កាលពីពេលថ្មីនេះ ប្រទេសវៀតណាមបានស្នើមកកម្ពុជាឲ្យបើកការនាំចូលត្រីចំនួន ៤ ប្រភេទ មានដូចជា ត្រីប្រា ត្រីពោធ ត្រីអណ្ដែង និងត្រីឆ្ដោជាដើម។ ការស្នើរឲ្យកម្ពុជាលុបចោលការផ្អាកនាំចូលត្រីពីប្រទេសរបស់ខ្លួននេះគឺធ្វើឡើងក្រោយ កម្ពុជាសម្រេចថាផ្អាកនាំចូលត្រី ៤ ប្រភេទពីប្រទេសវៀតណាមកាលពីថ្ងៃទី ០៨ ខែ មករា ឆ្នាំ ២០២១ កន្លងទៅនេះ។
ឆ្លើយតបទៅនឹងសំណើរភាគីខាងវៀតណាម ឯកឧត្ដម វេង សាខុន រដ្ឋមន្រ្ដី ក្រសួង កសិកម្ម រុក្ខាប្រមាញ់និងនេសាទ បានមានប្រសាសន៍យ៉ាងដូច្នេះថា ការផ្អាកជាបណ្តោះអាសន្ននូវការនាំចូលផលិតផលជលផលពីក្រៅស្រុកគឺដោយសារផលិតផលពីវិស័យវារីវប្បកម្មក្នុងស្រុកមានការកើនឡើងហើយប្រជាពលរដ្ឋកម្ពុជាកំពុងចាប់ផ្តើមប្រកបរបរវារីវប្បកម្មក៏មានចំនួនកើនឡើងដែរ។
ដោយសារតែកំណើននៃការចិញ្ចឹមត្រីនេះកើនឡើងលើសការវាយតម្លៃ ដែលមានប្រជាជនរហូតដល់ ២៦២៥ គ្រួសារ ដែលបានចាប់យករបរចិញ្ចឹមត្រីនេះ។ ដើម្បីចូលជួយកុំឲ្យត្រីក្នុងស្រុកចាលឬខ្វះទីផ្សារលក់ចេញនោះ ខាងក្រសួងកសិកម្មក៏បានចុះត្រួតពិនិត្យមើល ថាតើមានអ្វីខ្លះ ដែលអាចជួយប្រជាជនបាន? ហើយមានតែការផ្អាកនាំចូលត្រីពីបណ្ដាប្រទេសជិតខាងនេះ ទើបអាចជួយលើកស្ទួយផលិតផលក្នុងស្រុក និងលើកទឹកចិត្ដដ៏ប្រពលរដ្ឋផងដែរ។នេះបើយោងតាមការផ្ដល់បទសម្ភាសន៍រវាងឯកឧត្ដម វេន សាខុន និង វិទ្យុបារាំង (RFI)។
តាមប្រភពខាងលើបានឲ្យដឹងទៀតថា ឯកឧត្ដម វេង សាខុន បានបញ្ជាក់ហេតុផល ដែលកម្ពុជាគួរគិតពីប្រយោជន៍របស់ប្រជាកសិករ ធំជាងបញ្ហាដែលភាគីម្ខាងទៀតលើកឡើង។ ឯកឧត្ដមបានបន្ដទៀត “យើងគ្មានអ្វីដែលនឹងត្រូវចរចាទាំងអស់ ព្រោះយើងបានតាមការអនុលោមនិង អនុវត្ដតាមកិច្ចព្រមព្រៀង(WPO)។ ហើយអ្វីដែលសំខាន់នោះគឺ យើងត្រូវដោះស្រាយបញ្ហាដែលប្រជាជនប្រឈមនៅចំពោះមុខ ព្រោះវារីវប្បករទាំងអស់បានខ្ចីធានាគារអភិវឌ្ឍជនបទនិងកសិកម្ម ម្នាក់ ៥ ម៉ឺន ម្នាក់ ១០ម៉ឺនដុល្លារ ហើយខ្លះទៀត ២០ម៉ឺនដុល្លារ ដើម្បីយកមកធ្វើអាជីវកម្ម ហើយត្រូវជាខាតបង់ទៅវិញ នោះយើងនឹងបាត់បង់ធនធានថវិការជាតិ ដែលធនាគារអភិវឌ្ឍន៍ជនបទនិងកសិកម្មបានចេញមួយគាត់។ ហើយទី២ គឺបាក់ទឹកចិត្ដប្រជាជនយើងដែលជាអ្នកចិញ្ចឹម យើងបានគិតគូឲ្យបានគ្រប់ជ្រុងជ្រោយទាក់ទិននឹងបញ្ហាហ្នឹង។ហើយសម្រាប់ត្រីចំនួន ៤ ប្រភេទនោះ គឺវាមានចំនួនតិចតួចមែនទែន មិនគួរណាភាគីខាងវៀតណាមយកមកធ្វើជាបញ្ហាត្រីមុខទេ”៕
