តើអ្នកដែលពិនិត្យសុខភាពហិរញ្ញវត្ថុឬអត់? ដូចនឹងសុខភាពរាងកាយនិងសុខភាពផ្លូវចិត្តដែរ សុខភាពហិរញ្ញវត្ថុគឺមានសារសំខាន់ណាស់សម្រាប់ជីវិតយើង។ សុខភាពហិរញ្ញវត្ថុ (Financial Health) សំដៅលើការយល់ដឹង ការស្គាល់នូវការគ្រប់គ្រងហិរញ្ញវត្ថុឲ្យមានប្រសិទ្ធិភាពដើម្បីទទួលបានភាពរឹងមាំនិងអាចឈានទៅសម្រេចគោលដៅសុវត្ថិភាពហិរញ្ញវត្ថុនាពេលអនាគត។ មានវិធីសាស្រ្តជាច្រើនដែលអាចប្រើប្រាស់សម្រាប់ពិនិត្យសុខភាពនេះបាន ឧទាហរណ៏ដូចជាការពិនិត្យសុខភាពហិរញ្ញវត្ថុផ្លូវកាដោយផ្ដោតលើពិន្ទុក្រឌីតតាមរយៈCBC ជាដើម ប៉ុន្តែថ្ងៃនេះ យើងនឹងលើកយកតែ ៥ ចំនុចដែលងាយៗហើយអ្នកអាចសាកវិភាគដោយខ្លួនឯងបាន។ សញ្ញាទាំង៥រួមមាន៖
1. អ្នកមានប្រាក់សន្សំ
ការមានប្រាក់សន្សំអាចនិយាយបានថាជាការមានសុវត្ថិភាពមួយ ដោយអ្នកពុំសូវភ័យព្រួយលើកង្វះខាតប្រាក់កាស ជាពិសេសក្នុងពេលមានអាសន្នអន់ក្រដែលអាចកើតមានគ្រប់ពេលវេលា។ ការសន្សំប្រាក់ អាចជាសញ្ញាបង្ហាញថាអ្នកយល់ច្បាស់អំពីគោលដៅ និងធ្វើឲ្យមានទំនុកចិត្តលើដំណើរបំពេញគោលដៅហិរញ្ញវត្ថុរយៈពេលវែងរបស់ពួកគេ។
2. អ្នកមានចំណូលគ្រប់គ្រាន់សម្រាប់បំពេញចំណាយចាំបាច់
មានចំណូលជារឿងសំខាន់ ហើយអ្វីដែលកាន់តែសំខាន់ជាងនោះទៀតគឺចំណូលគួរតែគ្រប់គ្រាន់សម្រាប់បំពេញនូវកាតព្វកិច្ចហិរញ្ញវត្ថុសំខាន់ទាំងឡាយដូចជា ថ្លៃផ្ទះ ថ្លៃការសិក្សា ម្ហូបអាហារប្រចាំថ្ងៃ ល។ បើសិនជាក្នុងករណីដែលចំណូលមានគ្រប់សម្រាប់ចំណាយចាំបាច់ ក៏ប៉ុន្តែអ្វីដែលនៅសេសសល់គឺស្ដួចស្ដើងពេកដែលធ្វើឲ្យអ្នកមិនអាចបែងចែកសម្រាប់សន្សំឬចំនាយតាមត្រូវការនោះទេ ក៏នៅតែជាបញ្ហាដែរ។ ដូចនេះ អ្វីដែលអ្នកអាចធ្វើបានគឺយើងត្រូវព្យាយាមស្វែងរកចំណូលបន្ថែមដើម្បីមកបង្រ្គប់នូវតម្រូវការទាំងនេះ។
3. អ្នកមានចំណាយតិចជាងចំណូល
ចំណាយមិនអាចរត់លឿនជាងចំណូលទេ ហើយក៏មិនត្រូវឲ្យមានល្បឿនស្មើគ្នាដែរ។
បើអ្នកស្គាល់ច្បាស់ពីលំហូរចូលនិងចេញ មានកម្រិតថវិកាចំណាយត្រឹមត្រូវដើម្បីរារាំងទំនោរចាយលើសចំណូល តែងតែសល់ប្រាក់ជានិច្ចនាពេលចុងខែ ព្រមទាំងពុំមានទម្លាប់ដែល «លុយប្រាក់ខែបើកមកប៉ុន្មានត្រូវតែចាយអស់ប៉ុន្នឹងដែរ» អាចបញ្ជាក់បានថា អ្នកកំពុងមានស្ថានភាពល្អដែលត្រូវបន្តរក្សានិងពង្រឹងបន្ថែមទៀត។
4. អ្នកមិនមានបំណុលអាក្រក់
ចំនុចនេះផ្ដោតលើបំណុលអាក្រក់ ជំនួសឲ្យការនិយាយថា«បំណុល» ពីព្រោះបំណុលអាចមានល្អនិងអាក្រក់។ បើសិនជាអ្នកជំពាក់បំណុលអាក្រក់ឬអាចនិយាយម៉្យាងទៀតថាបំណុលដែលពុំផ្ដល់នូវជាផលត្រលប់មកវិញនោះទេ នោះចំណូលដែលអ្នកខំរកមកប្រៀបដូចជាកាត់កងសម្រាប់តែបំណុលអត់ប្រយោជន៍ដែលពិតជាប៉ះពាល់ខ្លាំងណាស់ដល់ទិដ្ឋភាពផ្សេងៗទៀតនៃហិរញ្ញវត្ថុ។
5. អ្នកកំពុងធ្វើដំណើរទៅសម្រេចគោលដៅហិរញ្ញវត្ថុ
សុខភាពហិរញ្ញវត្ថុល្អជាស្ពានសម្រាប់ឆ្លងចាប់យកឱកាសលំនឹងនិងសុវត្ថិភាពខាងប្រាក់កាសនាពេលអនាគត។ការមានផែនការគោលដៅហិរញ្ញវត្ថុច្បាស់លាស់ដែលផ្ដល់នូវ ផ្លែផ្កានាពេលអនាគត អាចបង្ហាញថាអ្នកកំពុងមានសុខភាពហិរញ្ញវត្ថុល្អ។ ក្នុងគោលដៅនោះអាចមានជាការវិនិយោគទុន ការមានធានារ៉ាប់រង ការសន្សំសម្រាប់ចូលនិវត្តន៍ -ល-។ សញ្ញានេះសបញ្ជាក់ថាអ្នកបានគិតគូរជាពិសេសក្នុងទិដ្ឋភាពហិរញ្ញវត្ថុអនាគតសម្រាប់ខ្លួនឯងនិងក្រុមគ្រួសារ។
ទន្ទឹមនឹងមើលថែរក្សាសុខភាពរាងកាយនិងផ្លូវចិត្ត ការមើលថែសុខភាពហិរញ្ញវត្ថុផ្ទាល់ខ្លួនក៏ជាកាតព្វកិច្ចសំខាន់ផងដែរ។ បើសិនជាអ្នកមានការគ្រប់គ្រងបានយ៉ាងល្អទៅលើប្រាក់សន្សំ ការគ្រប់គ្រងចំណូលចំណាយ ដោយពុំពាក់ព័ន្ធនឹងបំណុលមិនល្អ ជាពិសេសគឺមានគោលដៅហិរញ្ញវត្ថុច្បាស់លាស់មួយ នោះអ្នកកំពុងតែដើរត្រូវផ្លូវហើយ។តើអ្នកគិតថាសុខភាពហិរញ្ញវត្ថុរបស់អ្នកដូចម្ដេចដែរនាពេលបច្ចុប្បន្ននេះ? រឹងមាំហើយ? ត្រូវការសង្រ្គោះបន្ទាន់? មកចែករំលែកជាមួយយើងក្នុងប្រអប់ខមិនខាងក្រោមនេះ។
ប្រភព: CamboFinance
