ឫស្សីកែវ៖ ផ្ទះប្រជាពលរដ្ឋចំនួន១៨ខ្នងជាប្រភេទឈើប្រកក្បឿង និងសង្ក័សី ត្រូវបានអគ្គីភ័យឆាបឆេះយ៉ាងសន្ទោសន្ធៅទាំងកណ្តាលយប់ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចេញរថយន្តជួយអន្តរាគមន៍ភ្លាមៗ តែសំណាងល្អមិនបណ្ដាលមានគ្រោះថ្នាក់ដល់មនុស្សឡើយ។
ករណីអគ្គិភ័យនេះបានកើតឡើងកាលពីវេលាម៉ោង១១និង៤០នាទីយប់ ថ្ងៃទី៦ ខែឧសភា ឆ្នាំ២០២២ នៅតាមបណ្ដោយផ្លូវជាតិលេខ៥ ចន្លោះគីឡូម៉ែត្រលេខ៩ ក្នុងភូមិ២ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ។
លោកវរ:សេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញបានឲ្យដឹងថា ក្នុងប្រតិបត្តិការនេះកម្លាំងជំនាញ និងរថយន្តពន្លត់អគ្គីភ័យនៃស្នងការដ្ឋាន បានចេញមកគ្រប់គោលដៅដើម្បីជួយអន្តគមន៍ ប៉ុន្តែពេលមកដល់ ដោយស្ថានភាពផ្លូវតូចចង្អៀតមិនអាចចូលរថយន្តដល់ទីតាំងបានមានតែប្រើទុយយោចម្ងាយឆ្ងាយ ធ្វើឲ្យពិបាកក្នុងការជួយឲ្យបានទាន់ពេលវេលា។
លោកបានបញ្ជាក់ថា ក្នុងហេតុនេះកម្លាំងជំនាញបានប្រើប្រាស់រយៈពេលជាង១ម៉ោង ទើបអាចគ្រប់គ្រងអណ្ដាតភ្លើងដ៏សន្ធោសន្ធៅនេះបាន ដោយរថយន្តពន្លត់អគ្គិភ័យមកដល់ទីតាំងកើតហេតុចំនួន៣០គ្រឿង ប្រើប្រាស់ទឹកអស់ចំនួន៥២ឡាន ទើបអាចគ្រប់គ្រងស្ថានគារណ៍បាន។
លោកនាយការិយាល័យបានបញ្ជាក់បន្ថែមថា ចំពោះមូលហេតុនៃការឆាបឆេះ កម្លាំងជំនាញនិងចុះទៅស្រាវជ្រាវបន្ថែមនៅព្រឹកថ្ងៃទី០៧ ខែឧសភា នេះ។
តាមប្រភពពីប្រជាពលរដ្ឋម្នាក់ដែលរងគ្រោះក្នុងចំណោមប្រជាពលរដ្ឋរងគ្រោះជាច្រើននាក់ទៀតបានឲ្យដឹងថា មុនកើតហេតុគេឃើញផ្ទះមួយខ្នងដែលនៅកណ្ដាលគេត្រូវបានភ្លើងកំពុងឆាបឆេះដោយម្ចាស់ផ្ទះបានរត់ចេញក្រៅស្រែកឆោឡោឲ្យបងប្អូនជួយយកបំពង់ពន្លត់អគ្គិភ័យជួយបាញ់ពន្លត់តែដោយអណ្ដាតភ្លើងឆាបឆេះខ្លាំងពេកមិនអាចគ្រប់គ្រងបាន ទើបបណ្ដាលឲ្យឆេះរាលដាលដល់ផ្ទះប្រជាពលរដ្ឋដែលនៅក្បែរខាងជាច្រើនគ្រួសារទៀត បង្កជាអណ្ដាតភ្លើងយ៉ាងសន្ធោសន្ធៅរហូតគ្រប់គ្រងលែងឈ្នះ។ ដោយភ័យស្លន់ស្លោរប្រជាពលរដ្ឋនៅក្បែរនោះ បាននាំគ្នាប្រមូលយកទ្រព្យសម្បត្តិ ដែលមានតម្លៃរត់ចេញពីផ្ទះ ហើយក៏មានប្រជាពលរដ្ឋផ្សេងទៀត ដែរប្រមូលទ្រព្យសម្បត្តិ ដែលមានតម្លៃមិនទាន់ រត់ចេញឲ្យតែរួចខ្លួន និងបានត្រឹមតែឈរមើលផ្ទះខ្លួនដែលត្រូវបានអគ្គីភ័យលេបត្របាក់យ៉ាងសន្ធោសន្ធៅ ។ ហើយភ្លាមៗនោះសមត្ថកិច្ចមូលដ្ធាននិងកម្លាំងនគរបាលការិយាល័យបង្ការនិងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានចេញរថយន្តជាច្រើនគ្រឿង មកជួយអន្តរាគមន៍បាញ់ពន្លត់ទប់ស្កាត់ ដើម្បីមិនឲ្យរាលដាលដល់ផ្ទះបងប្អូនប្រជាពលរដ្ឋដ៏ទៃផ្សេងទៀត៕
