យោងតាមសេចក្ដីប្រកាសរបស់ រាជរដ្ឋាភិបាលកម្ពុជា បានយល់ព្រមផ្តល់ដីបឹងតាមោក (បឹងកប់ស្រូវ) ទំហំ២០ហិកតា ស្ថិតនៅទល់មុខទីតាំងដី អគ្គបញ្ជាការដ្ឋានក្រសួងការពារជាតិ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ ដើម្បីរៀបចំទីតាំងសាងសង់សាខាមន្ទីរពេទ្យកាល់ម៉ែត សម្រាប់បម្រើសេវាពិនិត្យព្យាបាលជំងឺជូនប្រជាពលរដ្ឋ។អានសេចក្ដីលម្អិតខាងក្រោម ដែលចេញផ្សាយដោយទូរទស្សន៍ជាតិកម្ពុជា ទទក - TVK៖
.jpg)
គួរបញ្ជាក់ផងដែរថា កាលពីថ្ងៃទី២៤ខែធ្នូឆ្នាំ២០២០ សម្រេចកែសម្រួលផ្ទៃបឹងតាមោក(កប់ស្រូវ) ដែលកំណត់ក្នុងអនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ ដោយកាត់ចេញនូវផ្ទៃដីទំហំ២៧.៦៥៩ ម៉ែត្រក្រឡា ស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ធ្វើអនុបយោគជាដីឯកជនរបស់រដ្ឋ និងប្រគល់ជាកម្មសិទ្ធិជូនគ្រួសារកងរាជអាវុធហត្ថលើផ្ទៃប្រទេស ចំនួន១៦គ្រួសារ។
ជាមួយគ្នានេះ រដ្ឋបាលរាជធានីភ្នំពេញ ទីស្តីការគណៈ រដ្ឋមន្ត្រី កាលពីថ្ងៃទី២៤ ខែធ្នូ ឆ្នាំ២០២០ បានសម្រេច កាត់ឆ្វៀលដី ចំនួន ១៩៦ ហិកតា ចេញពីអនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ ស្តីពីការកំណត់ផ្ទៃបឹង តាមោក ធ្វើប្រទានកម្ម ជូនលោកស្រី អ៊ុយ បូរី និងលោកស្រី គង់ សុធី។
ក្នុងលិខិត បានបញ្ជាក់ថា ករណីខាងលើ ទីស្តីការគណៈរដ្ឋមន្ត្រី សូមជម្រាបជូនថា រាជរដ្ឋាភិបាល បានយល់ព្រមអនុញ្ញាត ឱ្យឆ្វៀលដីទំហំ ១៩៦,៥៦៥៩ ហិកតា ស្ថិតនៅសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ដូចមានក្នុងគំនូសប្លង់ បង្ហាញទីតាំង និងនិយាមកាភ្ជាប់មក ជាមួយ ចេញពីអនុក្រឹត្យលេខ២០ អនក្រ.បក ចុះថ្ងៃទី៣ ខែកុម្ភៈ ឆ្នាំ២០១៦ ស្តីពីការកំណត់ ផ្ទៃបឹងតាមោក (កប់ស្រូវ) ទំហំ ៣.២៣៩,៧ ហិកតា ស្ថិតនៅក្នុងរាជធានីភ្នំពេញជាសម្បត្តិ សាធារណៈរបស់រដ្ឋ ដើម្បីធ្វើប្រទានកម្ម ជូនលោកស្រី អ៊ុយ បូរី និងលោកស្រី គង់ សុធី ដោយយក ពន្ធ ជាបន្ទុករដ្ឋ និងលើកលែងសេវាអន្តរក្រសួង សេវាសុរិយោដីនានា៕
