ភ្នំពេញៈ សម័យប្រជុំរដ្ឋសភាលើកទី ៧ នីតិកាលទី ៦ បានសម្រេចអនុម័តលើសេចក្ដីព្រាងវិសោធនកម្មច្បាប់ និងអនុម័តសេចក្តីព្រាងច្បាប់ចំនួន ២ និងបានបោះឆ្នោតគាំទ្រ លោក កែប ជុតិមា ជាប្រធានគណៈកម្មការមហាផ្ទៃ ការពារជាតិ និងមុខងារ សាធារណៈនៃរដ្ឋសភា ជំនួសលោក ហ៊ុន ណេង ដែលបានទទួលមរណភាព។ នេះបើតាមសេចក្ដីប្រកាសរបស់រដ្ឋសភា។
សម័យប្រជុំរដ្ឋសភា លើកទី ៧ នីតិកាលទី ៦ នៅថ្ងៃទី ១១ ឧសភា ត្រូវបានធ្វើឡើងក្រោមអធិបតីភាពលោក ហេង សំរិន ប្រធានរដ្ឋសភា ដោយមានវត្តមានសមាជិកសមាជិការដ្ឋសភា ចំនួន ១០៦ រូប។ លោក ហេង សំរិន បានអាននូវសេចក្តីប្រកាសរបស់រដ្ឋសភាដែលបានទទួលស្គាល់សុពលភាពនៃអាណត្តិរបស់ លោក ស្លេះ ពុនយ៉ាមីន ជាអ្នកតំណាងរាស្ត្រមណ្ឌលខេត្តកំពង់ចាមជំនួសលោក ហ៊ុន ណេង។
ជាមួយគ្នានេះអង្គសភាបានបោះឆ្នោតជ្រើសតាំង លោក កែប ជុតិមា ជាសមាជិកគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា និង លោក ខឹម ច័ន្ទគិរី ជាសមាជិកគណៈកម្មការ សាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់នៃរដ្ឋសភាដោយទទួលបានសំឡេងគាំទ្រចំនួន ១០៦ លើ ១០៦ សំឡេងនៃចំនួនសមាជិករដ្ឋសភាទាំងមូល។
បន្ទាប់មកលោក កែប ជុតិមា ត្រូវបានជាប់ឆ្នោតជាប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា។ ចំណែកលោក ពេជ្រ គឹមស្រ៊ាង ត្រូវបានជាប់ឆ្នោត ជាអនុប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណ៍យ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា។
ជាមួយគ្នានេះ រដ្ឋសភាក៏បានបោះឆ្នោត អនុម័តលើសេចក្តីព្រាងវិសោធនកម្មមាត្រា ១៤០ នៃច្បាប់ស្តីពីការគ្រប់គងរដ្ឋបាល រាជធានី ខេត្ត ក្រុង ស្រុក ខណ្ឌ ផងដែរ។
លោក ស ខេង នាយករដ្ឋមន្ត្រីស្តីទី និងសហការីជាតំណាងរាជរដ្ឋាភិបាលជាអ្នកចូលទៅការពារសេចក្តីព្រាងច្បាប់នេះ។
សមាជិករដ្ឋសភាដែលឡើងមានមតិ ក្នុងកិច្ចពិភាក្សាសេចក្តីព្រាងវិសោធនកម្មច្បាប់នេះមានចំនួន ៣ រូបគឺ លោក ហ៊ុន ម៉ានី លោក ឈាង វុន និង លោក សួស យ៉ារ៉ា។ នៅទីបំផុត អង្គសភាបានអនុម័តយល់ព្រមលើសេចក្តីព្រាងច្បាប់ទាំងមូល ដោយមានសំឡេងគាំទ្រ ១០៦ លើ ១០៦ សំឡេង។ នេះបើតាមសេចក្ដីប្រកាសព័ត៌មានរបស់រដ្ឋសភា។
លោក ស ខេង បានថ្លែងថា សេចក្តីព្រាងច្បាប់ស្តីពីវិសោធនកម្មមាត្រា ១៤០ នៃច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ ធ្វើឡើងដើម្បីឆ្លើយតបបរិបទជាក់ស្តែងនៃការរីកចម្រើនផ្នែកសេដ្ឋកិច្ច សង្គម និងស្របពេលដែលកំណែទម្រង់វិមជ្ឈការ និងវិសហមជ្ឈការ ត្រូវបានពង្រឹង និងពង្រីកកាន់តែស៊ីជម្រៅ ពិសេសការផ្ទេរសិទ្ធិអំណាច មុខងារ និងធនធានទៅឱ្យរដ្ឋបាលថ្នាក់ក្រោមជាតិ ដូចបានកំណត់ក្នុងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (២០២១-២០៣០)។
ចំណែកសេចក្តីព្រាងច្បាប់ស្តីពីសុវត្ថិភាពម្ហូបអាហារដែលត្រូវបានរៀបចំឡើងដោយយោងទៅលើនិន្នាការសកលលោកនៃពាណិជ្ជកម្មអន្តរជាតិ និងដើម្បីឆ្លើយតបទៅនឹងឧត្តមានុវត្តន៍ជាអន្តរជាតិ នៃការធ្វើសមាហរណកម្មសេដ្ឋកិច្ចកម្ពុជាទៅក្នុងតំបន់ និងសកលោកក៏ត្រូវបានរដ្ឋសភាបោះឆ្នោតអនុម័តជាឯកច្ឆន្ទផងដែរ។ តាមរយៈសេចក្តីព្រាងច្បាប់នេះនឹងកំណត់នូវគោលការណ៍ជាមូលដ្ឋាន ដើម្បីជំរុញឱ្យផលិតផលម្ហូបអាហារមានសុវត្ថិភាព និងស្របតាមស្តង់ដាកំណត់ សំដៅធានាកម្រិតការពារអាយុជីវិត និងសុខភាពប្រជាពលរដ្ឋ ធានាប្រសិទ្ធភាពនៃការការពារផលប្រយោជន៍អ្នកប្រើប្រាស់ និងរួមចំណែកកាត់បន្ថយភាពក្រីក្រ៕
