សាលារាជធានីភ្នំពេញនៅថ្ងៃទី២មិថុនានេះ បានប្រកាសទុកពេលមួយសប្ដាហ៍ឲ្យពលរដ្ឋកំពុងរស់នៅលើផ្ទៃទឹកនៃភូមិសាស្ត្ររាជធានីភ្នំពេញ រុះរើផ្ទះបណ្ដែតទឹក ផ្ទះទូកតូចៗ និងសំណង់មិនរៀបរយលើផ្ទៃទឹកនិងបែចិញ្ចឹមត្រី ចេញជាបន្ទាន់ ចាប់ពីថ្ងៃទី២រហូតដល់ថ្ងៃទី៩មិថុនា។ ជំនួសឲ្យការរស់នៅលើផ្ទៃទឹកសាលារាជធានីភ្នំពេញលើកទឹកចិត្តឲ្យពលរដ្ឋដែលកំពុងរស់នៅលើផ្ទៃទឹក ឡើងមករស់នៅនិងចិញ្ចឹមត្រីនៅក្នុងស្រះលើដីគោកវិញ។
បទបញ្ជារបស់សាលារាជធានីភ្នំពេញយ៉ាងដូច្នេះធ្វើឡើងបន្ទាប់ពីពិនិត្យឃើញថា កន្លែងរស់នៅលើទឹកខ្លះបានប្រែក្លាយជាកន្លែងស្នាក់នៅដោយខុសច្បាប់យ៉ាងអណាធិបតេយ្យដែលបង្ករឲ្យបាត់បង់សណ្ដាប់ធ្នាប់ ប៉ះពាល់ដល់ផ្លូវនាវាចរ។ ក៏មានដែរការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឲ្យខូចខាតយ៉ាងធ្ងន់ធ្ងរដល់ជីវៈចម្រុះ ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាពនៃប្រជាពលរដ្ឋដែលបានប្រើប្រាស់ទឹកមិនស្អាតផងដែរ។
បើតាមសាលារាជធានីភ្នំពេញបន្ទាប់ពីឱសានវាទមួយសប្ដាហ៍ចូលជាធរមាន បើស្ថានភាពមិនមានការផ្លាស់ប្ដូរទេ អាជ្ញាធររាជធានីភ្នំពេញនឹងចាត់រដ្ឋបាលដោយពុំទទួលខុសត្រូវរាល់ការខូចខាត ឬការបាត់បង់ណាមួយឡើយ ហើយក្នុងករណីរឹងរូស អាជ្ញាធរមូលដ្ឋាននិងមន្ត្រីជំនាញនឹងកសាងសំណុំរឿងបញ្ជូនឡើងតុលាការតាមផ្លូវច្បាប់។ បន្ថែមលើនេះសាលារាជធានីភ្នំពេញស្នើឲ្យពលរដ្ឋដែលកំពុងរស់នៅលើផ្ទៃទឹកប្ដូរទម្លាប់ពីការចិញ្ចឹមត្រីតាមបែលើផ្ទៃទន្លេនៅក្នុងភូមិសាស្ត្ររាជធានីភ្នំពេញមកចិញ្ចឹមត្រីតាមស្រះវិញ។
