានសំណូមពរឱ្យបងប្អូនប្រជាពលរដ្ឋដែលនាំបុត្រធីតាជាទីស្រឡាញ់ របស់ខ្លួនទៅសម្រាកព្យាបាលជំងឺនៅក្នុងមន្ទីរពេទ្យនេះ សូមជួយថែរក្សាម៉ាស៊ីននេះឱ្យបានគង់វង្ស ដើម្បី អាចប្រើប្រាស់បានយូរអង្វែងទាំងអស់គ្នា៕
