ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសជំហរក្នុងការបង្កើតប៉ូលសេដ្ឋកិច្ចទី៤ របស់កម្ពុជានៅភូមិភាគឦសានប្រទេសឱ្យបាន ដោយនឹងផ្តោតសំខាន់លើវិស័យកសិឧស្សាហកម្ម និងធនធានរ៉ែដើម្បីជំរុញកំណើនសេដ្ឋកិច្ចជាតិឱ្យកាន់តែរីកចម្រើន។
ក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ ៧ ក្នុងខេត្តក្រចេះកាលពីថ្ងៃទី ៧ ខែកុម្ភៈ លោកនាយករដ្ឋមន្ត្រី ហ៊ុន សែន មានប្រសាសន៍ថា៖ «ខ្ញុំមានបំណងបង្កើតឱ្យកម្ពុជាមានប៉ូលសេដ្ឋកិច្ច ៤ បន្ទាប់ពីប៉ូលសេដ្ឋកិច្ច ៣ ចេញជារូបរាង រួមមានប៉ូលសេដ្ឋកិច្ច ទី១ នៅភ្នំពេញ, ទី២ ខេត្តព្រះសីហនុ, ទី៣ ខេត្តសៀមរាប និងទី៤ គឺភាគឦសានប្រទេសកម្ពុជា»។
លោកនាយករដ្ឋមន្ត្រីបន្តថា លោកចង់ប្រែក្លាយប៉ូលសេដ្ឋកិច្ចនៅភូមិភាគឦសាននេះទៅជាប៉ូលសេដ្ឋកិច្ចទី ៤ ដោយផ្តោតសំខាន់លើវិស័យកសិឧស្សាហកម្ម និងធនធានរ៉ែ ដែលមានស្រាប់ក្នុងតំបន់នេះ។ ដូច្នេះបានជាលោកដាក់ចេញផែនការតភ្ជាប់ហេដ្ឋារចនាសម្ព័ន្ធនៅក្នុងតំបន់នេះ។
ពាក់ព័ន្ធនឹងធនធានរ៉ែនៅក្នុងខេត្តមណ្ឌលគិរីនៃតំបន់ភាគឦសាននេះ លោកនាយករដ្ឋមន្ត្រីបញ្ជាក់ថា ក្នុងរយៈពេល ៧ ខែ កម្ពុជាផលិតមាសបានចំនួន ១ ៧៥១ គីឡូក្រាម ខណៈជាទូទៅក្នុង ១ សប្តាហ៍កម្ពុជាអាចផលិតមាសបានពី ៨០-១០០ គីឡូក្រាម។
សម្ដេច ហ៊ុន សែន មានប្រសាសន៍ថា៖ «អ៊ីចឹងបានជាខ្ញុំដាក់គោលដៅប៉ូលសេដ្ឋកិច្ចនៅទិសឦសាន គឺកសិឧស្សាហកម្ម និងធនធានរ៉ែរបស់យើង។ យើងមិនទាន់ស្រាវជ្រាវអស់នៅឡើយទេ យើងនៅមានរ៉ែបុកស៊ីត ធ្យូងថ្ម និងនៅមានកន្លែងផលិតមាសដទៃ។ យើងមិនទាន់បានប្រើប្រាស់អស់នៅឡើយទេ ទើបតែចាប់ផ្តើមផលិតមាសបាន ៧ ខែ»។
បើតាមលោកនាយករដ្ឋមន្ត្រី ហ៊ុន សែន នៅក្នុងខេត្តមួយចំនួននៃភូមិភាគឦសាននេះមានសក្តានុពលខ្ពស់លើការដាំដុះដំណាំផ្សេងៗសម្រាប់នាំចេញទៅទីផ្សារក្រៅប្រទេស បើទោះបីតំបន់នេះមិនទាន់មានរោងចក្រកែច្នៃគ្រប់គ្រាន់ក៏ដោយ ប៉ុន្តែដំណាំកៅស៊ូ ស្វាយចន្ទី ម្រេច និងដំណាំដទៃទៀតត្រូវបាននាំចេញទៅបរទេសតាមរយៈការនាំចេញវត្ថុធាតុដើមផង និងតាមរយៈការកែច្នៃយកទៅជាផលិតផលសម្រេចផងដែរ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់សារព័ត៌មានក្នុងស្រុកមួយនៅថ្ងៃទី ៧ ខែកុម្ភៈថា សម្រាប់ប៉ូលសេដ្ឋកិច្ចភ្នំពេញជាប៉ូលសេដ្ឋកិច្ចពហុបំណង ដែលពាក់ព័ន្ធនឹងការធ្វើអាជីវកម្ម និងជំនួញនានា ហើយសម្រាប់ខេត្តសៀមរាប គឺជាប៉ូលសេដ្ឋកិច្ចពាក់ព័ន្ធនឹងទេសចរណ៍វប្បធម៌ ចំណែកខេត្តព្រះសីហនុ គឺជាប៉ូលសេដ្ឋកិច្ចពហុបំណងដែលពាក់ព័ន្ធផ្នែកហិរញ្ញវត្ថុ និងទេសចរណ៍។ ដោយឡែកប៉ូលសេដ្ឋកិច្ចនៅភូមិភាគឦសាន ដែលរាជរដ្ឋាភិបាលបង្កើតឱ្យមាននេះជាតំបន់ទេសចរណ៍ផង កសិឧស្សាហកម្មផង និងធនធានរ៉ែផង។
លោកបន្តថា ប៉ូលសេដ្ឋកិច្ចទាំង ៤ នេះ គឺជាតំបន់ដែលមានសក្តានុពលសេដ្ឋកិច្ចរបស់កម្ពុជា ប៉ុន្តែលើកលែងខេត្តប៉ូលសេដ្ឋកិច្ចចំនួន ៣ នៃតំបន់ភាគឦសានមិនទាន់ដល់ពេលដែលត្រូវជំរុញឱ្យតំបន់នេះក្លាយជាតំបន់រុករករ៉ែទេ ព្រោះធនធានធម្មជាតិនេះត្រូវតែរក្សាទុកសិន ព្រោះមិនទាន់កែច្នៃធនធាននៅលើដីអស់។
លោកថ្លែងថា៖ «ប៉ូលសេដ្ឋកិច្ចទាំង ៤ នេះគឺរដ្ឋាភិបាលបង្កើតឱ្យក្លាយទៅជាតំបន់ឧត្តមភាពប្រៀបធៀបដែលអាចជំរុញឱ្យកំណើនសេដ្ឋកិច្ចរបស់យើងមានភាពលេចធ្លោ និងមានការចំណាយថ្លៃដើមទាបជាងតំបន់ដទៃទៀតក្នុងការផលិតទំនិញ។ ជាក់ស្តែងបើយើងនិយាយអំពីកសិឧស្សាហកម្មបើយើងយកទៅដាំនៅខេត្តផ្សេងយើងមានថ្លៃដើមខ្ពស់ជាង»។
បើតាមលោក គី សេរីវឌ្ឍន៍ ប៉ូលសេដ្ឋកិច្ចទាំង ៤ បានផ្តល់នូវសក្តានុពលខ្ពស់ក្នុងការទាក់ទាញវិនិយោគ ពាណិជ្ជកម្ម និងសេដ្ឋកិច្ចរបស់កម្ពុជា ព្រោះវាមានភាពអំណោយផលពីធនធានធម្មជាតិរបស់ខេត្តនីមួយៗដូចជាខេត្តព្រះសីហនុ ជាតំបន់សេដ្ឋកិច្ចពហុបំណង និងខេត្តសៀមរាបមានសក្តានុពលទេសចរណ៍ជាងខេត្តផ្សេងទៀត ព្រោះខេត្តទាំង ២ មានប្រាសាទបុរាណ និងឆ្នេរពីធម្មជាតិ៕
